Prank z «minskimi Patrykami» vyjšaŭ z-pad kantrolu
Źjaviŭsia ceły prajekt-pablik, pryśviečany śvieckamu žyćciu na Karła Marksa. Mienavita hetuju vulicu niekatoryja nazyvajuć u honar maskoŭskich Patryjaršych prudoŭ.
16.09.2024 / 11:51
Chranikiesami padziej vulicy stali fešn-influensarka Rusłana Karachojeva i viadučaja Kryścina Džuńko.
«Śvieckaje žyćcio horada, cikavyja ludzi i ich dumki, repartažy z zakrytych imprez i absalutny ekskluziŭ. Jak kažuć, poŭny šou mast hoŭ on», — apisvajuć błohierki svoj prajekt, jaki jany chočuć raźvić da maštabaŭ partała.
Stvaralnicy «Ciažkoha Marksa» (minskich Patrykaŭ) Rusłana Karachojeva i Kryścina Džuńko
U adnym sa svaich rolikaŭ aŭtarki zadajuć minakam na vulicy Marksa pytańnie, čamu hetuju vulicu, ułasna kažučy, i nazyvajuć Patrykami. Adkazy zbolšaha zvodziacca da dabrabytu naviednikaŭ:
«Pryjazdžajuć darahija mašyny i atmaśfiera, jak u Maskvie».
«Tut vielmi šmat restaranaŭ i ŭsie pryjazdžajuć papantavacca, dziaŭčaty za chłopcami».
«Tut raźmiaščajucca samyja darahija restarany, prajs vysoki, darahija mašyny, darahija ludzi».
U kamientarach da videa ludzi zadajucca pytańniem: «Heta biełarusy?» Nie ŭsim spadabałasia padobnaje pierajmańnie: «Blin, navučyciesia być darosłymi. «Minskija Patryki» — niejkaje vartaje žalu pierajmańnie».
«Hałoŭnaje — paśla minskich Patrykaŭ nie trapić u minskuju Butyrku», — pažartavaŭ adzin z karystalnikaŭ.
U inšych rolikach, jakija ŭžo paśpieli apublikavać u instahramie i tyktoku prajekta, viadučaja vyśviatlaje ŭ minakoŭ staŭleńnie da sajtaŭ znajomstvaŭ, a taksama, kolki musić zarablać mužčyna ci kolki jamu varta vydatkavać na pieršaje spatkańnie, kab žančyna abaviazkova skazała «tak».
Sam kancept apytanak z vulic horada na temy mody, stylu, adnosin, hrošaj zrabiŭsia šalona papularnym u Rasii. «Ciažki Marks» sprabuje zaniać hetuju nišu ŭ Biełarusi.
«U tyktokach baču i dumaju: «Što, tolki ŭ Maskvie raspytvajuć tak? Treba ŭžo i ŭ Minsku», — abradavałasia adna z apytanych.
Błohierku ź dziciom nie puścili ŭ restaran «na minskich Patrykach». Čakajcie, dzie?
Chto składaŭ biełaruski bamond 1990-2000-ch i što stałasia z hetymi ludźmi