Chto składaŭ biełaruski bamond 1990-2000-ch i što stałasia z hetymi ludźmi
Uspaminajem niekatorych sielebryci, jakija ŭzryvali miedyjaprastoru na miažy stahodździaŭ.
Jahor Chrustaloŭ
Jašče ŭ studenckija hady Jahor staŭ viadoŭcam pieršaha biełaruskaha tok-šou — kažuć, prahramu «Karambol» raspracavali śpiecyjalna pad jaho. U 1997-m Chrustalova nazyvali seks-simvałam.
Paźniej viadoŭca pierajšoŭ na ANT, dzie byŭ tvaram prahramy «Vybar».
Paralelna z pracaj na telebačańni mužčyna pisaŭ pieśni. Budučy ŭ šlubie, Chrustaloŭ zakruciŭ raman sa śpiavačkaj Halinaj Šyškovaj. Nieŭzabavie ŭ pary źjaviŭsia syn Vania. Viadučy pryznaŭ dzicia, ale z aficyjnaj siamji nie syšoŭ. Ramantyčnyja stasunki z Halinaj na hetym skončylisia.
U 2009 hodzie Chrustaloŭ na niekatory čas źjechaŭ u Rasiju — pa jaho słovach, jon źbieh tudy ad burnaha asabistaha žyćcia. U Maskvie Jahor pracavaŭ pradziusaram na kanale STS, ale praz 5 hadoŭ viarnuŭsia ŭ Biełaruś. Ciapier jon kiruje pres-słužbaj u TAA «Jeŭratorh» (sietka kram «Jeŭraopt»).
Palina Smołava
Śpiavačka ź idealnaj fihuraj i seksualnym kaściumam pradstaŭlała Biełaruś na konkursie «Jeŭrabačańnie 2006» — tady dziaŭčyna zaniała 22-je miesca. Zrešty, zapomniłasia Palina nie pieŭčaj karjeraj, a adrazu niekalkimi skandałami.
U 2008 hodzie ahient Smołavaj śćviardžała, što śpiavačka rychtujecca zapisać trek z samim seram Połam Makartni. U dokaz pryvodziłasia fota, na jakim Palina i frontmien «Bitłz» stajać pryabniaŭšysia. Ale nieŭzabavie vyśvietliłasia, što zdymak nie sapraŭdny — Smołavu na jaho prosta pryfatašopili.
Nastupny niepryjemny incydent adbyŭsia z rasijskim aliharcham Viktaram Baturynym, jaki niepraciahły čas prasoŭvaŭ śpiavačku ŭ Maskvie. U toj momant, kali ŭ intervju biełaruskim ŚMI Smołava raskazvała, jak vydatna składajecca jaje karjera ŭ rasijskaj stalicy, ahienty Baturyna ŭsialak adchryščvalisia ad ich supracoŭnictva. Paźniej pradstaŭniki miedyjnaha ahienctva Baturyna zajavili, što Viktar nie tolki spyniŭ dziełavyja adnosiny sa Smołavaj, ale i «rasčaravaŭsia ŭ joj jak u čałavieku».
Ciapier byłaja zorka kiruje vakalnaj škołaj i nievialikim pradziusarskim centram. U studzieni 2010 hoda śpiavačka vyjšła zamuž za rasijskaha biznesmiena, jaki starejšy za jaje na 12 hadoŭ. Para abviančałasia ŭ Sabory Kazanskaj Ikony Božaj Maci na maskoŭskaj Krasnaj płoščy. Razam jany vychoŭvajuć traich dziaciej.
Venera (Natalla Kudryna)
Efiektnaja błandynka ŭvarvałasia ŭ biełaruskuju miedyjaprastoru ŭ pačatku nulavych. Natalla vykonvała pieśni na łamanaj anhlijskaj movie z mocnym akcentam, ale hetyja niedachopy zastavalisia niezaŭvažanymi — uvahu hledačoŭ adciahvali seksualnyja kaściumy śpiavački i jaje strojny stan. Zrešty, pieŭčaja karjera Vieniery nieŭzabavie zhasła.
Siońnia Kudryna pracuje stylistam, raźvivaje svoj brend adzieńnia i aktyŭna zajmajecca fitnesam.
Śviatłana Baroŭskaja
Uradženka Maładziečna ź dziacinstva maryła stać aktrysaj. Paśla škoły jana pastupiła ŭ Teatralna-mastacki instytut, dzie ŭ chutkim časie paznajomiłasia z budučym mužam. Akcior Anatol Kocienieŭ byŭ starejšym za Śviatłanu na adzinaccać hadoŭ i staranna dabivaŭsia błakitnavokuju pryhažuniu. Šlub tvorčych asob pratrymaŭsia 25 hod, ale ŭ 2014-m para raźviałasia — akazałasia, što Anatol šmat hadoŭ žyŭ na dźvie siamji.
