Фактычна ў Крамлі не сталі ні пацвярджаць, ні абвяргаць паведамленні пра магчымы выпадак чумы ў Іркуцкай вобласці.
Прэс-сакратар Уладзіміра Пуціна Дзмітрыя Пяскоў пракаментаваў паведамленні пра магчымы выпадак заражэння чумой у Іркуцкай вобласці.
«Галоўным ведамствам, якое кампетэнтнае ў гэтай галіне, з’яўляецца Расспажыўнагляд. І менавіта на афіцыйныя заявы Расспажыўнагляду трэба арыентавацца, не слухаючы розныя чуткі, розныя разважанні», — заявіў Пяскоў.
Ён дадаў, што ў ведамстве «працуюць высокія прафесіяналы ў гэтай галіне», і зноў заклікаў давяраць іх афіцыйным паведамленням.
Падставай для размоў пра чуму стала смерць супрацоўніцы Іркуцкага супрацьчумнага інстытута. Жанчыну шпіталізавалі 29 верасня з сімптомамі цяжкай пнеўманіі, а ў ноч з 1 на 2 кастрычніка яна памерла.
Медыя агучылі версію заражэння, паводле якой 28‑гадовая супрацоўніца Іркуцкага супрацьчумнага інстытута Дар’я Шыпілава разбіла прабірку з узбуджальнікам лёгачнай чумы. Дзяўчына памерла. Афіцыйнага пацверджання гэтай версіі прычын яе смерці не было.
Пасля смерці Шыпілавай Шэлехаўскую бальніцу, дзе яна знаходзілася, закрылі на каранцін. Пад медыцынскае назіранне ўзялі 189 чалавек, якія кантактавалі з жанчынай. Губернатар Іркуцкай вобласці Ігар Кобзеў заявіў, што прыкмет захворвання ў іх не выявілі.
Расспажыўнагляд паведаміў, што праведзеныя даследаванні не выявілі мікраарганізмаў, звязаных з прафесійнай дзейнасцю памерлай. Афіцыйна яе дыягназ сфармулявалі як «пнеўманію нявызначанай этыялогіі». Паводле ведамства, санітарна-эпідэміялагічная сітуацыя ў рэгіёне застаецца стабільнай.
Тым часам Казахстан, Кыргызстан і Узбекістан узмацнілі меры засцярогі. На памежных пунктах правяраюць людзей, транспарт і грузы, а службы, якія адказваюць за недапушчэнне завозу асабліва небяспечных інфекцый, перавялі ў рэжым павышанай гатоўнасці.
За развіццём сітуацыі сочыць і Белы дом. Паводле крыніцы Axios у адміністрацыі Дональда Трампа, амерыканскія ўлады ведаюць пра паведамленні з Расіі, адсочваюць іх і «ацэньваюць магчымыя варыянты».
Чуму выклікае бактэрыя Yersinia pestis. Найбольш небяспечная лёгачная форма можа перадавацца ад чалавека да чалавека праз дыхальныя шляхі. Пры своечасовым лячэнні антыбіётыкамі хвароба вылечваецца, аднак без хуткай медыцынскай дапамогі яна прыводзіць да смерці.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну93
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары