Ашуканцы дураць школьнікаў праз фальшывыя сайты з гатовымі хатнімі заданнямі
Сілавікі папярэджваюць пра новую схему махлярства, ахвярамі якой становяцца непаўналетнія. Зламыснікі карыстаюцца жаданнем дзяцей хутка выканаць хатняе заданне, каб атрымаць доступ да іх асабістых даных і грошай бацькоў.
Схема пачынаецца з пошуку ў інтэрнэце гатовых адказаў на школьныя заданні. Падлетак пераходзіць на фальшывы сайт, які выглядае як звычайны адукацыйны рэсурс. Каб атрымаць доступ да рашэнняў, сайт прапануе зарэгістравацца і ўвесці нумар мабільнага тэлефона, прозвішча, імя, імя па бацьку, дату нараджэння і месца жыхарства. Дзеці часта не задумваюцца, што гэтыя звесткі могуць выкарыстаць супраць іх.
Пасля рэгістрацыі ў справу ўступаюць махляры. Яны тэлефануюць дзіцяці, прадстаўляюцца дырэктарам школы або настаўнікам і патрабуюць даслаць код з СМС ці іншыя канфідэнцыйныя даныя нібыта для актывацыі электроннага дзённіка.
Атрымаўшы доступ да акаўнтаў або асабістай інфармацыі, зламыснікі пачынаюць маніпуляваць дзецьмі. Іх мэта — прымусіць непаўналетніх да злачынных дзеянняў, напрыклад перадаваць грошы або афармляць крэдыты, а затым выманьваць сродкі ў бацькоў.
Каб абараніць дзяцей ад кібермахляроў, сілавікі раяць бацькам размаўляць з імі пра бяспеку ў інтэрнэце. Важна растлумачыць, што нельга паведамляць незнаёмцам асабістыя звесткі, коды з СМС і паролі.
Бацькам таксама рэкамендуюць кантраляваць, якія сайты наведвае дзіця, і ўсталяваць сродкі бацькоўскага кантролю.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары