«Unikalnaje spałučeńnie dźviuch roznych tradycyj». Pry raskopkach staražytnaha Mienska vyjavili dadatkovuju liniju abarony
Draŭlanyja fartyfikacyjnyja zbudavańni, vyjaŭlenyja padčas raskopak na haradziščy na Miency, nie majuć anałahaŭ va Uschodniaj Jeŭropie. Pra toje, čamu heta ŭnikalny pomnik, anałahaŭ jakomu niama ni ŭ Rasii, ni va Ukrainie, piša rasijskaje vydańnie Sputnik.
15.07.2024 / 21:32
Fota Viktara Tałočki
U minułym hodzie ŭ chodzie maštabnaha vyvučeńnia letapisnaha Mienska navukoŭcy raskryli draŭlanyja kleci z duba, jakija ŭ Ch stahodździ ŭźviali dla abarony horada. U biahučym palavym siezonie kanstrukcyi razabrali i adpravili na kansiervacyju. Heta ŭžo dazvoliła zrabić niekalki siensacyjnych adkryćciaŭ.
Ciapier u chodzie raskopak pierad razabranymi dubovymi kleciami atrymałasia vyjavić jašče adnu liniju abarony, pra najaŭnaść jakoj navukoŭcy i nie zdahadvalisia.
«Dla Ch stahodździa dla dadzienaj terytoryi byli charakternyja abarončyja zbudavańni ŭ vyhladzie kleciaŭ, jakija tut užo daśledavali», — raskazaŭ zahadčyk adździeła archieałohii Siarednich viakoŭ i Novaha času Instytuta historyi NAN Andrej Vajciachovič.
Pavodle jaho słoŭ, pa miery taho, jak daśledavałasia terytoryja ad kleciaŭ u bok raki, była znojdziena jašče adna linija zrubaŭ, vykananych u kłasičnaj tradycyi z hakami, jakija ŭmacoŭvajuć vonkavuju ścianu.
Fota Viktara Tałočki
«Jana nie była źviazanaja z asnoŭnymi kleciami, ale za joj była adkrytaja jašče adna linija biarvieńnia, jakija ŭmacavanyja hakami, a karotkija biarviony, kab ich nie ssunuli ź miesca, zmacavanyja draŭlanymi štechielami», — źviarnuŭ uvahu historyk.
Andrej Vajciachovič rastłumačyŭ, što heta ŭžo zusim inšaja technałohija, adroznaja ad tradycyjnych kleciaŭ, jakaja bolš charakternaja dla zachodnich słavian, a nie ŭschodnich.
«Heta ŭnikalnaje spałučeńnie dźviuch roznych tradycyj uźviadzieńnia abarončych zbudavańniaŭ. Heta značyć, što žychary horada na Miency byli ŭ kursie samych sučasnych na toj momant technałohij abarončaha dojlidstva. Mabyć, u rabotach brali ŭdzieł jak miascovyja majstry, tak i pryjezdžyja, jakija i dapamahali budavać jašče adnu liniju abarony», — miarkuje archieołah.
Fota Viktara Tałočki
Pry hetym jon zrabiŭ asablivy akcent, što ŭpieršyniu ŭ historyi archieałohii va Uschodniaj Jeŭropie vyjaŭlena takoje spałučeńnie draŭlanych kanstrukcyj. «Heta novaja staronka ŭ historyi abarončaha dojlidstva», — upeŭnieny Andrej Vajciachovič.
«Heta nacyjanalny zdabytak, tamu što heta ŭnikalny pomnik, padobnaha jakomu nidzie niama», — kanstatavaŭ archieołah.
Ciapier i hetyja draŭlanyja kanstrukcyi buduć razabranyja dy adpraviacca na kansiervacyju ŭ Homiel, dzie ŭžo znachodziacca kleci z duba Ch stahodździa.
Fota Viktara Tałočki
Pa słovach navukoŭca, nastupnaje važnaje pytańnie — heta muziejefikacyja znachodak. Treba budzie vyrašyć, patrebny asobny muziej ci znachodki buduć pieradadzienyja ŭ dziejny. Mahčyma, atrymajecca znajści rašeńnie, jakoje dazvolić zachavać kampazicyju vała i fartyfikacyjnyja zbudavańni viernuć na miesca, kab pakinuć histaryčny kantekst.
«Nijakija viadomyja ŭ Biełarusi draŭlanyja abarončyja zbudavańni pa składanaści i pa mahutnaści ź imi niesupastaŭnyja», — padkreśliŭ archieołah.
Andrej Vajciachovič zaŭvažyŭ, što ŭ asnoŭnym haradziščy časoŭ Staražytnaj Rusi daśledavalisia na terytoryi sučasnych Biełarusi, Rasii i Ukrainy ŭ 60-70-ch hadach minułaha stahodździa. Tady rabilisia prosta razrezy vała, i nichto nie adkryvaŭ takija vialikija płoščy, jak ciapier u Biełarusi.
Fota Viktara Tałočki
Na haradziščy na Miency raźbirajuć fantastyčnaj zachavanaści hihanckija dubovyja zruby X stahodździa
Znachodki letašnich archieałahičnych raskopak na Miency dadajuć Minsku ŭzrostu