Неўзабаве апублікуюць 30 унікальных фота Янкі Купалы, сярод якіх здымак з маці
30 забытых фотаздымкаў Янкі Купалы з даваеннага друку, у тым ліку здымак паэта, калі яму было ўсяго два гады, будуць апублікаваныя ў Беларусі. Часопіс «Роднае слова», анансуючы падпіску на наступнае паўгоддзе, паабяцаў апублікаваць унікальныя фота ў ліпеньскім нумары, піша «Камсамольская праўда».
28.06.2023 / 18:31
Янка Купала за працоўным сталом — рэдкі здымак аўтарства І. Каплінскага, пра які не згадвалі больш за восемдзесят гадоў
Як вядома, дом Янкі Купалы згарэў разам з усім архівам і велізарнай бібліятэкай у дваццаць тысяч кніг ужо на трэці дзень вайны. Таму фотаздымкаў Купалы засталося мала. Затое некаторыя здымкі можна адшукаць у газетах і часопісах даваеннага часу. Што і зрабіў даследчык беларускай літаратуры Сяргей Шапран, адабраўшы 30 унікальных кадраў з жыцця песняра.
Даследаванне Шапрана «У пошуках беззваротна страчанага. Невядомыя фатаграфіі Янкі Купалы і ягоных бацькоў, пра якія забыліся на цэлае стагоддзе» якраз і збіраецца апублікаваць у ліпені часопіс «Роднае слова».
Пры гэтым адзін са здымкаў абяцае стаць сапраўднай сенсацыяй: на ім маленькі будучы паэт выяўлены ва ўзросце двух гадоў разам з сястрой і бацькамі.
Да гэтага часу лічылася, што фота бацькі паэта Дамініка Ануфрыевіча не захавалася — ягонае аблічча было вядомае толькі па малюнках пляменніка Купалы. Ды і фота самога паэта існавала да сённяшняга часу толькі адно і ў 6-гадовым узросце.
Не было вядома і фотаздымкаў Купалы з маці. А цяпер будуць апублікаваныя не толькі здымкі паэта разам з Бенігнай Іванаўнай, але і невядомыя кадры з Якубам Коласам і Барысам Пастэрнакам.
Таксама даследчык знайшоў унікальнае фота паэта за працоўным сталом — рэдкі здымак аўтарства І. Каплінскага, пра які не ўспаміналі больш за восемдзесят гадоў.
Чытайце таксама:
Двайнік Купалы ў Вене — гісторыя адной карціны
На гістфаку БДУ знішчылі пано з выявай Каліноўскага
«Сапраўдны цуд». Выпадкова знайшоўся невядомы верш Барадуліна