Razład u asabistym žyćci ź liškam kampiensavała karjera. Šmat hadoŭ Baroŭskaja viadzie pieradačy «Dobraj ranicy, Biełaruś» i «Dobry dzień, Biełaruś», a taksama vystupaje ŭ roli kanfieranśje na «Słavianskim bazary» i inšych bujnych kancertach. Da statusu viadoŭdy dadaŭsia jašče adzin — Baroŭskaja pačała vykładać na fakultecie žurnalistyki BDU: navučaje studentaŭ akciorskamu majsterstvu i śpiecyficy žyvych efiraŭ.
U 2020 hodzie Śviatłana vyjšła zamuž druhi raz. Jaje abrańnikam staŭ biznesmien z Sankt-Pieciarburha.
Alaksandr Saładucha
Pa adukacyi Alaksandr Saładucha doktar — u 1982 hodzie jon skončyŭ Minski miedycynski instytut. U miedycynu budučaha śpievaka pryviała trahiedyja: baćka Alaksandra patrapiŭ u surjoznaje DTZ i ź ciažkimi traŭmami byŭ dastaŭleny ŭ balnicu.
Ale tvorčaść zaŭsiody vabiła Alaksandra. Jašče ŭ studenctvie Saładucha sprabavaŭ znajści šlach na scenu i ŭdzielničaŭ u šmatlikich kastynhach. U vaśmidziasiatyja jon sprabavaŭ prabicca ŭ viadomyja biełaruskija kalektyvy — «Pieśniary», «Vierasy» i «Siabry», ale atrymlivaŭ admovy. Niaŭdačy nie adviarnuli maładoha čałavieka ad mary, i praz hody namahańniaŭ jaho ŭziali salistam u arkiestr Michaiła Finbierha. Praŭda, praz hod Saładuchu zvolnili za prafnieprydatnaść.
Sapraŭdnaja słava pryjšła da śpievaka ŭ siaredzinie 90-ch z chitom «Zdravstvuj, čužaja miłaja», jaki prahrymieŭ pa rasijskim telebačańni. Artyst znoŭ pasprabavaŭ skaryć Maskvu, ale, paciarpieŭšy čarhovuju niaŭdaču, viarnuŭsia ŭ Minsk.
Akramia pieŭčaj karjery, niebiaschmarnym akazałasia i jaho asabistaje žyćcio. Saładucha byŭ žanaty trojčy i razvod z druhoj žonkaj vyliŭsia ŭ skandał.
Žančyna źviarnułasia ŭ ŚMI i raskazała, što «na raźvitańnie» śpiavak źbiŭ jaje zedlikam, a rukaprykładstva z boku Alaksandra było zvykłaj spravaj na praciahu ŭsich 16 hadoŭ ich sumiesnaha žyćcia. Toj kanflikt udałosia zamiać.
Siarod inšaha Saładucha ŭdzielničaŭ u zapisie prapahandysckaha himna «Lubimuju nie addajuć». Trek vyjšaŭ u vieraśni 2020 hoda i aktyŭna prasoŭvaŭsia na dziaržaŭnych radyjostancyjach.
Siarhiej Darafiejeŭ
Siarhiej Darafiejeŭ byŭ zorkaj telekanała ANT — jon vioŭ tok-šou «Vybar», jakoje, dziakujučy prafiesijanalizmu žurnalista, nabyło asablivuju vastryniu. Ale ŭ śniežni 2010 hoda papularnaja pieradača vyjšła ŭ efir apošni raz. Pryčynaj spynieńnia prajekta stała haračaje abmierkavańnie prezidenckich vybaraŭ i masavych akcyj pratestaŭ u efiry. Tady Lidzija Jarmošyna pakinuła studyju.
Na nastupny dzień paśla vychadu prahramy Łukašenka abrynuŭsia z krytykaj na viadučaha — Darafiejeva adchilili ad pracy i faktyčna vycisnuli ź biełaruskaha telebačańnia.
Nieŭzabavie žurnalist źjechaŭ va Ukrainu, dzie taksama pačaŭ budavać karjeru na TB. Potym Darafiejeŭ 3,5 hoda pražyŭ u Prazie, dzie pracavaŭ na «Radyjo Svaboda», adnak u 2018 hodzie viarnuŭsia ŭ Kijeŭ. Tut Darafiejeŭ ustupiŭ u štab kandydata ŭ prezidenty Ukrainy Ramana Biaśśmiertnaha i pačaŭ zajmacca infarmacyjnym supravadžeńniem jaho kampanii.
