Настасся Касцюгова зламала нагу — ехала на самакаце па Варшаве, калі насустрач вылецела аўто
Прасядзеўшы 9 гадзін у чарзе ў бальніцы, Настасся Касцюгова, экспертка па камунікацыі і экс-супрацоўніца Офіса Святланы Ціханоўскай, падзялілася сваімі ўражаннямі ад польскай бясплатнай медыцыны.
Кіроўца толькі паціснуў плячыма
Настасся расказала «Нашай Ніве», што зламала нагу, калі ўпала з самаката на пераходзе ў Варшаве. Кіроўца аўто не паглядзеў па баках на невялікім завулку з зебрай і пачаў рух, калі да яго з аднаго боку на хуткасці ехаў веласіпедыст, а з другога — Настасся на самакаце.
«Веласіпедыст паспеў затармазіць у апошні момант, я таксама паспрабавала, але тармазоў самаката не хапіла. Каб не ўляцець у машыну, я пачала тармазіць яшчэ і нагой. У выніку вылецела фактычна яму пад колы, і ўпала з самакатам з вельмі вывернутым ступаком, якім тармазіла. Вось недзе там нага і зламалася», — апісвае выпадак Касцюгова.
Кіроўца, з ейных слоў, толькі паціснуў плячыма, а яна пакульгала дадому, яшчэ не ведаючы, што ў яе зламаная нага.
Па медыцынскую дапамогу Настасся звярнулася толькі на наступны дзень.
Вырашыла скарыстацца перавагамі ЗУСа (абавязковыя адлічэнні на сацыяльнае і медыцынскае страхаванне ў Польшчы). У выніку дзяўчына правяла ў SOR (бальнічнае аддзяленне экстраннай медыцынскай дапамогі) дзевяць гадзін са зламанай нагой у калідоры, загачаным рознымі іншымі пацярпелымі, якія таксама чакалі сваёй чаргі.
9 гадзін — гэта яшчэ не шмат?
«За гэты час мне пісалі знаёмыя, якія распавядалі, што чакалі і 12, і 14 гадзін, некаторым далёка не з першага разу ставілі правільны дыягназ, і даводзілася вяртацца яшчэ раз. Усё гэта можна было б зразумець, калі б гэта не каштавала такіх грошай штомесяц», — скардзіцца Касцюгова, дадаючы, што з кожным годам яна плаціць усё больш грошай у ЗУС.
«Трэба сказаць, што ў мяне былі прэтэнзіі да беларускай дзяржаўнай медыцыны, але пасля павінна сказаць, што ў цэлым зразумела, чаму ўсе, хто можа ездзіць у Беларусь, прыязджаюць туды на абследаванні і лечаць зубы. У параўнанні цяпер ясна, што ў нас усё было вельмі нядрэнна», — прызнаецца яна.
Настасся зрабіла для сабе выснову, што польская дзяржаўная медыцына хай застаецца для нейкіх выключных выпадкаў, калі патрэбна дарагая аперацыя ці нейкія іншыя маштабныя рэчы.
«А для такіх выпадкаў дастаткова прыватнай страхоўкі і эксперыментаваць больш няма жадання», — падсумавала яна.
Каментары
А чэргі ў паліклініках Еўропы - звыклая з'ява. Я ў Гішпаніі па 4-5 гадзін не раз сядзеў у адзяленні "хуткай". Прычым у платных клініках тая ж праблема. Нават калі па запісу - усё роўна будзеш сядзець гадзіну-другую.