БТА Банк у Беларусі змяніў уласніка
5.06.2024 / 10:57
Казахстанскі бізнэсовец Кенес Ракішаў прадаў беларускі БТА Банк таксама казахстанскаму прадпрымальніку — Султану Марэнаву.
Фота: Яндэкс
БТА Банк паведаміў пра завяршэнне здзелкі па набыцці 99,93 працэнта акцый банка кампаніяй ТАА «SNRG Capital Eurasia» (Казахстан) у АТ «БТА Банк» (Казахстан).
ТАА «SNRG Capital Eurasia» належыць казахстанскаму прадпрымальніку Султану Марэнаву.
Султан Марэнаў знаёмы з беларускім рынкам — з 2005 па 2015 гады займаў пасаду старшыні праўлення БТА Банк. Са студзеня 2024 года ён узначальвае савет дырэктараў банка.
— Мы плануем узмацніць кіруючую каманду і сфакусавацца на растучых патрэбах нашых кліентаў, а таксама прапанаваць выгадныя ўмовы для фізічных асоб, малога і сярэдняга бізнэсу і для тых, хто вядзе актыўную знешнеэканамічную дзейнасць. Разумеючы, што сёння запатрабаваны бясшвовыя лічбавыя сэрвісы, мы прыкладзем усе намаганні для таго, каб іх палепшыць, — перадае словы Марэнава прэс-служба.