На тэрыторыі Малдовы ўпаў і выбухнуў расійскі дрон. Малдова адклікала свайго пасла
Міністэрства замежных спраў Малдовы асудзіла інцыдэнт у вёсцы Крокмаз Штэфан-Водскага раёна, дзе ўпаў і выбухнуў беспілотнік.
У малдаўскім МЗС заявілі, што здарэнне з'яўляецца грубым парушэннем суверэнітэту і тэрытарыяльнай цэласнасці краіны, а таксама стварае пагрозу для жыцця грамадзян.
У сувязі з інцыдэнтам Малдова адклікае свайго пасла ў Расіі з Масквы для кансультацый.
Малдаўскае ведамства таксама падкрэсліла, што краіна асуджае вайну Расіі супраць Украіны і яе негатыўныя наступствы для бяспекі ў рэгіёне.
Пра магутны выбух каля Крокмаза стала вядома днём 9 жніўня. Пазней улады Штэфан-Водскага раёна апублікавалі фатаграфіі аб'екта, падобнага да беспілотніка, які ўпаў на ўскраіне вёскі.
10 жніўня паліцыя паведаміла, што на поўдні Малдовы каля Крокмаза выбухнуў баявы беспілотнік. Паводле малдаўскіх праваахоўнікаў, апарат такога тыпу ўпершыню быў зафіксаваны на тэрыторыі краіны.
Устаноўлена, што беспілотнік сутыкнуўся з дрэвам і выбухнуў на вышыні каля 2,5 метра. У выніку выбуху яго фрагменты разляцеліся на значную адлегласць і пашкодзілі дахі і гаспадарчыя пабудовы некалькіх жылых дамоў.
Раней паведамлялася, што ў выніку інцыдэнту ніхто не загінуў і не пацярпеў. Малдаўскія спецыялісты працягваюць высвятляць дакладны тып і паходжанне беспілотніка.
Каментары