У Карпенкі спыталі аб прымусовым галасаванні. Ён занерваваўся
На прэс-канферэнцыі ў інфармацыйным цэнтры ЦВК, прысвечанай падвядзенню выбараў, журналістка «Точка» Вольга Савіцкая нечакана задала нязручнае пытанне — наконт высокай яўкі і прымусовага загону на ўчасткі бюджэтнікаў і студэнтаў. Карпенка перайшоў на ЗША, дзе, паводле яго, усё значна горш.
26.02.2024 / 09:04
Журналістка спытала, ці вядомыя ЦВК факты «так скажам, добраахвотна-прымусовага галасавання, калі бюджэтнікаў, студэнтаў настойліва просяць прагаласаваць датэрмінова альбо абавязкова прыйсці ў дзень асноўны?»
Ігар Карпенка занерваваўся. «Можа, «Точке», такія факты вядомыя? То вы нам падкажыце — у мяне такіх фактаў няма, нават зваротаў на гэтую тэму не было ў Цэнтральную выбарчую камісію», — сказаў ён.
Карэспандэнтка адказала, што такія факты ў яе ёсць, але яна не хоча апублічваць крыніцы. Але нават калі яна была студэнткай, праз гэта праходзіла.
Карпенка сказаў, што тут нічога такога няма. Ён сам быў студэнтам, працаваў прарэктарам. «Ну, зайшоў у аўдыторыю сказаў, што ідзе датэрміновае галасаванне, галасаванне арганізавана на такім участку… Гэта што, заганяць на выбары ці як?»
«Ну калі ёсць пад пагроза страціць інтэрнат, сесію здаць не надта добра…»
Карпенка прасіў канкрэтныя факты.
«Я магу вам факты прадаставіць потым», — адказала журналістка.
«Потым» камісію не задаволіла. «Давайце публічна. Вы публічна, у прамым эфіры задаяце пытанне, дык давайце публічна факты».
Журналістка перапытала, куды можна звяртацца, калі ёсць такія факты.
«У адрозненне ад ЗША, у нас грамадзянін можа звяртацца ў любую структуру, пачынаючы ад дзяржаўных органаў заканчваючы органамі пракуратуры, якія даюць ацэнку, органы суда, якія таксама даюць адпаведную прававую ацэнку, і ў камісіі, заканчваючы ЦВК», — адказаў Карпенка.
Чытайце таксама:
Марзалюка ўсё ж прызначылі дэпутатам. Прагноз «НН» на выбары спраўдзіўся на 97%
«Схадзіў. Прагаласаваў. Укінуў». Паэт Славамір Адамовіч схадзіў на выбары і даў інтэрв'ю прапагандзе