На 90‑м годзе жыцця памёр вядомы беларускі навуковец-медык Анатоль Міхайлаў, які зрабіў значны ўклад у развіццё медыцынскай навукі ў Беларусі і за яе межамі, паведаміла прэс-служба Міністэрства аховы здароўя.
Анатоль Міхайлаў быў акадэмікам Нацыянальнай акадэміі навук Беларусі, доктарам медыцынскіх навук, прафесарам і загадчыкам кафедры прамянёвай дыягностыкі Інстытута павышэння кваліфікацыі і перападрыхтоўкі кадраў аховы здароўя Беларускага дзяржаўнага медыцынскага ўніверсітэта.
Яго навуковая дзейнасць ахоплівала розныя напрамкі медыцыны, у тым ліку кардыялогію, пульманалогію, гастраэнтэралогію, ангіялогію і ўралогію. Асаблівую ўвагу вучоны надаваў распрацоўцы новых метадаў рэнтгеналагічнай дыягностыкі захворванняў сардэчна-судзіннай сістэмы і органаў стрававання.
Міхайлаў таксама займаўся стварэннем камп'ютарных дыягнастычных сістэм і сучасных сродкаў медыцынскай візуалізацыі.
У 1992 годзе ў складзе аўтарскага калектыву ён стаў лаўрэатам Дзяржаўнай прэміі Беларусі за цыкл работ па распрацоўцы і ўкараненні ў судзінную хірургію новых метадаў дыягностыкі і лячэння.
Анатоль Міхайлаў стварыў у Беларусі ўласную навуковую школу спецыялістаў у галіне медыцынскай візуалізацыі. Яго праца мела істотны ўплыў на развіццё гэтага напрамку ў беларускай медыцыне.
У 2018 годзе на першым Кангрэсе Беларускага таварыства радыёлагаў Міхайлаў быў абраны ганаровым членам арганізацыі. У 2021 годзе вучонага ўзнагародзілі медалём Францыска Скарыны, а зусім нядаўна, 22 ліпеня 2026 года, яму прысвоілі званне Заслужанага дзеяча навукі.
Цяпер чытаюць
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі27
Каментары