U Mahilovie sudziać dvuch daktaroŭ pa «spravie artapiedaŭ». Adzin ź ich vučyŭ syna byłoha ministra achovy zdaroŭja
Padsudnyja — aŭtarytetnyja i vysokakvalifikavanyja daktary: Aleh Abialevič i Aleh Sarnacki. Abodvuch bolš za miesiac utrymlivali ŭ śledčym izalatary, a pa vyzvaleńni pazbavili pasad zahadčykaŭ adździaleńniaŭ.
23.09.2023 / 10:39
Aleh Abialevič (źleva) i Aleh Sarnacki (sprava). Fota: mogilevnews.by, belarusinfo.by
Spravu Abialeviča razhladaje sud Leninskaha rajona Mahilova. Miedyku inkryminujuć «niezakonnaje ŭznaharodžańnie» (2 i 3 častku 433 artykuła Kryminalnaha kodeksa).
Heta abvinavačvańnie vystaŭlajecca dziaržaŭnym słužboŭcam, jakija za svaju vykananuju pracu atrymlivali padziaku majomasnaha charaktaru. Padsudnamu pahražaje da 8 hadoŭ źniavoleńnia. Što stała nahodaj dla kryminalnaha pieraśledu miedyka, pakul nieviadoma.
Aleha Abialeviča, zahadčyka traŭmatałahičnaha adździaleńnia Mahiloŭskaj abłasnoj balnicy, supracoŭniki KDB zatrymali ŭ kancy sakavika 2022 hoda.
Bolš za miesiac jaho ŭtrymlivali ŭ śledčym izalatary, a pa vyzvaleńni adpravili šarahovym traŭmatołaham u haradskuju balnicu chutkaj dapamohi.
U mai 2022 hoda Abialevič akazaŭsia siarod miedykaŭ, jakim Łukašenka vykazaŭ padziaku «za šmathadovuju pracu, prafiesijanalizm i asabisty ŭkład u akazańnie mieddapamohi nasielnictvu».
Aleh Abialevič — doktar traŭmatołah-artapied najvyšejšaj katehoryi. Traŭmatałohijaj Mahiloŭskaj abłasnoj balnicy jon kiravaŭ niekalki dziasiatkaŭ hadoŭ. Byŭ aŭtaram inavacyjnych mietadaŭ praviadzieńnia apieracyj pa zamienie sustavaŭ i reabilitacyi pacyjentaŭ.
Anton Małaška (źleva) i zahadčyk traŭmatałahičnaha adździaleńnia Mahiloŭskaj abłasnoj balnicy Aleh Abialevič (sprava). Fota: mogilevnews.by.
Siarod jaho vučniaŭ byŭ syn byłoha ministra achovy zdaroŭja, a ciapier namieśnika staršyni Mahiloŭskaha abłvykankama Valeryja Małaški — Anton Małaška.
U paniadziełak, 18 vieraśnia, Abialevič nie vyjšaŭ na pracu. Toje, u čym vinavaciać Abialeviča kalehi nazyvajuć absurdam. Jany charaktaryzujuć jaho jak ščyraha čałavieka i vysokakvalifikavanaha śpiecyjalista.
Pavodle ich, 19 vieraśnia pačali sudzić i Aleha Sarnackaha. Sprava razhladajecca Kastryčnickim sudom Mahilova. Što jamu inkryminujuć, im nieviadoma.
57-hadovaha Aleha Sarnackaha, jak i Abialeviča, zatrymali letaś u sakaviku. Tady jon byŭ zahadčykam artapiedyčnaha adździaleńnia Mahiloŭskaj balnicy №1. Na hetu pasadu jaho pryznačyli ŭ kastryčniku 2012 hoda.
Aleh Sarnacki. Fota: belarusinfo.by
Pa vyzvaleńni sa śledčaha izalatara Sarnackaha adpravili šarahovym traŭmatołaham u Mahiloŭskuju abłasnuju balnicu.
Letaś u kancy sakavika pa krainie było zatrymana 35 traŭmatołahaŭ. Bolšaść ź ich byli kiraŭnikami traŭmatałahičnych adździaleńniaŭ. Za kratami apynulisia taksama pradstaŭniki piaci kamiercyjnych arhanizacyjaŭ.
Usich vinavacili ŭ atrymańni chabaru za łabiravańnie nabyćcia endapratezaŭ u zamiežnych vytvorcaŭ, a taksama ŭ niezakonnym hrašovym uznaharodžańni.
Kab vyjści na volu, zatrymanyja mielisia pryznać vinu, kratna spłacić naniesienuju škodu i pahadzicca pracavać tam, dzie skaža ministr achovy zdaroŭja.
U krasaviku bolšaść miedykaŭ była vyzvalena. Niekatoryja vymušana stali pradavać majomaść, kab raźličycca.
«Sprava artapiedaŭ» vyrasła z taho, što endapratezavańnie pravodzicca na padstavie čarhi, jakaja ŭžo niepamierna raściahnułasia i, u asobnych vypadkach, pieravyšaje 5 hadoŭ čakańnia. Sami pratezy, jakija dziaržava zakuplaje vializnymi partyjami, nie zaŭsiody adpaviadajuć patrabavańniam pacyjenta.
Jany ŭ čakańni apieracyi šukajuć alternatyŭnyja varyjanty, i im prapanoŭvajuć pazačarhovaje endapratezavańnie, ale z umovaj nabyćcia prateza za ŭłasnyja hrošy, a nabyć možna ź nievialikaha pieraliku varyjantaŭ, jakija akurat i pastaŭlajucca ŭ Biełaruś tolki pryvatnymi firmami.
Pavodle biełaruskaha rasśledavalnickaha centra, sprava suprać artapiedaŭ mahła być raspačataja ź inicyjatyvy pryvatnaj kliniki «Miersi», jakuju źviazvajuć ź siamjoj Viktara Łukašenki.
Hladzicie taksama:
Što ciapier z čerhami na endapratezavańnie? Voś što adkazali ŭ Minzdaroŭja
Biełaruskija dziaržkliniki znoŭ staviać impartnyja pratezy. Ale dziaržava ŭsio zabrała ŭ svaje ruki