Dzie ciapier Vadzim Dzieviatoŭski, były lohkaatlet i deputat, jaki ŭ 2020-m trapiŭ na Akreścina
Dzieviatoŭski viarnuŭsia ŭ sport, ale zusim nie ŭ toj kirunak, piša «Trybuna».
Čym zapomniŭsia ŭ lohkaj atletycy i jak ź jaje syšoŭ?
Sportu Dzieviatoŭski addaŭ 35 hadoŭ. Uradženiec Navapołacka pačaŭ zajmacca ŭ siem, pryčym adrazu skancentravaŭsia na kidańni mołata. Za try dziasiatki hadoŭ u hetaj dyscyplinie dasiahnuŭ amal usiaho, u tym liku traplaŭ i ŭ skandały z dopinham. U pasłužnym śpisie — zołata čempijanatu śvietu — 2005, srebra čempijanatu Jeŭropy — 2006. Na ŭnutranaj arenie novapałačanin stanaviŭsia čempijonam krainy, atrymaŭ zvańnie zasłužanaha majstra sportu. Paralelna sa sportam ličyŭsia spartyŭnym instruktaram u vajskovaj čaści MUS Łukašenki.
Nu, a samyja hučnyja padziei z udziełam Dzieviatoŭskaha źviazanyja z Alimpijskimi hulniami.
Pa vynikach Alimpijady-2000 u Sidnei lohkaatlet atrymaŭ dvuchhadovuju dyskvalifikacyju za ŭžyvańnie nandrałonu. U 2004-m biełarus zaniaŭ na afinskich AH čaćviortaje miesca, a praz čatyry hady ŭ Piekinie staŭ druhim, ale amal adrazu razam ź Ivanam Cichanam, bronzavym pryzioram Hulniaŭ-2008, atrymaŭ abvinavačańni va ŭžyvańni dopinhu — u spartsmienaŭ byŭ pavyšany testasteron. Rašeńniem MAK pradstaŭniki Biełarusi byli pazbaŭlenyja ŭznaharod i padvierhnutyja dyskvalifikacyi, ale ŭ sudzie jany dakazali, što pracedura zaboru dopinh-proby adbyłasia z parušeńniami — i heta dazvoliła dakazać svaju nievinavataść.
Dzieviatoŭski jašče niejki čas paśla hetaha vystupaŭ biez pośpiechaŭ na mižnarodnaj arenie, a paśla pajšoŭ na piensiju praz prablemy sa śpinaj.
Adrazu paśla zakančeńnia karjery Dzieviatoŭski staŭ deputatam Pałaty pradstaŭnikoŭ, a jašče spartsmien uznačaliŭ u Navapołacku haradskuju arhanizacyju «Biełaj Rusi».
Były lohkaatlet nikoli nie chavaŭ stanoŭčaha staŭleńnia da Łukašenki. Kazaŭ pra heta ŭ presie, pisaŭ u svaich pastach u Instagram. Pierad vybarami 2020-ha zaklikaŭ hałasavać za Łukašenku, adznačajučy, jak šmat toj zrabiŭ dla krainy.
Ź vieraśnia 2014-ha Dzieviatoŭski zajmaŭ pasadu staršyni Fiederacyi lohkaj atletyki i, na dumku mnohich spartsmienaŭ, byŭ efiektyŭny na hetaj pazicyi.
U 2020-m žyćcio Dzieviatoŭskaha kardynalna źmianiłasia. Vadzim, jak i jaho brat Aleh, na toj momant hienieralny sakratar Biełaruskaj fiederacyi vadnałyžnaha sportu, u žniŭni byŭ schopleny siłavikami (choć jany prosta siadzieli ŭ kaviarni ŭ centry Minska) i apynuŭsia na Akreścina. U Vadzima Dzieviatoŭskaha zdaryŭsia niervovy zryŭ, ź jakim funkcyjanier trapiŭ u RNPC psichičnaha zdaroŭja.
24 vieraśnia Dzieviatoŭski ŭpieršyniu paśla hučnaj zajavy źjaviŭsia na publicy: pryjechaŭ na pazačarhovuju kanfierencyju BFŁA, dzie novym staršynioj fiederacyi staŭ aktyŭny prychilnik Łukašenki Cichan.
U 2021-m akunuŭsia ŭ holf, dasiahnuŭ niadrennych vynikaŭ i pryciahnuŭ da jaho syna
Da peŭnaha času pra žyćcio Dzieviatoŭskaha ničoha nie było viadoma. U červieni 2021-ha hetuju tajamnicu raskryŭ sam funkcyjanier. U Instagram jon paviedamiŭ, što viartajecca ŭ sport jak atlet — praŭda, nie ŭ lohkuju atletyku, a ŭ holf. Dzieviatoŭski staŭ udzielnikam sieryi turniraŭ siezona-2021 u holf-kłubie «Minsk».
