«Zachodziŭ učastkovy, prasiŭ pakazać padpiski». Jašče adzin prarasijski aktyvist zajaviŭ, što jaho pieraśledujuć za palityku
Arciom Ahafonaŭ kaža, što na jaho napisali danos.
02.06.2024 / 16:54
Arciom Ahafonaŭ. Fota: sacsietki
Prarasijski aktyvist Arciom Ahafonaŭ raspavioŭ, što jaho sprabujuć pieraśledavać siłaviki.
U artykule na «Palitnavihatary» pra svajho adnadumca, stalinista Mikałaja Pietrušenku, jaki trapiŭ na sutki za repost i ledź nie pamior z-za jazvy, Ahafonaŭ raskazaŭ, što milicyjanty cikavilisia i jaho piersonaj.
«Pisali taki danos i na mianie, ale tady prablem udałosia paźbiehnuć. Choć i nie skažu, što prablemy źnikli — u paniadziełak zachodziŭ učastkovy, prasiŭ pakazać padpiski ŭ telehramie, fatahrafavaŭ telefon, ale nijakaj kramoły nie znajšoŭ. Heta ŭžo nie supadzieńnie, a sistema», — adznačyŭ Ahafonaŭ.
Aktyvist nahadaŭ, što za staryja reposty resursaŭ, jakija ŭ toj momant jašče nie byli pryznanyja «ekstremisckimi», nie tak daŭno sudzili prarasijskuju aktyvistku Elviru Mirsalimavu. Akramia taho, čakaje suda jašče adzin viciebski aktyvist Alaksandr Andrejkaŭ.
Ahafonaŭ viadomy jak adzin z aktyŭnych prychilnikaŭ «ruskaha śvietu» ŭ Biełarusi. U nulavyja jon byŭ aktyvistam AHP, adnak paśla aneksii Kryma Rasijaj i pačatku vajny na paŭdniovym uschodzie Ukrainy jon rezka pamianiaŭ śvietapohlad i zaniaŭ bok Rasii.
Niadaŭna Ahafonaŭ ustupiŭ u kanflikt z karespandentkaj ANT u Rasii Śviatłanaj Karulskaj. Jon nazvaŭ supracoŭnicu telekanała «sistemnaj nacyjanalistkaj» i abvinavaciŭ jaje ŭ «nianaviści da rasijskich žaŭnieraŭ». Karulskaja ŭ adkaz źviarnułasia ŭ sud.
Praces skončyŭsia mirnym pahadnieńniem, ale Ahafonaŭ zastaŭsia vinien amal 4 tysiačy rubloŭ advakatu Karulskaj. Aktyvistu daviałosia prasić dapamohi ŭ čytačoŭ.
Stalinistu Pietrušenku dali 10 sutak. Na siomyja sutki ŭ jaho adkryłasia prabadnaja jazva
Paśla suda za ekstremizm stalinist Pietrušenka kančatkova vydaliŭ usie svaje internet-zapisy
Stalinist z Tałačynskaha rajona aburyŭsia praktykaj, za jakuju ŭ Biełarusi asudzili tysiačy čałaviek
Prarasijski aktyvist Ahafonaŭ źbiraje hrošy, kab raspłacicca z advakatam karespandentki ANT