Šrajbman parazvažaŭ, ci pojdzie Łukašenka na vybary i čamu jon zahavaryŭ pra Pačobuta
A taksama patłumačyŭ, navošta patrebny «biełaruski jutub».
13.09.2024 / 14:56
Arciom Šrajbman. Skryn videa utro / YouTube
U novym vypusku jutub-šou «Obyčnoje utro» palityčnaha analityka Arcioma Šrajbmana paprasili prakamientavać niekatoryja aktualnyja pytańni.
Navošta čynoŭnikam biełaruski jutub
Adkazvajučy na heta pytańnie, Šrajbman nahadaŭ momant ź filma Duchless, u jakim hieroj bjecca hałavoj ab rul i kryčyć «Babki, babki, babki!»
«Dumaju, što pryčyna dastatkova prazaičnaja. Dla vykanaŭcaŭ heta hrošy. Dla tych, chto heta «pradavaŭ» Łukašenku, heta jašče mahčymaść zrubić niejkija palityčnyja ački, bo jany dziejničajuć u trendzie suvierenizacyi anłajn-prastory, modnym na terytoryi Sajuznaj dziaržavy. … Jany zrazumieli, što na heta daduć hrošy navat kali pradukt budzie takim, jaki my jaho ŭbačyli na vychadzie», — ličyć Šrajbman.
Padtrymka hetaj idei z boku Łukašenki, na pohlad analityka, tłumačycca jaho vieraj u toje, što «biełarusy taksama mohuć naradžać krutyja prajekty, jakija ździviać śviet, ale heta možna zrabić dziaržaŭnaj rukoj».
«Jaho ideja fiks — dakazać, što my ničym nie horšyja za pryvatnikaŭ. Dziaržava moža inviestavać u stvareńnie choć tesły, choć svajho kampjutara i navat znajści naftu, kali zahadać.
Čałaviek žyvie takimi mieha-prajektami. (…) I razumiejučy taki patern jaho myśleńnia, čynoŭniki im karystajucca. Heta svojeasablivy talent pičynhu (prezientacyi prajekta inviestaram — NN). Ludzi znachodziać tyja notki, jakija hrajuć, i prynosiać tyja prajekty, jakija traplajuć u žadańnie Łukašenki dakazać «hetym buržujam», što my možam stvaryć ničym nie horš», — tłumačyć analityk.
Ci pojdzie Łukašenka na vybary
Šrajbman zaŭvažyŭ, što šerah zakonaŭ, jakija dajuć harantyi byłomu prezidentu Biełarusi, nielha razhladać jak śviedčańnie namieraŭ Łukašenki syści. Pryniaćcie ich «čysta jurydyčna pradkazalna pryniaćciem novaj Kanstytucyi», miarkuje jon.
«Zakony ŭ Biełarusi ciapier prymajucca pa farmalnym biurakratyčnym pryncypie. U 2022 hodzie była pryniata Kanstytucyja, i ŭ jaje raźvićcio treba pryniać niekalki zakonaŭ, jakija raźvivajuć niekatoryja artykuły, jakich raniej nie było. (…) Heta adbyłosia b u lubym vypadku — źbiraŭsia b Łukašenka na piensiju ci nie», — tłumačyć Šrajbman.
Što tyčycca płanaŭ dyktatara, to analityk raić źviartać uvahu nie na jaho rytoryku, jakaja mianiajecca kožny miesiac, a na dziejańni i, mahčyma, stan zdaroŭja.
«Niejkich značymych pravałaŭ, hłybokich kryzisaŭ sa zdaroŭjem, jakija b pieraškadžali jamu vyłučacca ŭ nastupnym hodzie… — dokazaŭ hetamu ŭ nas niama. Zrazumieła, što jon stareje, usio čaściej kulhaje, prapadaje. Ale heta jašče nie zabarončyja prablemy sa zdaroŭjem.
Zastajucca dziejańni. Heta padrychtoŭka jaŭnych pierajemnikaŭ. Da vybaraŭ zastałosia paŭhoda, maksimum vosiem miesiacaŭ. U hetym sensie, kali ty rychtuješ niekaha ŭ pierajemniki piersanalisckaha aŭtarytarnaha režymu paśla tryccaci hadoŭ tvajoj ułady, to para b jaho ŭžo pakazvać.
Bo inakš heta budzie vymańnie niejkaha noŭnejma z kišeni. Navat Pucina pakazali amal za hod. Tamu my nie bačym prykmiet padrychtoŭki tranzitu», — abhruntoŭvaje svoj pohlad Šrajbman i dadaje:
«Ja nie mahu vam na 100% pradkazać, jak budzie vyhladać 2025 hod. Łukašenka moža zaŭtra paśliznucca i stuknucca trombikam ab kamieńčyk, i tamu ŭsio moža pajści inakš. Ale pakul ja b nie davaŭ bolš za 5%, moža, 10% vierahodnaści, što jon nie pojdzie [na vybary]».
