Hulca viciebskaha «Maksłajna» zatrymali prosta na futbolnym poli
Siłaviki prosta na treniroŭcy zatrymali hulca viciebskaha «Maksłajna» Cimafieja Łukaševiča. Partniory spačatku dumali, što heta rozyhryš jahonaj kreatyŭnaj niaviesty, ale paśla vyśvietliłasia, što jana taksama patrapiła za kraty, piša telehram-kanał «O, sport! Ty — mir!».
Na minułym tydni ŭ rahačoŭskim «Maksłajnie» adbyłasia čarhovaja nietypovaja padzieja, ale pra jaje samy jarki kłub pieršaj lihi nie staŭ raskazvać u svaich sacsietkach. Na treniroŭku kamandy ŭ Minsku zajavilisia siłaviki, jakija zatrymali paŭabaroncu eks-rahačoŭcaŭ Cimafieja Łukaševiča. Spačatku partniory dumali, što stali śviedkami rozyhryšu, ale davoli chutka jany skiemili, što ŭsio pa-sapraŭdnamu.
Chto taki Cimafiej Łukaševič?
26-hadovy aporny paŭabaronca ŭžo amal vosiem hadoŭ u prafiesijnym futbole, adnak vialikich dasiahnieńniaŭ nie maje. Zajmaŭsia ŭ SDIUŠAR «Dynama», u 2015-m akazaŭsia ŭ dubli minskaha kłuba, ale ni tady, ni ŭ nastupnyja paru hadoŭ nie zmoh prabicca ŭ asnovu «bieła-błakitnych». U studzieni 2017-ha Łukaševič praciahnuŭ kantrakt z «Dynama», ale ŭžo ŭ sakaviku adpraviŭsia ŭ arendu ŭ staličny «Pramień» ź pieršaj lihi. Pieršapačatkova arenda była raźličanaja na paŭhoda, ale ŭletku damovu praciahnuli, i Cimafiej dapamoh kalektyvu stać čempijonam D2 i vyjści ŭ «vyšku». Paŭabaronca vyznačyŭsia tryma hałami ŭ 29 sustrečach.
Apornik zastaŭsia ŭ kamandzie Ivana Bijončyka i na nastupny siezon: u studzieni razarvaŭ kantrakt z «Dynama» i padpisaŭ paŭnavartasnaje pahadnieńnie z «Pramieniem». Praŭda, u D1 nahulaŭ niašmat — 15 matčaŭ biez ačkoŭ. Paśla taho siezona «Pramień» abjadnaŭsia z mahiloŭskim «Dniaprom» i pierajechaŭ na ŭschod Biełarusi, abraŭšy nazvu «Dniapro». U kalektyvie zastaŭsia i Łukaševič. Praŭda, hod u novaŭtvoranaj kamandzie da kanca nie dahulaŭ. Pravioŭšy ŭsiaho vosiem pajadynkaŭ (u siarednim 55 chvilin na poli), u žniŭni vypraviŭsia ŭ arendu ŭ mikaševicki «Hranit»: 10 matčaŭ (u siarednim 24 chviliny na poli) za druhuju častku siezona.
U śniežni 2019-ha minčuk pakinuŭ «Dniapro» i na hod zastaŭsia biez prafiesijnaha futboła — prosta nie mieŭ prapanoŭ. Tolki ŭ lutym 2021-ha karjera adnaviłasia: paŭabaronca dałučyŭsia da «Maksłajna», jaki rychtavaŭsia tady da čarhovaha siezona ŭ druhoj lizie. U kamandzie Łukaševič dahetul, razam ź joj adhulaŭ siezon u D3, vyjšaŭ u D2, letaś uziaŭ udzieł u pieršym «sutyku» z «Arsienałam» (vyjšaŭ na zamienu ŭ kancy dadzienaha času) i, kali b nie zaciataść ABFF, to zaraz by rychtavaŭsia da pajadynkaŭ «vyški».
Nu a tak — pakul iznoŭ D2. Na hety momant za plačyma Cimafieja — 27 matčaŭ za «Maksłajn» u čempijanacie i Kubku Biełarusi (19 pajadynkaŭ u asnovie, u siarednim — 70 chvilin na poli) i adzin hoł. Heta byŭ pieramožny miač u pajadynku z «Asipovičami» (3:0) u červieni 2022-ha.
Zaśviaciŭsia Łukaševič i na mižnarodnym uzroŭni. Jašče hulcom «Pramienia» ŭ 2017-m pravioŭ dva matčy za maładziožnuju zbornuju Biełarusi. U sakaviku i mai paŭabaronca adhulaŭ tavarniaki z adnahodkami z Łatvii (3:4) i Rasii (0:7) adpaviedna. Ludas Rumbucis advioŭ aporniku z łatvijcami 32 chviliny, z rasijanami — 45. I svoj śled u historyi kalektyvu Łukaševič pakinuŭ. U debiutnym matčy za «maładziožku» vyjšaŭ na zamienu na 58-j chvilinie i paśpieŭ adznačycca dublem (zabivaŭ na 63-j i 94-j chvilinach).
Hetaj zimoj 26-hadovy apornik razam z «Maksłajnam» rychtavaŭsia da novaha siezona ŭ pieršaj lizie. Ale prosta ciapier hulcu nie da futboła. I sprava zusim nie ŭ niejkich spartovych čyńnikach.
Što zdaryłasia z futbalistam?
