Ці меў рацыю Лукашэнка, называючы заходніх палітыкаў бяздзетнымі? У Урсулы фон дэр Ляен сямёра дзяцей
Ці сапраўды «іх род заканчваецца»?
03.07.2024 / 10:38
Справа налева: прэзідэнт Францыі Эмануэль Макрон, прэзідэнт ЗША Джо Байдэн, прэм'ер-міністр Японіі Фуміо Кішыда, прэм'ер-міністр Канады Джасцін Трюдо, старшыня Еўракамісіі Урсула фон дэр Ляен, прэм'ер-міністр Вялікабрытаніі Рышы Сунак, прэзідэнт Еўрапейскага Савета Шарль Мішэль, канцлер Германіі Олаф Шольц і Прэм'ер-міністр Італіі Джорджыя Мелоні глядзіць дэманстрацыю скачка з парашутам падчас саміту лідараў краін G7 у Борга-Эгнацыя, Італія, чацвер, 13 чэрвеня 2024 г. Фота: AP Photo/Luca Bruno
Лукашэнка лічыць, што «ў авангардзе антыбеларускай, антырускай палітыкі стаяць бяздзетныя палітыкі». Але факты сведчаць аб тым, што не ўсё так адназначна.
Сапраўды, сярод кіраўнікоў вядучых краін Захаду ёсць некалькі тых, у каго няма дзяцей. Гэта, напрыклад, федэральны канцлер Германіі Олаф Шольц і прэзідэнт Францыі Эмануэль Макрон. Аднак у жонкі Макрона ёсць дзеці ад папярэдняга шлюбу.
Не мае дзяцей і 57-гадовы Марк Рутэ, які з кастрычніка зойме пасаду генеральнага сакратара НАТА. Мужчына застаецца халасцяком. А вось яго папярэднік на пасадзе Енс Сталтэнберг выгадаваў дзвюх дачок.
Столькі ж дачок у прэзідэнта Літвы Гітанас Наўседа, старшыні Еўрапейскай рады Шарля Мішэля, прэм'ер-міністра Вялікабрытаніі Рышы Сунака і былога прэзідэнта ЗША (2009-2017) Барака Абамы.
Трое сыноў у прэм'ер-міністра Японіі Фіміа Кішыды. Двух сыноў і дачку гадуе прэм'ер-міністр Канады П'ер Трудо.
Сына і дачку мае прэзідэнт Украіны Уладзімір Зяленскі. Адна дачка ў прэзідэнта Польшчы Анджэя Дуды і прэм'ер-міністра Італіі Джорджы Мелоні (народжаная не ў шлюбе).
Двойчы быў жанаты прэзідэнт ЗША Джо Байдэн. З першай жонкай у яго было двое сыноў і дачка. Дачка загінула ў аўтакатастрофе разам з маці ў 1972 годзе. А другі сын памёр ад анкалогіі ва ўзросце 46 гадоў у 2015 годзе. Ад другога шлюбу ў Байдэна адна дачка.
Есць сярод заходніх палітыкаў і шматдзетныя бацькі. Напрыклад кіраўніца Еўракамісіі Урсула фон дэр Ляен — маці сямі дзяцей (двух сыноў і пяці дачок).
Кіраўніца Еўракамісіі Урсула фон дэр Ляен са сваімі сямю дзецьмі
Шматдзетным бацькам з'яўляецца і былы прэм'ер-міністр Вялікабрытаніі Барыс Джонсан, які быў жанаты тройчы. У другім шлюбе ў Джонсана нарадзілася чацвёра дзяцей — дзве дачкі і два сыны. У трэцім шлюбе — два сыны і дачка. Акрамя гэтага, у Джонсана ёсць адна пазашлюбная дачка.
Пяць дзяцей мае Дональд Трамп. Ад першага шлюбу ў яго трое дзяцей (сын і дзве дачкі). Ад другога — дачка. Трэцяя жонка, якая малодшая за яго на 24 гады, нарадзіла палітыку сына.
Як бачым, «ген нянавісці», аб якім гаварыў у сваім выступе Лукашэнка, заходнім палітыкам будзе каму перадаць у спадчыну.
Дэмаграфічная катастрофа. Узровень нараджальнасці ў Беларусі апусціўся ніжэй за ваенныя часы
У Беларусі недастаткова моладзі і зусім мала дзяцей. У чым прычыны?