Rasijskija prapahandysty ŭžo viedajuć, chto vinavaty ŭ terakcie
Ničoha tołkam jašče nie viadoma pra terakt u maskoŭskaj kancertnaj zale «Krokus Sici Choł», aficyjnyja struktury nie vystupili navat ź viersijami. Ale ŭ mnohich rasijskich prapahandystaŭ na čale z byłym prezidentam Rasii Dźmitryjem Miadźviedzievym viersija ŭžo hatovaja.
22.03.2024 / 23:52
Fota: AP Photo/Dmitry Serebryakov
Niekatorych prapahandystaŭ raźjušyła zajava pradstaŭnika Biełaha doma Džona Kirbi, što ŭ Biełaha doma niama danych ab datyčnaści Ukrainy da teraktu ŭ «Krokusie», a taksama pra toje, što Vašynhton zahadzia nie mieŭ infarmacyi pra terakt u Maskvie.
«Na jakoj padstavie aficyjnyja asoby ŭ Vašynhtonie robiać jakija-niebudź vysnovy ŭ razhar trahiedyi pra niečuju niedatyčnaść? Kali ŭ ZŠA jość abo byli dakładnyja danyja na hety kont, to ich nieabchodna nieadkładna pieradać rasijskamu boku. A kali takich danych niama, to Bieły dom nie maje prava vydavać kamu-niebudź indulhiencyi», — aburajecca dyrektarka departamienta infarmacyi i druku rasijskaha MZS Maryja Zacharava, viadomaja svaimi pastajannymi zusim niedypłamatyčnymi zajavami.
U tuju ž dudu dźmie publicyst Pavieł Danilin:
«Paničnyja zajavy Biełaha Doma, jaki ŭžo ŭsio viedaje, chto ž na samaj spravie ździejśniŭ terakt, sproby amierykancaŭ «admazać» ukrainskich terarystaŭ i takija ž paničnyja kryki Dziarždepartamienta ZŠA, jaki raniej papiaredžvaŭ svaich amierykancaŭ nie chadzić na kancerty ŭ vialikija centry i choły, vielmi vyrazna pakazvajuć, što ŭ ZŠA zahadzia viedali, što ŭkrainskaja chunta rychtuje hetuju biesčałaviečnuju terarystyčnuju ataku. Byli ŭ kursie».
Namieśnik staršyni dumskaha Kamiteta pa biaśpiecy i supraćdziejańniu karupcyi Anatol Vybarnaŭ prazrysta namiakaje na toje, što terakt arhanizavany nie rasijskimi čyńnikami:
«Takija fakty staranna płanujucca. Ja nie vyklučaju, što jość zamiežny śled. Ja ŭpeŭnieny, što pravaachoŭnyja orhany, śpiecsłužby prapracoŭvajuć usie viersii. I ŭ najbližejšy čas my budziem viedać, chto arhanizatar, vykanaŭca».
Palitołah Ihar Skurłataŭ nie prosta namiakaje, a pakazvaje palcam:
«Efiektu masavaj paniki i isteryi, atmaśfiery strachu ŭ terarystaŭ stvaryć nie atrymałasia. Čamu? Adkaz vidavočny. My ŭžo dziesiać hadoŭ žyviem va ŭmovach štodzionnych teraktaŭ z boku ŭkra-nieanacysckaj chunty. Z 2022 hoda teraryzm Zialenskaha i jaho bandy hałavarezaŭ uzros šmatkroć. Tamu biespakojnych prašu supakoicca i zrazumieć — my žyviem va ŭmovach vajennaha času, kali vorah čakana pravodzić i budzie pravodzić samyja roznyja akty ahresii ŭ dačynieńni da mirnych žycharoŭ Rasii».
Zhodny ź im i vice-śpikier Dziaržaŭnaj dumy Piotr Tałstoj:
«Hety terakt niemahčyma razhladać pa-za kantekstam SVA, vajny z kalektyŭnym Zachadam za mirnuju budučyniu našych dziaciej. Hety strašny dzień prymusić tolki macniej zhurtavacca, kab zmahacca da pieramohi».
Uładalnik miedyjakampanii «Caŕhrad» Kanstancin Małafiejeŭ hatovy nie tolki abvinavačvać, ale i prapanuje adrazu pierachodzić da dziejańniaŭ:
«Davajcie damo mirnamu nasielnictvu Ukrainy 48 hadzin, kab pakinuć harady, i narešcie skončym hetuju vajnu pieramožnym razhromam praciŭnika. Z vykarystańniem usich sił i srodkaŭ».
A palitołah Andrej Časnakoŭ prapanuje dziejničać tak, jak daŭnym-daŭno ŭžo dziejničaje ŭ padobnych vypadkach režym Łukašenki, choć pravobraz i nie nazyvajecca:
«Nielha asudžać rasijskija ŭłady za nastupnyja žorstkija dziejańni pa źniščeńni ŭsich, chto radavaŭsia hetaj trahiedyi. Nie tolki tych, chto ŭdzielničaŭ abo spryjaŭ teraktu, a ŭsich, chto zachaplaŭsia im, apraŭdvaŭ abo žartavaŭ».
Čytajcie taksama:
Što za hrupa «Piknik», pierad kancertam jakoj adbyŭsia terakt
Terakt u «Krokus Sici Choł»: što viadoma na hety momant
«Heta pravakacyja śpiecsłužbaŭ Pucina» — HUR Ukrainy pra stralaninu ŭ Padmaskoŭi
Terakt na kancercie ŭ «Krokus Chole» ŭ Maskvie. Mnostva achviar