25 sakavika «Maksłajn» u Minsku pravioŭ sparynh z BATE (1:1). Adnak ni ŭ asnovie, ni na zamienie Łukaševič nie fihuravaŭ, chacia ŭ «tavarniaku» z «Asipovičami» 18 sakavika apornik trapiŭ u zajaŭku (papiarednija sparynhi prapuskaŭ praz traŭmu).
Na staroncy va «UKantakcie» ŭžo pa fakcie viciebskaj kamandy — «Maksłajn» pierajechaŭ u jaho z Rahačova — adsutnaść minčuka paznačana słovam «inšaje». Nie traŭma, nie jašče niešta, a «inšaje». Pry hetym nivodzin čałaviek u kamientarach nie zadaŭsia pytańniem, kudy ž źnik Łukaševič.
Za paru dzion da hetaha Cimafiej adśviatkavaŭ 26-hodździe (u sacsietkach kłub nazvaŭ paŭabaroncu «adnym z samych zahadkavych i biezrazvažnych hulcoŭ našaha kalektyvu»), byŭ u vydatnym nastroi i paŭnavartasna treniravaŭsia paśla traŭmy.
Nu, a «inšaje» ź im adbyłosia 23 sakavika. U toj čaćvier kamanda pravodziła treniroŭku na stadyjonie FK «Minsk» na Majakoŭskaha. U niejki momant na treniroŭku zajavilisia niejkija ludzi ŭ formie. Treniroŭka była spynienaja, i ŭsie stali śviedkami zatrymańnia hulca. Nijakich abvinavačańniaŭ Łukaševiču prosta tam vystaŭlena nie było, dy i abyšłosia biez hvałtu ŭ prysutnaści vidavočcaŭ — zatrymańnie prajšło spakojna. Hulca, jaki nie akazvaŭ nijakaha supracivu, paviali sa stadyjona.
Niekatoryja adrazu nie zrazumieli, što zdaryłasia. Ludzi mierkavali, što heta niejki rozyhryš, prank, bo niaviesta Cimafieja Kaciaryna pracuje supracoŭničała z kampanijaj «Impieryja kvestaŭ» (spačatku navat pisali, što jana tam dyrektarka, ale akazałasia, što heta nie tak). Zabaŭlalnyja prajekty kampanii aryjentavanyja na praviadzieńnie vyjaznych kvestaŭ. Žanry prapanujucca zusim roznyja: kryminalnyja bajeviki, mistyka, trylery, chorary, fantastyka, pryhody. Pra pracu Kaciaryny viedali i partniory Łukaševiča pa kamandzie, tamu i padumali, što źjaŭlajucca śviedkami čarhovaha kvestu, jaki arhanizavali Kaciaryna i jaje kalehi.
Adnak sumnievy raźviejalisia, kali hulcy daviedalisia, što razam z Łukaševičam zatrymanaja i jaho niaviesta (praŭda, dzie heta adbyłosia, nieviadoma). Nu a zatym abaim prysudzili da 10 sutak administracyjnaha aryštu (što pradjavili pary, my nie viedajem). Na nastupny dzień paśla zatrymańnia Kaciarynie spoŭniłasia 26 hadoŭ.
Sacyjalnyja sietki i Kaciaryny, i Cimafieja maŭčać užo niekalki dzion. Naprykład, futbalist zachodziŭ va «UKantakcie» piać dzion tamu, jaho niaviesta — šeść.
Što havorać u kłubie i «Impieryi kvestaŭ»?
Ad imia zacikaŭlenych klijentaŭ telekanał «O, sport! Ty — mir!» źviazaŭsia z kampanijaj «Impieryja kvestaŭ» i pasprabavaŭ vyśvietlić, ci možna pahutaryć z Kaciarynaj. Adnak pa vajbiery nichto nie adkazaŭ. U miesiendžary vyśviečvajecca, što abanient apošni raz byŭ anłajn 24 sakavika (na nastupny dzień paśla zatrymańnia Cimafieja i Kaciaryny). Zastalisia niepračytanymi paviedamleńni i ŭ instahramie, i va «UKantakcie».
Telehram-kanał «O, sport! Ty — mir!» źviazaŭsia taksama z dyrektaram «Maksłajna» Andrejem Ivanienkam, kab daviedacca pra stan traŭmavanych hulcoŭ, jakija prapuskali matč z BATE, a taksama pra pryčyny adsutnaści ŭ zajaŭcy Łukaševiča.
Cimafiej Łukaševič, pa słovach Ivanienki, udaryŭ halonkastupniovy sustaŭ i vybyŭ na dva tydni. Na pytańnie, čamu tady paŭabaronca ŭniesieny nie ŭ śpis traŭmavanych, a jaho adsutnaść u matčy z BATE tłumačyć niešta «inšaje», funkcyjanier adkazaŭ, što, «akramia traŭmy, jon [Łukaševič] adsutničaŭ na hulni jašče i pa asabistych pryčynach».
«Źbierahčy dziaciej ad straty zroku, nastupnaha suicydu». Novy staršynia ABFF raskazaŭ, što źbirajecca rabić ź biełaruskim futbołam
Kamanda zasłužyła pa spartyŭnym pryncypie hulać u vyšejšaj lizie, ale nie zmoža
U vyšejšuju futbolnuju lihu prabiłasia kamanda z Rahačova z nazvaj jak u bukmiekierskaj kantory
Kamientary