На мяжы дзвюх Карэй расце напружанасць. Сеул прыгразіў Пхеньяну жорсткім адказам
Аналітыкі папярэджваюць: ва ўмовах цяперашняй напружанасці нават папераджальныя стрэлы могуць справакаваць сутыкненне.
Міністэрства абароны Паўднёвай Карэі 20 кастрычніка папярэдзіла Пхеньян пра жорсткі адказ у выпадку правакацый. Заява прагучала пасля пагроз КНДР узмацніць узбраенне на мяжы, паведамляе Reuters.
Прычынай абвастрэння сталі інцыдэнты падчас будаўніцтва паўночнакарэйскіх памежных умацаванняў. Паводле Сеула, вайскоўцы КНДР, якія ўсталёўваюць міны і загароды, сёлета каля 50 разоў перасякалі ваенную дэмаркацыйную лінію — мяжу паміж пазіцыямі дзвюх армій.
Паўднёвакарэйскія вайскоўцы праз гучнагаварыцелі патрабавалі ад іх адысці і рабілі папераджальныя стрэлы. У Сеуле называюць гэта законнымі абарончымі дзеяннямі.
Пхеньян трактуе іх інакш. Сястра кіраўніка КНДР Кім Ё Чжон абвінаваціла паўднёвакарэйскую армію ў правакацыях і стварэнні пагрозы для салдат, якія будуюць умацаванні. Яна заявіла, што ў адказ КНДР можа размясціць дадатковую тактычную ўдарную зброю і аднавіць прапагандысцкія перадачы на мяжы праз гучнагаварыцелі. Такія перадачы — адзін са спосабаў псіхалагічнага ціску, які бакі выкарыстоўвалі дзесяцігоддзямі. Летась абедзве Карэі спынілі іх дзеля зніжэння напружанасці.
У адказ на пагрозы Пхеньяна паўднёвакарэйскае Міністэрства абароны заявіла: «Калі Паўночная Карэя выкарыстае нашы законныя захады як нагоду для далейшых правакацый, мы рашуча пакараем яе».
Аналітыкі заявілі, што супрацьстаянне павялічвае рызыку вайсковага сутыкнення. Галоўная небяспека цяпер — памылковая ацэнка дзеянняў іншага боку. Былы супрацоўнік Камандавання ААН Майкл Босак патлумачыў Reuters: паўночнакарэйскія вайскоўцы могуць прыняць папераджальныя стрэлы за атаку, пры якой праціўнік проста не трапіў у цэль, і адкрыць агонь у адказ.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары