Тварожная пасха з чорнымі парэчкамі

Згушчонка дадасць салодкасці, а чорныя парэчкі — лёгкую кіслінку і прыемны ягадны смак. Ідэальна!

07.07.2024 / 12:30

Фото: instagram kat.cooking.diary

Спатрэбіцца:

тварог — 400 г
чорныя парэчкі — 200-250 г
згушчонка — 250 г
растопленае масла — 150 г
цукровая пудра ці ванільны цукар па жаданні
формачка / папяровы або пластыкавы кубак ці нешта падобнае (каб з яго выцякала сыроватка, на дне трэба прарабіць адтуліны)
марля

Як гатаваць:

Чорныя парэчкі здрабніце ў блендары, перакладзіце ў невялікі рондаль і разагрэйце на невялікім агні. Прапусціце ягады цераз сіта — усё, што застанецца ў сіце, можна выкінуць, а прапушчанае ягаднае пюрэ трэба астудзіць.
Змяшайце тварог, расцерты да аднастайнасці, згушчонку і масла. Дадайце да гэтага ягаднае пюрэ і зноў размяшайце блендарам. Можна дадаць цукровую пудру.
Засцяліце форму марлей і перакладзіце тварожна-ягадную масу ў форму. Пакіньце ў лядоўні на 8 гадзін, каб тварог як след ўшчыльніўся. Час ад часу варта зліваць сыроватку, якая будзе выцякаць на талерку.
Гатовую пасху можна ўпрыгожыць лісцікамі мяты.

Nashaniva.com