Bajec UFC Muchamad Makajeŭ paprasiŭ, kab pra jaho kazali «z Dahiestana», a nie «z Rasii»
Makajeŭ źviarnuŭsia da lihi z prośbaj nie zhadvać pra jaho pachodžańnie z Rasii.
04.04.2023 / 19:38
Muchamad Makajeŭ. Fota: Cik-tok kanał @all_about_mma1
22-hadovy bajec aburyŭsia zhadkaj Rasii ŭ videapłašcy ź jaho pradstaŭleńniem. Jon źviarnuŭsia z prośbaj nie zhadvać pra jaho pachodžańnie z Rasii.
U svaim tvitary jon napisaŭ: «Mnie heta nie padabajecca! Kali łaska, pakińcie prosta «Dahiestan» na moj nastupny vychad».
Post Machamada Makajeva ŭ tvitary
Heta vykazvańnie sabrała bolš za 500 kamientaryjaŭ.
U vyniku Machamad patłumačyŭ svaju zajavu. Hałoŭnaj jaje pryčynaj stali pratesty ŭ Maskvie suprać budaŭnictva miačeci na miescy Śviatoha Pravasłaŭnaha voziera:
«Ja šmat pračytaŭ kamientaryjaŭ ab tym, jak ruskija vystupać suprać musulman, jakija chočuć pabudavać miačeć u Maskvie. Dla mianie hetaha dastatkova. Ja mahu skazać, što kraina, u jakoj ja ciapier žyvu, nikoli adkryta nie vystupała suprać budaŭnictva miačeciaŭ».
Machamad Makajeŭ naradziŭsia ŭ 2000 hodzie ŭ Bujnaksku (Dahiestan). Kali jamu było 12, siamja pierajechała ŭ Anhliju z-za palityčnaha pieraśledu baćki.
Jany pasialilisia ŭ vakolicach Mančestera. Tam padletak staŭ surjozna zachaplacca volnaj baraćboj. Jon zmoh vyjhrać nacyjanalny čempijanat Brytanii i imknuŭsia prabicca na mižnarodnuju arenu. Ale ŭsiamu pieraškadžała adsutnaść hramadzianstva, što nie dazvalała Makajevu vyjazdžać za miežy krainy.
Paralelna Machamad staŭ zachaplacca roznymi adzinaborstvami (boks, džyu-džycu, hreblinh). U vyniku jon pryniaŭ rašeńnie stać bajcom źmiešanych adzinaborstvaŭ (MMA). Jon — dvuchrazovy čempijon śvietu pa MMA va ŭzroście da 20 hadoŭ.
Adarvany ad histaryčnaj radzimy Makajeŭ padkreślivaŭ svajo pachodžańnie biełaj papachaj na hałavie.
Ciapier jon vystupaje ŭ UFC ŭ najlahčejšaj vazie (da 57 kh) i maje mianušku «karnik».
U toj ža čas inšy bajec UFC Mikita Kryłoŭ, jaki pachodzić z Łuhanskaj vobłaści, padčas adnaho z vystupleńniaŭ na kryki z trybun «USA» vykryknuŭ «Rasija!».
Čytajcie jašče:
Hulca viciebskaha «Maksłajna» zatrymali prosta na futbolnym poli
Dzie ciapier Vadzim Dzieviatoŭski, były lohkaatlet i deputat, jaki ŭ 2020-m trapiŭ na Akreścina