Pientahon skarocić mienš amierykanskich vajskoŭcaŭ u Jeŭropie, čym płanavałasia raniej
Jeŭrapiejskija sajuźniki aścierahalisia, što ZŠA vyvieduć da 25 tysiač vajskoŭcaŭ. Ciapier čakajecca skaračeńnie da 5 tysiač: vajna ź Iranam pakazała, nakolki amierykanskaj armii patrebnyja bazy ŭ Jeŭropie i dostup da jaje pavietranaj prastory, piša Bloomberg.
Pientahon pierahladaje maštaby skaračeńnia amierykanskaha kantynhientu ŭ Jeŭropie, paviedamlaje Bloomberg sa krynicy. Ciapier na kantyniencie znachodziacca kala 80 tysiač amierykanskich vajskoŭcaŭ.
Pavodle surazmoŭcaŭ vydańnia, na pazicyju Vašynhtona paŭpłyvali dźvie akaličnaści. Pa-pieršaje, ZŠA stanoŭča acanili pavieličeńnie vydatkaŭ sajuźnikaŭ pa NATA na abaronu. Pa-druhoje, zaciažnaja vajna ź Iranam prademanstravała, nakolki amierykanskija apieracyi na Blizkim Uschodzie zaležać ad jeŭrapiejskich baz i mahčymaści pralatać nad terytoryjaj sajuźnikaŭ.
Hetuju zaležnaść pryznajuć i ŭ Jeŭropie.
«Časam usio padajecca tak, byccam ZŠA znachodziacca ŭ Jeŭropie dziela Jeŭropy. Ale surovaja realnaść u tym, što ZŠA znachodziacca ŭ Jeŭropie, tamu što heta vyhadna samim ZŠA», — zajaviŭ u kastryčniku ministr abarony Vialikabrytanii Ues Strytynh.
Pradstaŭnik ZŠA pry NATA Mećju Uitakier taksama daŭ zrazumieć, što radykalnaha vyvadu vojskaŭ moža nie być.
«U nas tut šmat sił i srodkaŭ, jakija znachodziacca mienavita tam, dzie nam treba. Nie čakaju ničoha maštabnaha», — skazaŭ jon u pačatku listapada.
Asnoŭnaje skaračeńnie, jak čakajecca, zakranie Hiermaniju, dzie raźmieščany najbujniejšy amierykanski kantynhient u Jeŭropie.
Uschodni fłanh NATA, naadvarot, mohuć uzmacnić: krainy, jakija miažujuć z Rasijaj, prapanujuć uziać na siabie častku vydatkaŭ. Kankretnyja dziaržavy ŭ materyjale nie nazyvajucca.
Adnak kančatkovaha rašeńnia jašče niama. U Pientahonie paćvierdzili, što pierahlad raźmiaščeńnia vojskaŭ praciahvajecca. Ministr abarony Pit Chiehsiet pavinien pieradać svaje kančatkovyja rekamiendacyi Donaldu Trampu 1 śniežnia. Apošniaje słova zastaniecca za prezidentam, jaki nieadnarazova krytykavaŭ jeŭrapiejcaŭ za niedastatkovuju dapamohu ŭ vajnie suprać Irana.
Mahčymaści dla vialikaha skaračeńnia abmiažoŭvaje i Kanhres. Letaś jon zabaraniŭ Pientahonu źnižać kolkaść vajskoŭcaŭ u Jeŭropie nižej za 76 tysiač biez kansultacyj z sajuźnikami i padrabiaznaj acenki ryzyk. Pierachod kantrolu nad Kanhresam da demakrataŭ paśla pramiežkavych vybaraŭ moža dadatkova ŭskładnić płany Trampa: zakanadaŭcy kantralujuć finansavańnie vajskovych vydatkaŭ.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi6464
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi64
Što znajšli ŭ viaźnicy Kreŭskaha zamka, dzie ŭ 1382‑m zadušyli Kiejstuta? Jana była pachavanaja pad zavałami paśla šturmu Śvidryhajły amal 600 hadoŭ55
Kamientary