Słovazłučeńnie «Połk Kalinoŭskaha» pryznali ekstremisckim. Ciapier jaho niamožna pisać i vymaŭlać?
U abnoŭleny śpis ekstremisckich materyjałaŭ unieśli słovazłučeńnie «Połk Kalinoŭskaha», pa-biełarusku. A što, kali pisać jaho pa-rusku? Ci zhadvać, kali krytykuješ? Pramaŭlać taksama niamožna? Kamientuje juryst pravaabarončaha centra «Viasna» Pavieł Sapiełka.
25.10.2023 / 19:55
«Da hetaj struktury ŭłady daŭno stavilisia nieabyjakava, jana daŭno była pad udaram: telehram-kanał «Połk Kalinoŭskaha» byŭ pryznany ekstremisckimi materyjałami Barysaŭskim rajonnym sudom jašče ŭ krasaviku hetaha hoda, akaŭnt u instahramie z nazvaj «Połk Kalinoŭskaha» sud Zavodskaha rajona Minska pryznaŭ ekstremisckaj pradukcyjaj sioleta ŭ červieni.
Raniej u śpisie ekstremisckich materyjałaŭ paviedamlałasia, jakaja struktura inicyjavała sudovyja raźbiralnictvy, ciapier takich źviestak niama. Ale zajmajucca hetym ci to MUS, ci to KDB.
19 kastryčnika sud Centralnaha rajona Minska ŭklučyŭ u śpis jašče niekalki elektronnych resursaŭ i dziŭnuju katehoryju «vizualny materyjał, tekst «Polk Kalinouskaha», «Połk Kalinoŭskaha». Jak za jaho vykarystańnie buduć karać, skazać składana, ale meta — vidavočnaja», — razvažaje Pavieł Sapiełka.
Pavieł Sapiełka. Fota: spring96.org
Juryst ličyć, što meta takich abmiežavańniaŭ — pazbavicca ad lubych zhadak pra połk Kastusia Kalinoŭskaha.
«Ciažka sprahnazavać, jak heta ŭsio budzie prymianiacca. Napeŭna, roŭna ŭ takoj stupieni, u jakoj budzie patreba ŭ praviadzieńni represij. U Biełarusi ni ŭłady, ni siłaviki daŭno nie analizujuć niešta z pazicyi racyjanalnaści.
Možna vyjści na płošču z płakatam «Ja za dyktaturu!» i «Ja suprać dyktatury!», i ŭ abodvuch vypadkach čałaviek budzie pakarany, kali jon nie išoŭ u kałonie na sankcyjanavanym uładami mierapryjemstvie».
Toje, što ŭ śpisie ekstremisckich materyjałaŭ niama vyrazu «Połk Kalinovskoho» pa-rusku, spadar Sapiełka biarecca patłumačyć chiba tym, što na ruskaj movie jaho treba budzie ŭžyvać u sudovych pastanovach. Abo ŭ dziaržaŭnych ŚMI, jakija śviadoma paźbiahajuć užyvańnia biełaruskaj movy. Što tyčycca taho, ci buduć karać za vymaŭleńnie hetaha słovazłučeńnia ŭhołas, to juryst «Viasny» vymušany kanstatavać, što heta možna budzie pravieryć tolki na praktycy, i toje nie dakładna:
«Źviestki pra sudy pa art. 19.11 KaAP možna atrymać tolki z aficyjnych krynic, heta dastatkova zakrytaja infarmacyja. Zajmacca manitorynham takich sudovych pracesaŭ davoli ciažka, bo i sami ludzi niačasta raspaviadajuć padrabiaznaści svaich «ekstremisckich» spraŭ. Ale vidavočna adno: dziaržava choča vyklučyć temu pałka Kalinoŭskaha ŭ lubych prajavach. I niavažna, ci heta abmierkavańnie vartaściaŭ bajcoŭ, jakija vajujuć va Ukrainie ciapier, ci heta płany nastupnych krokaŭ padraździaleńnia paśla skančeńnia vajny».
Čytajcie taksama:
«Kolkaść ničoha nie vyznačaje». Sachaščyk vyklučyŭ scenar hramadzianskaj vajny
Zahinułaha biełaruskaha vajara pachavajuć u Ivana-Frankoŭskaj vobłaści