Спартыўныя чыноўнікі: Пасля Гульняў СНД чакаем новага міністра — Юрыя Караева 

Як паведамляюць «Нашай Ніве» чыноўнікі ад спорту, у ведамстве абмяркоўваюць магчымую асобу новага міністра, які мае змяніць Сяргея Кавальчука на пасадзе. Палкоўніка па чутках заменіць генерал-лейтэнант.

09.08.2023 / 13:48

«Чакаем, што будзе новы міністр. Рыхтуемся да Караева», «Што Караеў будзе, то чулі. Ну а што? Палкоўніка на генерала памяняем, можа, сфера рване наперад», — такія паведамленні «Наша Ніва» атрымала ад чыноўнікаў сярэдняга звяна, якія ўзначальваюць арганізацыі, падпарадкаваныя Мінспорту. 

Людзі гавораць, што Гульні СНД, з якіх прапаганда насуперак рэальнасці лепіць спартовую звышпадзею, — могуць стаць лебядзінай песняй міністра Сяргея Кавальчука, былога начальніка ў структуры Службы аховы Лукашэнкі, палкоўніка. 

На сваёй пасадзе Кавальчук з 2018 года. На старце ягонай кадэнцыі Беларусь прыняла II Еўрапейскія гульні, а на заканчэнні — Гульні СНД, дзе паміж сабой спаборнічаюць у тым ліку атлеты, якія не маюць нават дарослых спартовых разрадаў. А Беларусь выкінутая з большасці міжнародных спаборніцтваў у выніку ўнутраных рэпрэсій і саўдзелу ў вайне супраць Украіны. 

Міністру асабліва няма чым хваліцца, апроч як цвёрдым прытрымліваннем генеральнай лініі ў частцы рэпрэсій і ганенняў. 

Меркаваны новы міністр, якога чакаюць у спартовай сферы, — выхадзец з сілавой структуры, якому далі дакрануцца да эканомікі на пасадзе памочніка Лукашэнкі (Караеў адказваў за Гродзенскую вобласць). 

Сышоўшы з пасады кіраўніка МУС, Караеў не спыняў таксама і сваіх адносін са спортам, узначальваючы Федэрацыю тайскага бокса. Магчыма, не лішнім будзе нагадваць, што пры Караеве склад гэтай федэрацыі быў моцна зачышчаны. 

Чытайце таксама:

Караеў патлумачыў, чаму «балота» лепшае, чым тое, чаго хацелі беларусы ў 2020-м

«Кодэкс гонару камуністаў спісаны з біблейскіх запаветаў». Караеў пахваліў сталінскія часы

Як склаўся лёс сілавікоў, што душылі народ у 2020 годзе

Nashaniva.com