«Bitłz» anansavaŭ vychad svajoj «apošniaj pieśni» i abnaŭleńnie starych albomaŭ
Na aficyjnaj internet-staroncy suśvietna viadomaha brytanskaha rok-hurta «Bitłz» źjaviŭsia anons vychadu jaho apošniaj pieśni pad nazvaj Now and Then («Ciapier i tady»). Jana stanie dastupnaja dla ŭsich užo 2 listapada.
26.10.2023 / 19:45
Brytanski kultavy rok-hurt «Bitłz», 1964 hod. Fota: United Archives / Contributor Getty Images
«Now And Then — heta apošniaja pieśnia «Bitłz», jakuju napisaŭ Džon Lenan u suaŭtarstvie z Połam Mak-Kartni, Džordžam Charysanam i Rynha Staram. Dziakujučy Połu i Rynha, hetaja pieśnia narešcie ŭbačyć śviet paśla bolš za čatyry dziesiacihodździ.
Data vychadu novaha treka — 2 listapada ŭ 14:00 pa Hrynviču (17:00 pa Minsku. — NN). Videaklip da pieśni vyjdzie na nastupny dzień. A dakumientalny film ab pracesie stvareńnia Now And Then budzie apublikavany 1 listapada», — paviedamiŭ u svaim anonsie hurt «Bitłz».
Demaviersija treka Now And Then była zapisanaja jašče ŭ kancy 1970-ych hadoŭ vakalistam Džonam Lenanam niezadoŭha da jaho hibieli ŭ 1980 hodzie (śpiavak byŭ zastreleny). Ale hołas Lenana na zapisie drenna čuvać z-za starońnich šumaŭ u domie śpievaka.
Pavodle ŭspaminaŭ muzyki «Bitłz» Poła Mak-Kartni, jakimi toj padzialiŭsia sa ŚMI jašče hetym letam, demazapis Now And Then byŭ atrymany im u 1990-yja ad udavy Lenana Joka Ona za hod da taho, jak jon, Charysan i Rynha Star pačali pracavać nad zbornikam «Antałohija». Tady hurt upieršyniu pasprabavaŭ skončyć pieśniu Lenana.
«U pieśni była nie vielmi ŭdałaja nazva, jaje treba było trochi pierapracavać, ale ŭ jaje byŭ pryhožy kuplet, i jaho śpiavaŭ Džon. Ale Charysan tady nazvaŭ jakaść zapisu vakału Lenana paršyvaj i admoviŭsia pracavać nad pieśniaj. U našaj kamandzie była demakratyja, i my kinuli pracu na trekam», — zajaŭlaŭ hetym letam muzyka Poł Mak-Kartni.
Vakalist «Bitłz» Džon Lenan sa svajoj žonkaj Joka Ona. Zdymak zrobleny ŭ 1980 hodzie niezadoŭha da zabojstva śpievaka. Fota: Jack Mitchell / Contributor Getty Images
Pa słovach Mak-Kartni, u tyja časy jašče było technična niemahčyma adździalić čysty hołas Lenana ad šumaŭ, ale Mak-Kartni nie traciŭ nadziei skončyć Now And Then.
I ŭ vyniku heta atrymałasia zrabić dziakujučy štučnamu intelektu.
Poł Mak-Kartni. Fota: Scott Garfitt / Invision / AP
Pieśnia Now And Then razam ź videaklipam i dakumientalnym filmam budzie nie adzinym padarunkam «Bitłz» svaim słuchačam i fanatam.
Hurt taksama anansavaŭ vychad novaha pieravydańnia svaich «Čyrvonaha» i «Siniaha» albomaŭ.
«Čyrvony albom» «Bitłz» (The Red Album, 1962—1966) składajecca z 26 piesień ahulnaj praciahłaściu muzyki bolš za 62 chviliny. A «Sini albom» (The Blue Album, 1967—1970) składajecca z 28 trekaŭ praciahłaściu amal 100 chvilin.
Abnoŭlenyja viersii hetych albomaŭ vyjduć 10 listapada.
Brytanski hurt «Bitłz» — heta adzin z samych kultavych i ŭpłyvovych rok-hurtoŭ u historyi. Jon byŭ zasnavany ŭ 1960 hodzie, maje 13 aficyjnych albomaŭ, jakija składajucca z 211 piesień. Ahulnaja kolkaść pradadzienych dyskaŭ i kasiet u «Bitłz» pieravyšaje adzin miljard kopij.
Čytajcie taksama:
Adhadajecie, pra što śpiavajecca ŭ hetych miehapapularnych pieśniach? TEST
«Śmiajusia, a ŭ horle kom». NaviBand vypuściŭ novy sinhł dla tych, chto sumuje pa domie