Pad čas 2020 hoda Darafiejeŭ padtrymlivaŭ pratest, a paśla pačatku poŭnamaštabnaj vajny va Ukrainie nieadnarazova asudžaŭ dziejańni rasijskich vajennych. Miarkujučy pa fejsbuku viadučaha, ciapier jon znoŭ žyvie ŭ Prazie i pracuje miedyja-mieniedžaram i pradziusaram.
Illa Mićko
Chit «Chali-hali, paratrupier» hurta «Leprykonsy» dobra viedajuć za miežami našaj krainy. U 1997 hodzie za raskrutku kalektyvu ŭziaŭsia viadomy rasijski łejbł «Sajuz», jaki pieravioz muzykaŭ u Maskvu. Frantmien hurta Illa Mićko pravioŭ u miehapolisie niekalki hadoŭ, ale potym pakinuŭ šumny horad.
Niekalki hadoŭ jon prapracavaŭ u Kijevie viadučym na radyjo, paśla čaho viarnuŭsia ŭ Biełaruś. Na radzimie Mićko adkryŭ studyju hukazapisu, a taksama vystupaŭ razam z kalehami pa kalektyvie na kancertach i karparatyvach.
Siońnia pra žyćcio muzykanta možna daviedacca ź jaho jutub-kanała: jon časta zapisvaje ŭłohi i dzielicca z padpisčykami receptami lubimych straŭ.
Biez małoha 15 hadoŭ Mićko žanaty. Z žonkaj Vieranikaj jany paznajomilisia ŭ kłubie. Pa ŭspaminach Illi, heta było kachańnie ź pieršaha pohladu.
Łarysa Hrybalova
Tvorčaja karjera Łarysy pačałasia ź pieramohi ŭ konkursie maładych vykanaŭcaŭ «Maładziečna-94». Paśla jaho maładaja artystka była zaprošana ŭ Nacyjanalny kancertny arkiestr Respubliki Biełaruś pad kiraŭnictvam Michaiła Finbierha, dzie ŭ jakaści salistki adpracavała z 1994 pa 2009 hod.
U dzievianostych Hrybalova zaźziała na TB: tady Jahor Chrustaloŭ zaprasiŭ dziaŭčynu stać viadučaj zabaŭlalnaj prahramy «Usio narmalna, mama!». Pieradača zrabiła furor i doŭhi čas zastavałasia ŭ topie ranišnich ajčynnych šou. Paralelna Hrybalova zajmałasia raźvićciom svajho śviatočnaha ahienctva.
Artystka zamužam, u šlubie vychoŭvaje traich dziaciej.
U lutym 2023 hoda stała viadoma, što artystka trapiła ŭ čorny śpis i ciapier nie moža vystupać na terytoryi Biełarusi. U listapadzie taho ž hoda źjaviłasia infarmacyja pra jaje zatrymańnie.
Alaksandr Ždanovič
Na «Kałychancy» z Malavanyčam vyrasła nie adno pakaleńnie biełarusaŭ. Biez małoha 20 hod Alaksandr Ždanovič źviartaŭsia z pažadańniami dobraj nočy da dzietak usioj krainy. Adnak u 2015-m televizijnaja karjera Ždanoviča zaviaršyłasia — novaje kiraŭnictva vyrašyła abnavić skład viadučych.
Ždanovič praciahnuŭ pracavać u teatry. Doŭhi čas śpiektakl «Bieh», pastaŭleny pa pjesie Michaiła Bułhakava «Dni Turbinych», paśpiachova išoŭ u Nacyjanalnym akademičnym dramatyčnym teatry imia Maksima Horkaha. U hetaj pastanoŭcy Ždanovič hraŭ adnu z hałoŭnych rolaŭ i ŭražvaŭ publiku hłybinioj svajho dramatyčnaha talentu.
Vosieńniu 2020 hoda, ubačyŭšy pryparkavanyja mikraaŭtobusy z amapaŭcami, Ždanovič dastaŭ z sumki draŭlany kryž, pačaŭ asianiać siłavikoŭ chrosnym znakam i čytać malitvu. Za hetuju akcyju Alaksandr atrymaŭ 9 sutak aryštu. Praź niekalki miesiacaŭ jon byŭ zvolnieny z teatra pa artykule. Ciapier akcior žyvie ŭ emihracyi i raduje hledačoŭ paznavalnymi rolikami u tyktoku.
