На пасольстве Беларусі ў Нідэрландах напісалі «Лука тэрарыст» і разбілі шыбы
Напад на дыппрадстаўніцтва адбыўся сёння ўначы.
02.07.2023 / 12:00
Паліцыя фіксуе разбурэнні дыпламатычнага будынку. Фота Regio15
У будынку на вуліцы Groot Hertoginnelaan пабітыя тры шыбы і з'явіліся надпісы, сярод якіх чорным «Лука тэрарыст», паведамляе нідэрландскае выданне Omroep West.
Акрамя таго, невядомыя напісалі па-беларуску чырвоным «Жыве Беларусь!» і «Жыве вечна!» — слоганы беларускага вызваленчага руху.
Нідэрландскія выданні тлумачаць, што «Лукой» у народзе называюць кіраўніка Беларусі.
Паведамляецца, што па падазрэнні ва ўчыненні гэтага акту вандалізму затрыманы 31-гадовы мужчына.
Дэпутат нідэрландскага парламента С'ёрд С'ёрдсма асудзіў гэты напад на пасольства. «Няважна, наколькі вы абураныя і справядліва абураныя рэжымамі Беларусі, Расіі ды іншых краін, не нападайце на іх пасольствы ці рэзідэнцыі, — напісаў ён у Твітары. — Гэта нічога не дае, затое пагаршае бяпеку нашых дыпламатаў у гэтых краінах».
Нідэрландскія выданні нагадваюць, што Аляксандр Лукашэнка — блізкі саюзнік Уладзміра Пуціна, у тым ліку ў крывавай вайне ва Украіне, на якой загінулі дзясяткі тысяч людзей.
У самой Беларусі працягваюцца масавыя палітычныя рэпрэсіі. Яны пачаліся з 2020 года, калі Аляксандр Лукашэнка, мяркуючы па звестках з участкаў, дзе выбарчыя камісіі дазволілі назіральнікам сачыць за падлікам галасоў, прайграў Святлане Ціханоўскай, але не аддаў уладу.
З 2022 года, пасля нападу Расіі на Украіну, беларусаў пачалі пераследаваць і за антываенныя выказванні або сімпатыі да Украіны.
За гэты час у краіне адбылося не менш за 50 тысяч палітычна матываваных затрыманняў, заведзена не менш за 12 тысяч палітычна-крымінальных спраў і адкінутыя нават самыя базавыя нормы законнасці і маралі. Дзясяткі тысяч людзей вымушаныя былі пакінуць краіну, ратуючыся ад рэпрэсій.