Na miažy dźviuch Karej raście napružanaść. Sieuł pryhraziŭ Pchieńjanu žorstkim adkazam
Analityki papiaredžvajuć: va ŭmovach ciapierašniaj napružanaści navat papieradžalnyja streły mohuć spravakavać sutyknieńnie.
Ministerstva abarony Paŭdniovaj Karei 20 kastryčnika papiaredziła Pchieńjan pra žorstki adkaz u vypadku pravakacyj. Zajava prahučała paśla pahroz KNDR uzmacnić uzbrajeńnie na miažy, paviedamlaje Reuters.
Pryčynaj abvastreńnia stali incydenty padčas budaŭnictva paŭnočnakarejskich pamiežnych umacavańniaŭ. Pavodle Sieuła, vajskoŭcy KNDR, jakija ŭstaloŭvajuć miny i zaharody, sioleta kala 50 razoŭ pierasiakali vajennuju demarkacyjnuju liniju — miažu pamiž pazicyjami dźviuch armij.
Paŭdniovakarejskija vajskoŭcy praz hučnahavarycieli patrabavali ad ich adyści i rabili papieradžalnyja streły. U Sieule nazyvajuć heta zakonnymi abarončymi dziejańniami.
Pchieńjan traktuje ich inakš. Siastra kiraŭnika KNDR Kim Jo Čžon abvinavaciła paŭdniovakarejskuju armiju ŭ pravakacyjach i stvareńni pahrozy dla sałdat, jakija budujuć umacavańni. Jana zajaviła, što ŭ adkaz KNDR moža raźmiaścić dadatkovuju taktyčnuju ŭdarnuju zbroju i adnavić prapahandysckija pieradačy na miažy praz hučnahavarycieli. Takija pieradačy — adzin sa sposabaŭ psichałahičnaha cisku, jaki baki vykarystoŭvali dziesiacihodździami. Letaś abiedźvie Karei spynili ich dziela źnižeńnia napružanaści.
U adkaz na pahrozy Pchieńjana paŭdniovakarejskaje Ministerstva abarony zajaviła: «Kali Paŭnočnaja Kareja vykarystaje našy zakonnyja zachady jak nahodu dla dalejšych pravakacyj, my rašuča pakarajem jaje».
Analityki zajavili, što supraćstajańnie pavialičvaje ryzyku vajskovaha sutyknieńnia. Hałoŭnaja niebiaśpieka ciapier — pamyłkovaja acenka dziejańniaŭ inšaha boku. Były supracoŭnik Kamandavańnia AAN Majkł Bosak patłumačyŭ Reuters: paŭnočnakarejskija vajskoŭcy mohuć pryniać papieradžalnyja streły za ataku, pry jakoj praciŭnik prosta nie trapiŭ u cel, i adkryć ahoń u adkaz.
Kamientary