ЗША заклікалі сваіх грамадзян неадкладна пакінуць Расію праз магчымую ўспышку чумы
Амбасада ЗША выпусціла асобнае медыцынскае папярэджанне з-за смерці супрацоўніцы супрацьчумнага інстытута ў Іркуцкай вобласці і каранціну ў бальніцах. Амерыканскія ўлады прызнаюць, што амаль не змогуць дапамагчы сваім грамадзянам па-за Масквой, і параілі рыхтавацца да самастойнай эвакуацыі.
Амбасада ЗША ў Расіі 6 кастрычніка апублікавала медыцынскае папярэджанне ў сувязі з паведамленнямі пра магчымы выпадак лёгачнай чумы ў Іркуцкай вобласці.
«Амбасадзе ЗША вядома пра паведамленні прэсы з Іркуцкай вобласці аб падазрэнні на лёгачную чуму, якая прывяла да смерці аднаго чалавека, а таксама аб звязаных з гэтым каранцінных мерах і закрыцці бальніц у Іркуцку. Мы працягваем уважліва сачыць за сітуацыяй», — гаворыцца ў заяве.
Амерыканскія ўлады падкрэслілі, што іх магчымасці дапамагчы суайчыннікам у Расіі моцна абмежаваныя.
«Урад ЗША мае абмежаваныя магчымасці для аказання дапамогі амерыканскім грамадзянам у Расіі, асабліва за межамі Масквы», — папярэдзіла амбасада.
Дзярждэпартамент пакінуў для Расіі найвышэйшы, чацвёрты ўзровень небяспекі — «Не падарожнічаць».
У папярэджанні заяўлена, што амерыканцы, якія ўжо знаходзяцца ў Расіі, павінны неадкладна выехаць. Тым, хто толькі плануе паездку, настойліва раяць адмовіцца ад яе.
Гэтая рэкамендацыя дзейнічала і раней, але цяпер амбасада паўтарыла яе ў асобным паведамленні, прысвечаным падазрэнням на чуму.
Грамадзянам ЗША ў Іркуцкай вобласці рэкамендавалі не наведваць установы, закранутыя каранціннымі мерамі, і неадкладна звяртацца па медыцынскую дапамогу пры павышэнні тэмпературы або з’яўленні сімптомаў у дыхальнай сістэме.
Таксама амерыканцам прапанавалі загадзя высветліць магчымасці медыцынскай эвакуацыі праз страхавую кампанію.
«Майце план выезду ў надзвычайнай сітуацыі, які не залежыць ад дапамогі ўрада ЗША», — гаворыцца ў папярэджанні.
Паведамленні пра магчымую чуму з’явіліся пасля смерці супрацоўніцы Іркуцкага супрацьчумнага інстытута. Расійскія медыя пісалі, што яна магла заразіцца лёгачнай формай захворвання. Пасля яе смерці ў некаторых медыцынскіх установах увялі каранцін, а людзей, якія кантактавалі з жанчынай, узялі пад назіранне.
Расспажыўнагляд сцвярджае, што ў жанчыны была «пнеўманія невядомай этыялогіі», а даследаванні нібыта не выявілі мікраарганізмаў, звязаных з яе прафесійнай дзейнасцю. Санітарна-эпідэміялагічную сітуацыю ў рэгіёне расійскае ведамства называе стабільнай.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага38
Каментары