Što moža pryvieści da pieramien u Biełarusi
Arciom Šrajbman źviartaje ŭvahu na toje, što «ŭsie značnyja źmieny ŭ biełaruskaj histaryčnaj trajektoryi ŭ apošnija tryccać (kali nie skazać sto) hadoŭ tak ci inakš byli źviazanyja ź pieraturbacyjami ŭ Rasii ci pieraturbacyjami ŭ dvuchbakovych adnosinach».
Tamu analityk dumaje, što «ŭ tym ci inšym vyhladzie impuls dla pieramien u Biełarusi pryjdzie z boku Uschodu». I nie stolki z punktu hledžańnia taho, što Rasija stanie demakratyčnaj i paciahnie za saboju Biełaruś, a «prosta [mohuć źjavicca] niejkija turbulentnaści, źviazanyja z destabilizacyjaj farmatu adnosin Minska i Maskvy».
Pryčynaj impulsaŭ, jakija prymusiać Łukašenku vieści siabie inakš, na dumku Šrajbmana, moža stać źmiena adnosin Pucina da jaho («Pucin pierastanie być nastolki (…) ščodrym partnioram adnosna Łukašenki, jak ciapier»), ci niejkija vajennyja padziei, jakija asłabiać rasijski režym.
Čamu Łukašenka zahavaryŭ pra Pačobuta?
Šrajbmana paprasili patłumačyć, čamu Łukašenka zahavaryŭ pra toje, što prapanoŭvaŭ Polščy addać žurnalista Andžeja Pačobuta.
Analityk ličyć, što hetyja słovy, a taksama zajavy ab mihrantach, treba razhladać jak prykmiety sprobaŭ pačać pieramovy z Zachadam.
«Jon pakłaŭ na stoł pieramovaŭ jašče dźvie temy: Pačobut i mihracyjny kryzis. (…) Kali jaho słovy ačyścić ad šałupińnia, to my bačym jaskravy sihnał — ja ŭ hetyja pytańni ŭciahnuty, ja hatovy ab ich razmaŭlać, ale mianie nie zadavalniajuć vašy prapanovy. Tamu ja vychodžu ŭ pablik sa słovami «zabirajcie [Pačobuta]», «ja rehuluju mihracyjny patok i mahu ŭvohule ŭ nul adrehulavać». Ale jon čakaje niejkaj inšaj prapanovy», — tłumačyć Šrajbman i adznačaje, što nie viedaje, jakoj kankretna.
Ci majuć racyju prapahandysty, kali śćviardžajuć, što vychad palitviaźniaŭ — drennaja navina dla emihracyjnych palitykaŭ
Na dumku Šrajbmana, pakul siarod tych, chto byŭ vyzvaleny, niama ludziej «publičnaha kalibru», to nielha havaryć ab źmienie palityčnaha łandšaftu biełaruskich demakratyčnych sił.
«Łukašenka pakul nie stavić sabie hetaj mety. Kali vypuścić Siarhieja Cichanoŭskaha ci Maryju Kaleśnikavu, lidarstvu Śviatłany Cichanoŭskaj moža pryjści kaniec. Ale pakul heta, miarkujučy pa ŭsim, nie na paradku dnia».
Adnak usio moža źmianicca, kali amnistyi ci pamiłavańni dojduć i da takich fihur. «Zrazumieła, heta budzie pierafarmatavańnie apazicyjnaha pola. Ci značyć heta, što niekatoryja ludzi zhubiać svoj upłyŭ? Mahčyma», — vykazvaje svaju dumku Šrajbman i dadaje, što na jaho pohlad, heta razumieje i Ofis Cichanoŭskaj.
Analityk pryhadvaje, što daradca Śviatłany Cichanoŭskaj Franak Viačorka ŭ niekalkich intervju havaryŭ ab tym, što «pratakoły ab Cichanoŭskaj jak nacyjanalnaj lidarcy majuć aktualnaść, pakul situacyja takaja, jak ciapier. A kali ŭ nas vychodziać novyja lidary, kali źjaŭlajucca novyja lidary sami, heta ŭsio spyniaje być aktualnym».
Ale ličyć vychad takich fihur pahrozaj dla demakratyčnaha ruchu nielha. Heta jak «ličyć, što dla Śviatłany Cichanoŭskaj važniej, umoŭna, mieć trochi bolš sustreč, čym muža pobač z saboj i dziećmi».
Šrajbman nie vieryć u tezis prapahandystaŭ pra toje, što apazicyja zacikaŭlena ŭ tym, kab ludzi siadzieli.
«Ja nie hatovy ŭjavić, što biełaruski demakratyčny ruch uznačalvajuć takija maralnyja ŭrody, jakija dumajuć ab tym, jak by svaich paplečnikaŭ, rodnych trymać u turmie jak maha daŭžej», — adznačaje Šrajbman.
Šrajbman daje kamientary tolki tym rasijskim miedyja, jakija hatovyja za heta danacić Ukrainie
Šrajbman prapanavaŭ apazicyi, što možna rabić ź biuleteniami na vybarach-2025
Novaja Rasija: Šrajbman nie vieryć, što jana źmienicca