Na «pahromnym» rejsie ź Izraila ŭ Machačkału byŭ prynamsi adzin hramadzianin Biełarusi
Rasijskaje vydańnie «Dietali» apytała dźviuch pasažyrak samalota Tel-Aviŭ — Machačkała, jakija ŭčora pieražyli niepryjemnyja adčuvańni ŭ aeraporcie Machačkały, kali ahresiŭnyja ludzi ŭvarvalisia na jaho terytoryju, kab učynić pahrom u adpłatu za dziejańni Izraila ŭ Hazie. Adna z žančyn taksama zapisała videa, ź jakoha vynikaje, što na borcie samalota byŭ sama mieniej adzin pasažyr ź biełaruskim pašpartam.
30.10.2023 / 20:37
«Aŭtobus jeździŭ pa ŭźlotnaj pałasie, potym zbočyŭ na pole. I tam nas dahnaŭ natoŭp. U ich byli ściahi Paleściny. Jany pačali bić vokny. Askiepki patrapili na mianie i syna», — raskazała «Dietalam» pasažyrka A. — Jany ŭvarvalisia ŭ aŭtobus, ja pakazvała svoj rasijski pašpart, jany praviarali, kab nie było hramadzianstva [Izraila]. Vielmi šmat narodu było, jany atačyli aŭtobus, bili jaho, chistali».
Inšaja ž pasažyrka, N., dasłała «Dietalam» videa, na jakim čuvać, jak napadniki patrabujuć, kab ludzi vyjšli z aŭtobusa. Adzin z pahromščykaŭ niecenzurna łaje pasažyraŭ i kryčyć: «Čto vy diełajetie s Palestinoj, tvari je…. yje!»
Tyja ŭ adkaz kryčać, što jany ruskija. A adzin kryčyć, što ŭ jaho biełaruski pašpart.
Jak zvali taho čałavieka ź biełaruskim hramadzianstvam i ci adzin taki jon byŭ na borcie, pakul nieviadoma.
Nahadajem, što praca aeraporta była parušanaja z-za dziejańniaŭ natoŭpu, jaki sabraŭsia pierad budynkam pavietranaj havani na fonie prylotu rejsa ź Izraila. Paśla praryvu na terytoryju aeraporta ludzi akružyli samalot, da miesca incydentu prybyŭ śpiecnaz. U 22:10 urad Dahiestana paviedamiŭ, što ŭ aeraporcie pracujuć siłaviki, a situacyja znachodzicca pad kantrolem. Jašče praz 10 chvilin aeradrom byŭ vyzvaleny ad starońnich.
Padčas pratestaŭ paciarpieli 20 čałaviek, uklučajučy pradstaŭnikoŭ palicyi i cyvilnych asob, paviedamlała miascovaje Ministerstva achovy zdaroŭja. Dvoje z paciarpiełych znachodzilisia ŭ ciažkim stanie, adzin z palicejskich paźniej pamior.
SK Rasii raspačaŭ kryminalnuju spravu pavodle art. 212 KK Rasii — masavyja biesparadki. MUS paabiacała ŭstanavić asoby ŭsich udzielnikaŭ niaŭzhodnienaj akcyi, a taksama tych, chto padbuchtorvaŭ da raspalvańnia mižnacyjanalnaj varožaści.
Čytajcie taksama:
Pamior adzin z palicejskich, jaki paciarpieŭ padčas biesparadkaŭ u aeraporcie Machačkały
Aeraport Machačkały zakryli minimum da aŭtorka
U Dahiestanie prachodziać pratesty pad antysiemickimi łozunhami, pahromščyki ŭvarvalisia ŭ aeraport