Jak zavozili rasijskija vojski ŭ Biełaruś u pačatku vajny
Supolnaść čyhunačnikaŭ Biełarusi padzialiłasia detalami arhanizacyi vajennych pieravozak napiaredadni rasijskaha ŭvarvańnia va Ukrainu.
27.08.2024 / 11:21
Jak viadoma, napiaredadni poŭnamaštabnaha ŭvarvańnia Rasii va Ukrainu na terytoryi Biełarusi pravodzilisia vajskovyja vučeńni, jakija pačalisia 17 studzienia 2022 hoda. Pad vyhladam udziełu ŭ ich na terytoryju našaj krainy zavozilisia rasijskija vojski, jakija paźniej udzielničali ŭ napadzie.
Supolnaść čyhunačnikaŭ Biełarusi, abapirajučysia na dakumienty, padličyła, što na terytoryju našaj krainy z Rasii było dastaŭlena 11 889 vahonaŭ z roznymi vajennymi hruzami ahulnaj vahoju amal 230 tysiač ton, uklučajučy 730 vahonaŭ z asabovym składam, 8002 vahony z vajskovaj technikaj, 1300 vahonaŭ z bojeprypasami i 946 vahonaŭ z palivam.
Jakija rasijskija padraździaleńni byli dastaŭleny
U Biełaruś byli dastaŭleny padraździaleńni Uschodniaj vajennaj akruhi (5, 29, 35, 36 ahulnavajskovych armij), Centralnaj (2-j hvardziejskaj tankavaj i 41-j ahulnavajskovaj armii), Zachodniaj (1-j i 20-j hvardziejskich tankavych armij, 6-j ahulnavajskovaj).
Akramia hetaha, u składzie kantynhientu rasijskich vojsk na terytoryju Biełarusi byli padraździaleńni troch hvardziejskich pavietrana-desantnych dyvizij (76-j, 98-j i 106-j), 31-j hvardziejskaj šturmavoj desantnaj bryhady, vajennasłužačyja śpiecyjalnych padraździaleńniaŭ Hałoŭnaha ŭpraŭleńnia Hienieralnaha štabu Rasii i Śpiecyjalnych sił Rashvardyi.
Kudy ich dastaŭlali
Asabovy skład i vajskovyja hruzy dastaŭlali na 27 stancyj Biełaruskaj čyhunki. Pry hetym najbolšaja kolkaść hruzaŭ (1483 vahony ahulnaj masaj 21,2 tys. ton) pastupiła ŭ Chojniki. Na druhim miescy byli Asipovičy (1362 vahona, 22,8 tys. ton). Na trecim — Jelsk (1320 vahonaŭ, 21,2 tys. ton).
Akramia ich 1061 vahon (15,9 tys. ton) pryniała stancyja Brest-Uschodni, 1003 vahony (17,9 tysiač ton) — Rečyca, 790 vahonaŭ (10,3 tys. ton) — Navabielica.
Značnyja pastupleńni byli na stancyi Puchavičy (596 vahonaŭ, 8,9 tys. ton), Łuniniec (539 vahonaŭ, 8,2 tys. ton) i Dobruš (514 vahonaŭ, 10,6 tys. ton).
Adpaviedna dakumientam, atrymalnikami hruzaŭ na terytoryi Biełarusi było Upraŭleńnie vajskovych znosin Ministerstva abarony Biełarusi i 474-j asobny radyjotechničny vuzieł rańniaha papiaredžańnia (vajskovaja častka 03522 Ministerstva abarony Rasii, jakaja raźmiaščajecca na terytoryi Biełarusi).
Chto arhanizatar pieravozak
U materyjale adznačajecca, što Biełaruskaja čyhunka prymała ŭdzieł u ahresii ŭ asnoŭnym jak techničny srodak dastaŭki. Niepasrednym vykanaŭcam i arhanizataram pieravozak vystupała Respublikanskaje transpartna-ekśpiedycyjnaje ŭnitarnaje pradpryjemstva «Bielintertrans — transpartna-łahistyčny centr» Biełaruskaj čyhunki (BTŁC) (hienieralny dyrektar — Andrej Sładkievič).
Zamiest taho, kab zaklučyć pramuju damovu ź Ministerstvam abarony Rasii, BTŁC zrabiła heta praz svaje rasijskaje daččynaje TAA «Bielintertrans — Maskva» (dyrektar — Juryj Kabakoŭ). Dziakujučy ŭdziełu ŭ pieravozkach, apošniaja zmahła naraścić ekspart pasłuh bolš čym u 10 razoŭ i atrymać prybytak u 162 tysiačy dalaraŭ ZŠA.
Arandavanyja dla dastaŭki vajennych vahony nadoŭha zatrymalisia ŭ čakańni nastupnaj pahruzki nazad. A kali nastaŭ čas ich viartańnia, to vyśvietliłasia, što značnaja ich kolkaść maje žachlivy techničny stan i patrabuje roznych vidaŭ ramontu. Pa słovach vidavočcaŭ, składvałasia ŭražańnie, što častka vahonaŭ, jakija vyrableny z dreva, «pajšli na drovy».
U čyhunačnikaŭ zabrali lhoty na prajezd
Biełaruskija partyzany ŭziali adkaznaść za dyviersii na čyhuncy ŭ pryhraničnych abłaściach Rasii