Кандыдат-спойлер пра ўдзел у выбарах: «Я — камуніст з вялікім стажам. Партыя сказала «трэба» — значыць, трэба»
Удзельніца ініцыятывы «Сумленныя людзі» прадставілася выбарцам і паразмаўляла з адной з кандыдатак-спойлераў на выбарах. А пасля падзялілася аўдыязапісам з «Нашай Нівай». Прыводзім найбольш цікавыя моманты гутаркі.
Гераіня размовы — дырэктарка сярэдняй школы №1 Ляхавічаў Наталля Кулак, якая балатуецца па Баранавіцкай сельскай выбарчай акрузе № 7 ад Камуністычнай партыі Беларусі.
Разам з Кулак у спісе кандыдатаў знаходзяцца два члены партыі «Белая Русь» — галоўны доктар Ляхавіцкай цэнтральнай раённай бальніцы Георгій Хлябовіч і дырэктар Баранавіцкага прадпрыемства меліяратыўных сістэм Віктар Лукашчык. Кандыдатура першага была ўключана ў спіс кандыдатаў шляхам збору подпісаў. Другі ідзе на выбары ад палітычнай партыі.
Па нашых прагнозах, дэпутатам павінен стаць Георгій Хлябовіч. Такі ж прагноз і ў «Сумленных людзей» — яны атрымалі яго па ўласнай мадэлі на базе нейрасеткі (ШІ прааналізаваў даныя папярэдніх кампаній).
У пачатку размовы ў Наталлі Кулак пацікавіліся, чаму яна выставіла сваю кандыдатуру на выбары не шляхам збору подпісаў, а ад партыі.
— Я камуніст з вялікім стажам. Партыя сказала «трэба» — значыць, трэба. Для мяне гэта вялікі гонар. Калі шчыра, да вылучэння я не задумвалася, [каб стаць дэпутатам].
— Наколькі вы верыце, што зможаце перамагчы Хлябовіча?
— Трэба глядзець рэальна на рэчы. Я да Хлябовіча вельмі добра стаўлюся. Лічу яго годным кандыдатам, што б там ні гаварылі. Мы з ім у харошых адносінах. І вельмі непрыемна стала даведацца, што мы з ім будзем канкурэнтамі.
— У Хлябовічу зацікаўлены зверху.
— Гэта проста чуткі. Аб іх сур'ёзна гаварыць не зусім правільна.
— Вы думаеце перамагчы?
— Каб не думала, то не ішла б. Зразумела, надзея ёсць. Як людзі прагаласуюць.
— Але каб прагаласавалі, трэба, каб была нейкая рэкламная падтрымка. Але тут не выглядае так, што ў вас роўныя ўмовы.
— Ну так. Трохі я прыхварэла. Таму не так ярка выступала, як ён (Хлябовіч — «НН»).
— Чаму вы член Камуністычнай партыі?
— Камуністы заўсёды выражалі інтарэсы працоўнага народа. Хто нас абароніць, калі не мы самі? Вельмі крыўдна, што нашы людзі забыліся, што тое, што мы цяпер маем, мы маем пасля будовы камунізму. На жаль, мы яго не пабудавалі, але жылі пры сацыялізме. Моладзь хацела перамен і глядзела на Захад, але не задумвалася, што там усё платнае. Там няма льготаў, не даюць бясплатных кватэр.
— Але як я разумею, пры сацыялізме забарона рэлігіі. Вы рэлігійны чалавек?
— Я рэлігійны чалавек. Але пачытайце гісторыю. Ленін, калі забараняў хадзіць у цэрквы, хацеў выпраміць спіну народу. Рэлігія — гэта таксама кантроль.
— Ці праўда, што Камуністычная партыя выступае за забарону прыватнай уласнасці і забарону рэлігіі?
— Не, не так. Мы ўсе рэлігійныя. У нас ва ўсіх бог у душы.
— Чаму лепш за вас галасаваць, а не за Хлябовіча?
— У сваёй праграме я больш абапіраюся на сельскую гаспадарку. Мне хочацца змяніць што-небудзь на сяле. У мяне ў праграме ёсць развіццё сярэдняга і малога бізнэсу. Хочацца, каб сяляне жылі лепей, каб вёскі не пуставалі, каб моладзь не зʼязджала ў горад.
— А чаму цяпер так адбываецца? Таму што работы там няма.
— А чаму работы няма? Таму што зʼязджаюць усе, працаваць няма каму.
— Калі вярнуцца да вашага асноўнага канкурэнта. Чаму вы, а не Хлябовіч?
— Я думаю, пяцьдзясят на пяцьдзясят шанцаў.
Чытайце яшчэ:
ЦВК сцвярджае, што датэрмінова прагаласаваў ужо кожны чацвёрты
Гульня ў імітацыю. БелТА апублікавала фота з выбарчага ўчастку, заблюрыўшы твары кандыдатаў
110 дэпутатаў, якія трапяць у парламент-2024, — праверце спіс пасля выбараў
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары
ну. галоўны камуніст Карпенка, былы міністр адукацыі і цяперашні старшыня ЦВК хацеў, каб папы па суботах у школах прасвяшчалі дзяцей... Ленін там ужо 1000 і 1 раз у труне перавярнуўся