Пентагон скароціць менш амерыканскіх вайскоўцаў у Еўропе, чым планавалася раней
Еўрапейскія саюзнікі асцерагаліся, што ЗША выведуць да 25 тысяч вайскоўцаў. Цяпер чакаецца скарачэнне да 5 тысяч: вайна з Іранам паказала, наколькі амерыканскай арміі патрэбныя базы ў Еўропе і доступ да яе паветранай прасторы, піша Bloomberg.
Пентагон пераглядае маштабы скарачэння амерыканскага кантынгенту ў Еўропе, паведамляе Bloomberg са крыніцы. Цяпер на кантыненце знаходзяцца каля 80 тысяч амерыканскіх вайскоўцаў.
Паводле суразмоўцаў выдання, на пазіцыю Вашынгтона паўплывалі дзве акалічнасці. Па-першае, ЗША станоўча ацанілі павелічэнне выдаткаў саюзнікаў па НАТА на абарону. Па-другое, зацяжная вайна з Іранам прадэманстравала, наколькі амерыканскія аперацыі на Блізкім Усходзе залежаць ад еўрапейскіх баз і магчымасці пралятаць над тэрыторыяй саюзнікаў.
Гэтую залежнасць прызнаюць і ў Еўропе.
«Часам усё падаецца так, быццам ЗША знаходзяцца ў Еўропе дзеля Еўропы. Але суровая рэальнасць у тым, што ЗША знаходзяцца ў Еўропе, таму што гэта выгадна самім ЗША», — заявіў у кастрычніку міністр абароны Вялікабрытаніі Уэс Стрытынг.
Прадстаўнік ЗША пры НАТА Мэцью Уітакер таксама даў зразумець, што радыкальнага вываду войскаў можа не быць.
«У нас тут шмат сіл і сродкаў, якія знаходзяцца менавіта там, дзе нам трэба. Не чакаю нічога маштабнага», — сказаў ён у пачатку лістапада.
Асноўнае скарачэнне, як чакаецца, закране Германію, дзе размешчаны найбуйнейшы амерыканскі кантынгент у Еўропе.
Усходні фланг НАТА, наадварот, могуць узмацніць: краіны, якія мяжуюць з Расіяй, прапануюць узяць на сябе частку выдаткаў. Канкрэтныя дзяржавы ў матэрыяле не называюцца.
Аднак канчатковага рашэння яшчэ няма. У Пентагоне пацвердзілі, што перагляд размяшчэння войскаў працягваецца. Міністр абароны Піт Хегсет павінен перадаць свае канчатковыя рэкамендацыі Дональду Трампу 1 снежня. Апошняе слова застанецца за прэзідэнтам, які неаднаразова крытыкаваў еўрапейцаў за недастатковую дапамогу ў вайне супраць Ірана.
Магчымасці для вялікага скарачэння абмяжоўвае і Кангрэс. Летась ён забараніў Пентагону зніжаць колькасць вайскоўцаў у Еўропе ніжэй за 76 тысяч без кансультацый з саюзнікамі і падрабязнай ацэнкі рызык. Пераход кантролю над Кангрэсам да дэмакратаў пасля прамежкавых выбараў можа дадаткова ўскладніць планы Трампа: заканадаўцы кантралююць фінансаванне вайсковых выдаткаў.
Каментары