ЗША раскрылі расійскую сетку падрыхтоўкі тэрактаў і заказных забойстваў

Удзельнікі гэтай сеткі шукалі выканаўцаў для фізічнай ліквідацыі як мінімум двух расійскіх апазіцыянераў, а таксама для здзяйснення дыверсій супраць вайсковых і грамадзянскіх аб'ектаў, піша Бі-бі-сі.

Міністэрства юстыцыі ЗША абвясціла пра рассакрэчванне абвінавачанняў супраць пяці чалавек, якія, паводле звестак ведамства, працавалі на расійскія разведвальныя службы.

У заяве ведамства гаворыцца, што гэтая сетка «плаціла і спрабавала плаціць асобам у ЗША і іншых краінах за правядзенне папярэдняга назірання і здзяйсненне мэтанакіраваных забойстваў, а таксама даручала сваім саўдзельнікам здзяйсняць і спрабаваць здзяйсняць акты тэрарызму супраць грамадзянскай і ваеннай інфраструктуры ў еўрапейскіх краінах, якія звязаныя або лічацца звязанымі з Украінай».

Аператыўную працу па раскрыцці сеткі вяло ФБР.

«Абвінавачанні, абвешчаныя сёння, з'яўляюцца кульмінацыяй выдатнай працы шматлікіх палявых аддзяленняў ФБР, падраздзяленняў і партнёрскіх агенцтваў, якія разам сарвалі спробы Расіі здзейсніць гвалтоўныя дзеянні ў сталіцы нашай краіны і па ўсёй тэрыторыі Злучаных Штатаў», — заявіў памочнік дырэктара службы Дарэн Кокс.

Каму выстаўленыя абвінавачанні

У заяве Мінюста названыя пяць чалавек. Гэта:

— 63‑гадовы Юрый Храмееў (у справе таксама пазначаны як «палкоўнік Юрый»), былы палкоўнік расійскіх спецслужбаў, які ўдзельнічаў у вярбоўцы асоб для здзяйснення забойстваў расійскіх апазіцыянераў;

— яго 27‑гадовы сын Кірыл Храмееў, супрацоўнік ФСБ;

— грамадзянін Кубы Оэміс Рамагоса Дуруці, 35 гадоў;

Яідэль Дэльгада Суарэс, таксама вядомы як «Вікінг», 35 гадоў, грамадзянін Кубы;

— Анхель Эдуарда Кастра, 22 гады, грамадзянін Венесуэлы.

Пра кубінца Оэмiса Рамагосу Дуруці раней пісалі СМІ ў сувязі з дыверсіямі ў Літве.

Deutsche Welle, азнаёміўшыся з дакументамі, высветліла, што ў 2024 годзе нехта пад псеўданімам «Дыяс» даручаў завербаваным ім выканаўцам падпальваць склады будаўнічых матэрыялаў у Польшчы, аўтобусны парк у Чэхіі, прадпрыемства па перапрацоўцы адходаў у Румыніі, а таксама абсталяванне літоўскай вытворчасці, прызначанае для Украіны.

Паводле звестак выдання, пад гэтым псеўданімам хаваўся Оэміс Рамагоса Дуруці, грамадзянін Кубы, які пражывае ў Расіі і аб'яўлены ў вышук праваахоўнымі органамі Літвы.

У чым іх абвінавачваюць

Паводле звестак Мінюста ЗША, удзельнікі сеткі дзейнічалі па заданні расійскіх спецслужбаў. Улетку 2026 года сетка завербавала жыхара ЗША для сачэння за вядомым расійскім апазіцыянерам, які жыве ў ЗША. Імя апазіцыянера не называецца, у заяве Мінюста яго называюць «Ахвяра-1».

Суарэс перадаў завербаванаму дадзеныя для сачэння. Той перадаў заказчыку фатаграфіі і відэазапісы месцаў, звязаных з патэнцыйнай ахвярай, пасля чаго Суарэс і Кастра прапанавалі яму здзейсніць забойства за ўзнагароджанне 40 тысяч даляраў.

Акрамя таго, той жа Суарэс, паводле звестак Мінюста і ФБР, спрабаваў завербаваць некалькіх іншых асоб у ЗША для сачэння і забойства не толькі «Ахвяры-1», але і іншых мэтаў.

У 2025 годзе, паводле звестак ФБР, тая ж сетка завербавала неназванага грамадзяніна ЗША для сачэння за іншым расійскім апазіцыянерам, які знаходзіцца ў Літве (ён пазначаны як «Ахвяра-2»). У аперацыі ўдзельнічалі Кірыл Храмееў і яго бацька Юрый Храмееў.

Перамовы з завербаваным выканаўцам адбываліся па той жа схеме. Спачатку Кірыл Храмееў папрасіў зрабіць здымкі па ўказаным адрасе пражывання патэнцыйнай ахвяры, а затым Храмееў-старэйшы прапанаваў выканаўцу 25 тысяч даляраў за забойства.

Як адзначаецца ў заяве Мінюста ЗША, Юрый Храмееў растлумачыў выканаўцу, што жадае смерці «Ахвяры-2», таму што той «лье бруд на краіну» і «скажае гісторыю». Затым Храмееў-старэйшы прапанаваў магчымыя спосабы забойства.

Калі завербаваны амерыканец адмовіўся, яму прапанавалі «больш простую працу» — «падпал склада з маёмасцю або прадуктамі» альбо «кіданне бутэлькі з бензінам у электрападстанцыю», гаворыцца ў заяве амерыканскіх уладаў.

Сетка таксама, як мяркуецца, вербавала іншых асоб для здзяйснення дыверсій у Еўропе. Паводле звестак Мінюста, Оэміс Рамагоса Дуруці ў чэрвені 2024 года каардынаваў дыверсію ў Чэхіі, а ў верасні 2024 года — у Літве.

Юрый Храмееў, Кірыл Храмееў, Оэміс Рамагоса Дуруці, Яідэль Дэльгада Суарэс і Анхель Эдуарда Кастра абвінавачваюцца ва ўдзеле ў змове з мэтай фінансавання тэрарызму. Юрый Храмееў, Суарэс і Кастра таксама абвінавачваюцца ва ўдзеле ў змове з мэтай здзяйснення заказнога забойства.

За першае абвінавачанне прадугледжваецца максімальнае пакаранне ў выглядзе 20 гадоў пазбаўлення волі, за другое — да 10 гадоў.

Усе фігуранты зараз знаходзяцца на волі, гаворыцца ў заяве Мінюста ЗША.

• 10
• 1
• 0
• 3
• 1
• 0
• 4
• 0