U Rasii krytyčny deficyt bajcoŭ, sfarmiravali motastrałkovy połk sa składu pavietranych siłaŭ
«Heta prykładna, jak motastrałkovy połk choru Alaksandrava», — kpić rasijski vajskovy błohier.
30.07.2024 / 17:45
Fota: Fighterbomber / telagram
Na novaje farmiravańnie — motastrałkovy połk Pavietrana-kaśmičnych sił Rasii (PKS) źviarnuŭ uvahu kapitan PKS Illa Tumanaŭ (Fighterbomber). U svaim telehram-kanale jon piša, što połk stvorany tydzień tamu. Ludziej u jaho nabirali pa ŭsioj Rasii. Siarod ich jak inžynierna-techničny, tak i lotna-padjomny, a taksama lotny skład.
«Siaržanty, praparščyki i aficery. Zdajecca, navat adzin šturman jość», — dzielicca infarmacyjaj vajenkar i dadaje z sarkazmam:
«Vajujuć norm. Jak usie. Usim zabiaśpiečanyja. Skarhaŭ niama. Usio dobra. Heta prykładna, jak motastrałkovy połk choru Alaksandrava. Nu ci DŠB (desantna-šturmavaja bryhada — NN) CSKA. Pavinien być niejki pasył ci vyvad. Ale jaho niama».
Vysnovu robić aŭtar inšaha telehram-kanała — «Vault 8. Ubiežiŝie».
Jon tłumačyć, što takija novyja farmiravańni pačali źjaŭlacca prykładna sa śniežnia 2023 hoda z-za bojazi ŭładaŭ pravodzić druhuju chvalu mabilizacyi va ŭmovach padrychtoŭki pastajannaha, biez apieratyŭnych paŭzaŭ «pazicyjnaha nastupu».
U Maskvie bajacca, što novaja mabilizacyja pryviadzie da sacyjalnaha vybuchu i revalucyi.
U vyniku «roznyja rady vojsk vyhrabajuć kantraktny asabovy skład dla papaŭnieńnia ci farmiravańnia novych padraździaleńniaŭ i navat čaściej».
Aŭtar śćviardžaje, što da hetaha čuŭ pra toje, što kantraktnikaŭ na fłocie pieravodziać u bryhady marskoj piachoty, pieratvarajuć kamiendanckija ŭzvody ŭ šturmavyja. Jamu viadomyja vypadki pieravodu niekalkich «niepatrebnych» suviazistaŭ u šturmavuju rotu, a vajskoŭcaŭ z roty materyjalnaha zabieśpiačeńnia va ŭzvod BPŁA, bo «suviazistaŭ pa kantrakcie ci mabilizacyi nie źjaviłasia».
«Sfarmiravać ź minamiotnaj batarei evakahrupu — paśla straty matčastki. Rasfarmiravać snajpierski ŭzvod snajpierskaj roty, kab pierakinuć asabovy skład u šturmavy ŭzvod»,
— pryvodzić inšyja prykłady vajenkar i dadaje, što akramia hetaha, kab zachavać kolkasny skład, byli zavyšanyja patrabavańni da traŭmatyzmu paśla ranieńnia jak padstava dla demabilizacyi. «U vyniku masa kalek u PPD (punktach pastajannaj dysłakacyi — NN), ź jakich asobnyja kamandziry vyhrabajuć papaŭnieńni dla šturmaŭ».
«Usio heta zvanočki (a MSP PKS dyk naohuł nabat) pra toje, što albo budzie zamireńnie, albo druhaja chvala mabilizacyi», — adznačaje vajenkar.
Pieršapryčyna deficytu bajcoŭ — vializnyja straty rasijskaj armii. Na siońnia viadomyja pajmienna bolš za 61 tysiaču zabitych va Ukrainie. Ekśpierty miarkujuć, što ŭsiaho na siońnia rasijskaja armija i najomnyja struktury, jakija vajujuć razam ź joj, panieśli straty ŭ prykładna 120 tysiač zabitymi i 450 tysiač paranienymi. Takich vajennych strat nie niesła nivodnaja z raźvitych dziaržaŭ śvietu paśla Druhoj suśvietnaj vajny.
Paćvierdžanyja straty Rasii va Ukrainie pieravysili 60 tysiač čałaviek zabitymi
Z-vajenkary śćviardžajuć, što rasijskija vajskoŭcy źbili ŭłasny viertalot
Datčanin, kab zastacca ŭ Rasii, padpisaŭ kantrakt ź Minabarony. Jaho adpravili na vajnu
Zialenski: Ukraina padrychtuje mirny płan da kanca listapada