Польская авіякампанія LOT патлумачыла залёт свайго самалёта ў Беларусь
Звычайна еўрапейскія судны агінаюць Беларусь.
Пасажырскі самалёт LOT, які ляцеў з Вільні ў Варшаву, 1 верасня ненадоўга ўвайшоў у паветраную прастору Беларусі праз умовы надвор'я. Пра гэта MOST паведамілі ў польскай авіякампаніі.
«Падчас рэйса LO772 з Вільні ў Варшаву, які выконваўся 1 верасня, па маршруце палёту — ад Сейнаў, каля польска-літоўскай мяжы, аж да Аструва-Мазавецкага — фарміраваўся моцны навальнічны фронт. Дзеля забеспячэння бяспекі палёту камандзір паветранага судна па ўзгадненні з дыспетчарскай службай кіравання паветраным рухам у Вільнюсе папрасіў скарэктаваць курс і атрымаў на гэта дазвол. Затым самалёт перайшоў пад кіраванне польскай раённай дыспетчарскай службы», — адказалі ў авіякампаніі LOT на запыт MOST.
Там дадалі, што LOT не выконвае рэйсы з выкарыстаннем паветранай прасторы Беларусі, а 1 верасня самалёт апынуўся там толькі на некалькі дзясяткаў секунд у выніку карэкціроўкі курса, звязанай з умовамі надвор'я.
«Гэта быў адзінкавы інцыдэнт, прадыктаваны меркаваннямі бяспекі і які адбыўся па ўзгадненні з дыспетчарскай службай кіравання паветраным рухам», — патлумачылі ў авіякампаніі.
Рэйс LO772 Вільня — Варшава 1 верасня перасек мяжу Беларусі, праляцеўшы над Гродзенскай вобласцю.
У маі 2021 года Еўрапейскае агенцтва авіяцыйнай бяспекі (EASA) рэкамендавала авіякампаніям з краін ЕС пазбягаць палётаў праз Беларусь. Такое рашэнне было прынята пасля прымусовай пасадкі ў Мінску самалёта Ryanair з Раманам Пратасевічам на борце. Аднак правілы дапускаюць такі пралёт, калі выкарыстанне беларускай паветранай прасторы неабходнае «для забеспячэння бяспечнай эксплуатацыі паветранага судна пры непрадбачаных абставінах».
Арыштавалі прадстаўнікоў кампаніі Bayer у Беларусі15
Каментары