Čarhovaja chvala zatrymańniaŭ ludziej, jakich vinavaciać u rehistracyi ŭ płanie «Pieramoha». Siłaviki sprabujuć pierakanać u źlivie, ale jość niuans
HUBAZiK vinavacić u «źlivie» źviestak pra ŭdzielnikaŭ płana «Pieramoha» pradstaŭnikoŭ «Biełpoła»: maŭlaŭ, jany vyrašyli nasalić Azaravu. Ale tyja nikoli nie mieli da ich dostupu.
05.08.2023 / 16:49
Za ŭčora i siońnia vyjšła bolš za dziasiatak videa z zatrymanymi nibyta za ŭdzieł u płanie «Pieramoha».
HUBAZiK śćviardžaje, što źviestki im «źliŭ» Maćviej Kuprejčyk, adzin z kiraŭnikoŭ arhanizacyi «Biełpoł», jakaja ŭtvaryłasia paśla raskołu «Bajpoła».
Ale reč u tym, što źviestak z płana «Pieramoha» ŭ jaho nikoli nie było: jany całkam zastalisia ŭ «Bajpole» na čale z Alaksandram Azaravym.
«Heta tryźnieńnie. Dostupu da płana «Pieramoha» «Biełpoł» i jahonyja supracoŭniki nikoli nie mieli. Heta śpiecyjalny ŭkid łukašystaŭ dziela taho, kab stvaryć jašče bolš nieparazumieńniaŭ i pasvaryć ludziej», — raskazali nam pradstaŭniki «Biełpoła».
Adkazaŭ i Alaksandr Azaraŭ: «Heta čarhovaja sproba śpiecsłužbaŭ skampramietavać mianie i płan «Pieramoha» pierad słuchańniami ŭ Kaardynacyjnaj radzie (jana ciapier zasłuchoŭvaje spravazdačy pradstaŭnikoŭ Abjadnanaha pierachodnaha kabinieta. — «NN»). Infarmacyja z bota płana «Pieramoha» ŭ biaśpiecy, jak i raniej».
Dyk chto tady zatrymanyja? Miarkujučy pa videa, heta nijak nie źviazanyja miž saboj ludzi. Imavierna, niekatoryja ź ich pisali ŭ fejkavy čat-bot płana «Pieramoha».
Hubazikaŭcy zmušajuć ich abražać Alaksandra Azarava i pryznavacca ŭ rehistracyi ŭ «Pieramozie». U praŭładnych kanałach «razhaniajuć», što źviestki pra zatrymanych pieradaŭ «Biełpoł». Admietna taksama, što adno videa było zahružana 31 lipienia, a paśla «pierazalita» — heta značyć, što HUBAZiK admysłova nazapašvaŭ videa na niekalki dzion.
Takim čynam, heta vyhladaje, jak spłanavany ŭkid śpiecsłužbaŭ, nakiravany na dyskredytacyju abodvuch abjadnańniaŭ byłych siłavikoŭ, a taksama Abjadnanaha pierachodnaha kabinieta.
Čytajcie taksama:
Azaraŭ patłumačyŭ, što adbyvajecca sa źviestkami z płana «Pieramoha»
Try prostyja parady, kab nie natrapić na fejkavyja inicyjatyvy ŭ Telegram
Jak HUBAZiK stvaraje fejkavyja pierapiski z fejkavymi ŭdzielnikami płana «Pieramoha»