Holf dla Dzieviatoŭskaha — sport nie novy. Pa słovach byłoha lohkaatleta, u 2005-m jon tydzień haściavaŭ u siabra ŭ Japonii, u horadzie ź vialikaj kolkaściu placovak dla adpracoŭki ŭdaraŭ pa miačy. Na hetych nievialikich učastkach biez pola, ale ź sietkavaj aharodžaj nielha prasačyć dalokaść palotu miača, ale možna pastavić udar. I voś tam Dzieviatoŭski ŭpieršyniu prykłaŭsia kluškaj da miača.
«U mianie lohka atrymałasia, tamu što technika z majho prafiesijnaha sportu dastasavalnaja i da holfa, — tłumačyŭ były lohkaatlet. — Mnie mołat, viadoma, daŭ šmat čaho: svaboda ŭdaru praź sistemu, praz nohi. Voś tolki sa stojkaj jašče treba papracavać. Ale znoŭ ža, kali niama pačućcia snarada, pačućcia rytmu, to budzie ciažka. Kali jość hetyja pačućci, ale nie možaš dać rady svaim emocyjam, psichuješ paśla kožnaha ŭdaru, to ŭ holfie tabie rabić taksama niama čaho.
Siońnia za plačami eks-lohkaatleta niamała turniraŭ, u tym liku i takich, dzie jon braŭ uznaharody. Uletku 2020-ha Dzieviatoŭski zaniaŭ druhoje miesca ŭ svajoj padhrupie na spabornictvach TIME TO GOLF — 2020 u Minsku. Praz hod tam ža byŭ užo trecim u ahulnym zaliku.
U 2022-m novapałačanin braŭ udzieł u čempijanacie Maskoŭskaj vobłaści, praŭda, ad vysokich pazicyj byŭ daloki (55-y siarod 74-ch halfistaŭ). Taksama ŭ minułym hodzie Dzieviatoŭski jeździŭ na fiestyval intelektualnych vidaŭ sportu «Mocnyja fihury» — turnir pa holfie, jaki ŭklučała prahrama fiestyvalu, prajšoŭ u holf-kłubie Moscow Country Club. Dzieviatoŭski byŭ pryznany najlepšym hulcom spabornictvaŭ i atrymaŭ śpiecyjalny pryz ad arhanizataraŭ i Minsporta Maskoŭskaj vobłaści. Biełarus vystupaŭ za zbornuju śvietu (byŭ adzinym ad Biełarusi), jakaja ŭ vyniku sastupiła zbornaj Rasii.
Novapałačanin nastolki pahruziŭsia ŭ holf, što staŭ ambasadoram holf-kłuba «Minsk». Takaja ciesnaja supraca pačałasia jašče ŭ pieršaj pałovie 2021-ha, a ŭ pačatku 2022-ha holf-kłub abviaściŭ, što Dzieviatoŭski zastaniecca ambasadoram jašče na dva hady.
Pa šlachu baćki idzie syn Vadzima Dzieviatoŭskaha Leŭ. Uviesnu 2022-ha jon staŭ pieramožcam ChilDay Tournament ad usio taho ž holf-kłuba «Minsk».
Z 1 lipienia 2022-ha «Minsk» uvioŭ pasłuhu «Znajomstva z holfam z ambasadoram». Kali prostymi słovami, havorka idzie abo pra indyvidualnyja, abo pra hrupavyja treniroŭki z mahčymaj ekskursijaj pa kłubie. Praciahłaść zaniatkaŭ — da dźviuch hadzin, košt — da 135 rubloŭ u zaležnaści ad kolkaści ŭdzielnikaŭ.
Siońnia Dzieviatoŭski vystupaje i arhanizataram roznych turniraŭ. Naprykład, turniru BMW Happy Mulligan Day ci adkrytaha čempijanatu Biełarusi pa holfie.
Jon zaŭsiodnik uračystych mierapryjemstvaŭ, što źviazanyja z holfam. Naprykład, niekalki hadoŭ zapar udzielničaŭ u padviadzieńni vynikaŭ siezona ŭ holf-kłubie «Minsk» i ŭznaharodžańni najlepšych halfistaŭ Biełarusi.
Što da lohkaj atletyki, to, pavodle źviestak «Trybuny», da jaje ŭžo 46-hadovy alimpijski pryzior dačynieńnia nie maje. Jak zapeŭnivajuć ludzi, jakija viedajuć funkcyjaniera, jon nijak, navat niefarmalna, nie źviazany ni ź fiederacyjaj, ni z treniroŭkami atletaŭ — navat nie kansultuje na siabroŭskaj asnovie.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1010
Kamientary