Asabistaje žyćcio Malavanyča skłałasia trahična. Žonka Alaksandra, ź jakoj jany byli razam sa studenckaj łavy, pamierła ŭ 2015 hodzie. U pary zastałosia dvoje synoŭ.
Alaksandr Avierkaŭ
Avierkaŭ — kaleha Ždanoviča pa «Kałychancy», u svoj čas jon ahučvaŭ lalečnaha vaŭka Vovu.
Prapahandyst byŭ viadučym «Konturaŭ» i «Našych navinaŭ». Doŭhi čas jon ličyŭsia adnym ź lubimych žurnalistaŭ Łukašenki. U 2004 hodzie Alaksandr atrymaŭ Dziaržaŭnuju premiju Respubliki Biełaruś, u 2006-m byŭ uznaharodžany miedalom Francyska Skaryny, a ŭ 2010-m atrymaŭ zvańnie zasłužanaha dziejača kultury. U tym ža hodzie Łukašenka asabista pavinšavaŭ Avierkava z 50-hadovym jubilejem — viadučy pryznavaŭsia, što ad šoku «doŭha nie moh pryjści ŭ siabie».
Siońnia jon pracuje viadučym u dyrekcyi infarmacyjnaha viaščańnia ANT. Žurnalist dvojčy byŭ žanaty. Pieršaja žonka — Alena Akulonak, jaho adnakurśnica. Razam jany vychoŭvali dvaich dziaciej. Druhaja žonka — Anžalika Čarniajeva, pracuje pradziusaram i režysioram.
Tamara Lisickaja
Zorka biełaruskaha telebačańnia 90-ch zapaminałasia svajoj jarkaj źniešnaściu. Enierhičnaja rudavałosaja pryhažunia chutka spadabałasia hledačam. Jašče padčas vučoby na fakultecie žurnalistyki BDU Tamara pačała vieści muzyčnuju teleprahramu «Foxy Music» na «8 kanale», a potym była aŭtaram, viadučaj i režysioram štotydniovaha telečasopisa «12, abo na Noč hledziačy».
Na telebačańni karjera žančyny nie spyniłasia. Lisickaja stała papularnym dydžejem na radyjo, a taksama aŭtaram piaci knih. Siońnia Lisickaja raźvivaje novuju śfieru dziejnaści — jana pracuje art-terapieŭtam.
Maks Łorens (Maksim Sapaćkoŭ)
Repier staŭ viadomym paśla supracoŭnictva ź Siarohaj. U tandemie jany zapisali try pieśni: «Moj dvor: spartovyja prypieŭki», «Dyskamalaryja», «Chroniki chłapca z homielskich vulic».
Vykanaŭca da hetaha času zajmajecca tvorčaściu — u svaim akaŭncie ŭ instahram jon z zajzdrosnaj rehularnaściu pościć uryŭki novych piesień.
Muzyka žanaty, u šlubie vychoŭvaje syna.
Eleanora Jazierskaja
Televiadučaja i adna z samych ekstravahantnych žančyn biełaruskaha bamondu 90-ch naradziłasia ŭ 1946 hodzie i ŭsio žyćcio praviała ŭ Minsku. Jaje hołas biełarusy viedali pa «Sałonie Eleanory Jazierskaj», jaki vychodziŭ na BT, cykle aŭtarskich pieradač «Žančyny XX stahodździa» na STB i efirach na radyjo «Mir».
Jazierskaja zapomniłasia jarkimi aŭtfitami, śmiełymi vykazvańniami i maładymi paluboŭnikami. U 48 hadoŭ jana zakruciła raman z 23-hadovym Vitalom Žukavym. Mužčyna sprabavaŭ raskrucić karjeru ŭ jakaści artysta razmoŭnaha žanru Biełdziaržfiłarmonii, ale potym pieraklučyŭsia na antykvaryjat i navat adzin čas žyŭ u Paryžy.
Para rasstałasia pa inicyjatyvie Jazierskaj — jana kazała, što zanadta svabodalubnaja, kab źviazvać siabie sumiesnym žyćciom z mužčynam.
Śvieckaja lvica pamierła 16 maja 2014 hoda na 68-m hodzie žyćcia. Mierkavanaja pryčyna śmierci — vostraja sardečnaja niedastatkovaść. Jana pachavanaja na Maskoŭskich mohiłkach u Minsku. Praz hod paśla śmierci kvatera Jazierskaj była vystaŭlena na prodaž. Miarkujučy pa ŭsim, tady pakupnikoŭ elitnaj nieruchomaści nie znajšłosia i abjava iznoŭ uspłyła ŭ ŚMI niekalki miesiacaŭ tamu.
Kamientary