Каб гасцініца атрымала нават адну зорку, трэба, каб там быў інтэрнэт і тэлевізар.
У Беларусі хочуць увесці абавязковую сертыфікацыю гасцініц па пяцізоркавай сістэме. Цяпер атрымліваць такі статус уласнікі могуць добраахвотна.
Пра будучыя змены расказаў намеснік дырэктара Нацыянальнага агенцтва па турызме Дзяніс Бяшко у эфіры АНТ, піша «Точка».
Для атрымання нават адной зоркі гасцініцы трэба будзе адпавядаць базавым патрабаванням. Сярод іх — наяўнасць вады, інтэрнэту, тэлевізара і іншых неабходных выгодаў.
Для часткі аб'ектаў гэта будзе азначаць патрэбу ў абнаўленні. А тыя, хто не зможа забяспечыць мінімальны ўзровень, могуць часова прыпыніць працу да ліквідацыі недахопаў.
Асобную ўвагу плануецца ўдзяліць сэрвісу. Персанал хочуць навучаць.
Цяпер у Беларусі налічваецца 664 гасцініцы. Прычым нумарны фонд плануецца сур'ёзна пашырыць: дзеючая дзяржпраграма прадугледжвае яго павелічэнне на 30%. Яна ахоплівае таксама санаторыі і іншае.
Па пяцібальнай шкале стан гасцініц у рэгіёнах Дзяніс Бяшко ацаніў на тры.
«Ёсць і добрыя аб'екты, у тым ліку цудоўныя апарт-гатэлі ў гістарычных будынках. Але ёсць і шэраг гасцініц, над якімі яшчэ трэба будзе папрацаваць: аднаўляць, пераўтвараць для выгоды гасцей», — падкрэсліў ён.
Каментары