«Ja navat hanarusia imi». Azaraŭ patłumačyŭ, adkul u jaho jubilejny miedal vajskovaj raźviedki
Pradstaŭnik Pierachodnaha kabinieta pa adnaŭleńni pravaparadku Alaksandr Azaraŭ atrymaŭ pamiatny nahrudny znak «Vajskovaja raźviedka Respubliki Biełaruś. 95 hadoŭ» u ramkach abmienu padarunkami pamiž siłavymi viedamstvami. Pra heta jon raspavioŭ Reform.by.
Na miedal źviarnuli ŭvahu telehram-kanały, jakija śpiecyjalizujucca na dyskredytacyi dziejačaŭ demakratyčnaj supolnaści Biełarusi.
«U MUS była takaja tradycyja — dva razy na hod u Dzień milicyi i Dzień utvareńnia padraździaleńniaŭ pa baraćbie z arhanizavanaj złačynnaściu i karupcyjaj — supracoŭnikaŭ HUBAZiKa źbirali i ŭručali pamiatnyja padarunki. Nam prynosili roznyja butaforskija miedali: u pamiać zakančeńnia vajny ŭ Afhanistanie, jubilejnyja znački KDB, armii, mytni. Potym kiraŭnik HUBAZiKa raźmiarkoŭvaŭ ich siarod padnačalenych. Mnohija nie chacieli ich brać, bo nu jakaja vajna ŭ Afhanistanie. U adzin z takich dzion mnie i ŭručyli nahrudny znak z nahody jubileju vajskovaj raźviedki», — tłumačyć Azaraŭ.
Reform.by nie ŭdałosia znajści hety pamiatny znak u Dziaržaŭnym hieraldyčnym rehistry. Tam aficyjna zarehistravany anałahičnyja miedali tolki na 90– i 100-hadovy jubilei vajskovaj raźviedki.
Azaraŭ nahadaŭ, što fota kiciela ź miedalami apublikavaŭ jon sam i nie chavaje hetaha.
«U mianie jość i sapraŭdnyja dziaržaŭnyja ŭznaharody. Ja hetaha nie chavaju i navat hanarusia imi», — udakładniŭ jon.
Azaraŭ nie zmoh uspomnić, kali atrymaŭ pamiatny znak, ale paabiacaŭ pahladzieć dakumienty paźniej.
Fota kiciela ź miedalami stała asnovaj dla «rasśledavańnia» adnaho z telehram-kanałaŭ. U 45-staronkavym tekście Azaraŭ abvinavačvajecca ŭ pracy na HRU Hienštaba Minabarony i sprobie kampramietavać demakratyčny ruch. Pa sutnaści, usio «rasśledavańnie» budujecca na nahrudnym znaku. Astatniaje — hałasłoŭnyja abvinavačvańni i śviedčańni ananimnych krynic. Jość jašče adzin «dakumient», apublikavany ŭ «rasśledavańni» — nibyta daviedka-abjektyŭka z apošniaha miesca słužby A. Azarava ŭ MUS Biełarusi. Heta fotakopija troch listoŭ mašynapisnaha tekstu biez dadatkovych danych i podpisaŭ. Sapraŭdnaść «dakumienta» paćvierdzić niemahčyma. U im pieraličany miescy słužby Azarava, a taksama zapis ab tym, što z 10.2018 pa 07.2019 jon nibyta znachodziŭsia ŭ rasparadžeńni ministra abarony Respubliki Biełaruś.
«U hety čas ja byŭ načalnikam 3-ha adździeła 10-ha ŭpraŭleńnia HUBAZiKa», — koratka adkazaŭ Azaraŭ na pytańnie ab 2018-m i 2019-m hadach.
46-hadovy Alaksandr Azaraŭ — pradstaŭnik abjadnańnia byłych biełaruskich siłavikoŭ «Bajpoł» (arhanizacyja niadaŭna raskałołasia na dźvie). U minułym uznačalvaŭ 3-je ŭpraŭleńnie HUBAZiKa pa supraćdziejańni narkahandlu i handlu ludźmi, padpałkoŭnik milicyi. Paśla adychodu z hetaha miesca słužby byŭ vykładčykam u Akademii MUS. Adtul zvolniŭsia paśla 9 žniŭnia 2020 hoda, jak sam kazaŭ, uzrušany hvałtam z boku siłavikoŭ nad pratestoŭcami.
Źjaŭlajecca pradstaŭnikom stvoranaha Śviatłanaj Cichanoŭskaj Abjadnanaha pierachodnaha kabinieta pa adnaŭleńni pravaparadku.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary