Traich izrailcian užo niekalki dzion trymajuć u izalatary minskaha aeraporta. Što adbyvajecca?
Izrailskija telehram-kanały apublikavali videa, na jakim hramadzianin Izraila raskazvaje pra toje, jak jaho razam ź siabrami paśla prylotu zatrymali ŭ minskim aeraporcie i aktyŭna vyvučali źmieściva telefonaŭ. Sa słovaŭ mužčyny, siłavikam nie spadabalisia znojdzienyja foty sałdat CACHAŁ.
03.02.2024 / 10:47
Kadry ź videa, na jakim izrailcianin raspaviadaje pra zatrymańnie u minskim aeraporcie paśla prylotu ŭ Biełaruś. Samo videa zapisana ŭ izalatary aeraporta. Krynica: telehram-kanał «Izrailskije Trudovyjebudni»
Pavodle infarmacyi telehram-kanała «Izrailskije Trudovyjebudni», pazaŭčora u nacyjanalnym aeraporcie «Minsk» paśla prylotu zatrymali troch hramadzian Izraila i źmiaścili ŭ izalatar aeraporta.
Dakładnaja pryčyna zatrymańnia nieviadomaja, adnak sa słoŭ adnaho ź izrailcian, jaki zapisaŭ videa ź izalatara, biełaruskija siłaviki zacikavilisia fatahrafijami sałdat izrailskaj armii, znojdzienymi ŭ telefonach mužčyn.
«Ja razam ź jašče dvuma siabrami prylacieli ŭčora nočču ŭ Minsk i na pašpartnym kantroli nas adviali ŭ bok dla dopytu i pieratrusu. U nas zabrali telefony i aktyŭna ich praviarali, pakul nie znajšli fatahrafii izrailskich sałdat, navat nie našy, bo my nie słužyli.
Adzin aficer spytaŭ, chto hetyja sałdaty, i my adkazali, što častka ź ich — našy siabry, a astatnich nie viedajem. U vyniku aficer vyrašyŭ, što my złačyncy, i adpraviŭ nas u izalatar», — raspaviadaje izrailcianin Lior Junan na videa, jakoje było apublikavana 2 lutaha.
Mužčyna na momant zapisu videa adznačyŭ, što u jaho ź siabrami kanfiskavali bahaž i što jany znachodziacca ŭ izalatary ŭžo dva dni ŭ adnoj i toj ža vopratcy i amal biez vady i ježy.
Pry hetym izrailcianin dadaŭ, što pradstaŭnica pasolstva Izraila ŭ Biełarusi zmahła prynieści krychu vady i ježy, adnak jana «bajałasia kazać šmat»
«My dahetul nie viedajem, što rabić. Pradstaŭnica pasolstva zajaviła, što sama baicca kazać zanadta šmat.
Pa vyniku nam skazali čakać supracoŭnika avijakampanii Flydubai, praź jakuju my i prylacieli ŭ Biełaruś», — raskazaŭ Lior Junan.
Adznačym, što pasolstva Izraila ŭ Biełarusi pakul nie kamientavała situacyju publična. Maŭčyć i biełaruski MZS.
Čytajcie taksama:
Izrailskija ŚMI źviarnuli ŭvahu na «Žoŭtyja źlivy»
«Maski źniatyja». U Izraili adreahavali na kałonku ŭ «Minskaj praŭdzie»
Biełaruskaja prapahanda ŭkinuła ideju, što izrailcianaŭ chočuć pierasialić va Ukrainu