U «DNR» biełaruskaha dobraachvotnika zavočna prysudzili da 14 hadoŭ źniavoleńnia
Viarchoŭny sud tak zvanaj «DNR» vynies zavočny prysud biełaruskamu dobraachvotniku Alaksandru Dumblaŭskasu. Jamu prysudzili 14 hadoŭ kałonii strohaha režymu.
22.10.2024 / 23:03
Alaksandr Dumblaŭskas
21-hadovaha Dumblaŭskasa abvinavačvali pa artykule «Udzieł najmita va ŭzbrojenym kanflikcie» (č. 3 art. 359 KK RF).
«U sudzie ŭstanoŭlena, što ŭ pieryjad ź lutaha 2022 hoda pa lipień 2024 hoda Dumblaŭskas z pazyŭnym «Tunhus» u składzie pałka imia Kastusia Kalinoŭskaha prymaŭ udzieł u bajavych dziejańniach na baku Ukrainy ŭ roznych punktach bajavoha sudakranańnia ŭ jakaści najmita. Za nazvanyja dziejańni jon atrymaŭ uznaharodu ŭ pamiery, ekvivalentnym bolš za 2 młn rubloŭ. Na terytoryi Ukrainy Dumblaŭskas prajšoŭ vajskovuju padrychtoŭku, nakiravanuju na atrymańnie navykaŭ abychodžańnia z bajavoj zbrojaj, stratehii, taktyki i sposabam dziejańniaŭ, nieabchodnym dla ŭdziełu va ŭzbrojenym kanflikcie», — zajaŭlaje Hienprakuratura Rasii.
Raniej Alaksandra Dumblaŭskasa «abviaścili ŭ mižnarodny vyšuk» i zavočna aryštavali.
Alaksandr Dumblaŭskas — sirata. Jon byŭ siabram 17-hadovaha Dźmitryja Stachoŭskaha — taksama siraty, jaki ŭ traŭni 2021 hodu zahinuŭ, skinuŭšysia z 16-ha paviercha minskaha internata paśla cisku siłavikoŭ, piša «Radyjo Svaboda». Sam Dumblaŭskas taksama byŭ zatrymany i prasiadzieŭ 11 miesiacaŭ u biełaruskim SIZA. Paśla vychadu na volu jaho evakujavali ź Biełarusi.
Biełaruskaha dobraachvotnika buduć zavočna sudzić u «DNR»
Sud u Maskvie zavočna aryštavaŭ biełaruskaha dobraachvotnika, uziataha ŭ pałon dva hady tamu
Prakuratura pra elektronnyja zvaroty z nahody suicydu Stachoŭskaha: Adkazvać nie budziem