Paśla artykuła «Našaj Nivy» stvaralniki banknoty BRIKS razmyli jaje vyjavu. Ale pamyłki ŭsio roŭna bačnyja
Nahadajem, što Pucinu na samicie ŭ Kazani ekskluziŭna pakazali pratatyp ahulnaj valuty BRIKS, ale my adšukali jaje aryhinalny malunak i znajšli tam šerah hrubych niedakładnaściaŭ, asabliva datyčnych biełaruskaha dziaržściaha.
24.10.2024 / 21:02
Novaja razmytaja vyjava zvarotnaha boku pratatypa kupiury BRIKS, jakuju pastavili zamiest aryhinalnaha vyraznaha malunka banknoty na aficyjnym sajcie vytvorcy. Fota: armregistr.ru
Z katałoha aficyjnaha sajta rasijskaha Navukova-techničnaha centra ARM-Rehistr źnikli ŭsie vyraznyja malunki pracoŭnaha pratatypu adzinaj banknoty BRIKS naminałam 50 umoŭnych adzinak, ekzemplar jakoj byŭ učora pakazany Uładzimiru Pucinu na samicie arhanizacyi ŭ Kazani.
Ciapier zamiest vyraznych malunkaŭ na sajcie-krynicy stajać mocna razmytyja vyjavy z vadzianym znakam kampanii ARM-Rehistr. Adbyłosia heta praź niekalki hadzin paśla vychadu artykuła «Našaj Nivy» pra toje, što saboj ujaŭlajuć aryhinalnyja vyjavy banknoty BRIKS, i kolki ŭ jaje dyzajnie było znojdziena pamyłak.
Paraŭnańnie aryhinalnaj i razmytaj vyjavy piaredniaha boku kupiury BRIKS (naminał 50)
Paraŭnańnie aryhinalnaj i razmytaj vyjavy zvarotnaha boku kupiury BRIKS (naminał 50)
Padobnaje razmyvańnie vyjaŭ zvyčajna robicca dziela taho, kab schavać ahrechi ad čužych vačej. Adnak jany ŭsio roŭna bačnyja.
Tak, na piarednim baku banknoty na ściahi asnoŭnych členaŭ BRIKS niepraparcyjna nahruvaścili architekturnyja budynki i elemienty. A ŭ centralnym kole, jaki stvarajuć saboj ściahi, napisanyja nazvy ŭsich pieraličanych krain, akramia Kitaja, bo, jak stanovicca bačna, ijerohlify prosta nie ŭleźli tudy z-za vyjavy vysokaha cmoka.
U toj ža čas na zvarotnym baku banknoty ściahi adlustravanyja ŭ jašče bolš dziŭnaj formie, byccam krutavierć ci varonka, jakaja zasmoktvaje ŭ siabie ŭsie krainy-udzielnicy BRIKS. Zastałasia i prablema z łukašenkaŭskim dziaržaŭnym ściaham — zialony koler apynajecca ŭviersie, a čyrvony — unizie, bo ŭsie astatnija ściahi hladziać u centr.
Takim čynam ściah Biełarusi i ściah PAR, asnoŭnaha člena BRIKS (ściah respubliki namalavany dahary nahami ŭ adnosinach da centra kupiury), źjaŭlajucca adzinymi niapravilna adlustravanymi siarod usich astatnich.
Pratatyp kupiury BRIKS u rukach Pucina. Toj jaje razhladaje, abmiarkoŭvaje z čynoŭnikami i pakazvaje indyjskamu premjeru Narendru Modzi (vyjava ŭ centry). Foty: brics-russia2024.ru
Trochi kantekstu: jašče da samitu BRIKS u Kazani Pucin stanoŭča vykazvaŭsia pra mahčymaść stvareńnia ahulnaj valuty BRIKS i novaj sistemy mižnarodnych raźlikaŭ, alternatyŭnaj SWIFT, «dziela efiektyŭnaj baraćby z dalaram i lepšaha paźbiahańnia finansavych abmiežavańniaŭ z boku Zachadu».
A ŭčora na samicie Pucin adznačyŭ, što Rasija «vymušana šukać alternatyvu dalaru, bo sam Zachad abmiažoŭvaje jaho vykarystańnie dla Maskvy».
Kamientujučy padzieju, pres-sakratar Pucina Dźmitryj Piaskoŭ zajaviŭ, što pakazanaja Pucinu kupiura «simvalizuje ahulnuju pracu, jakaja viadziecca ŭ ramkach BRIKS», ale pry hetym dadaŭ, što banknota nie spadabałasia staršyni Centrabanka Rasii Elviry Nabiulinaj.
CVK apublikavaŭ łahatyp prezidenckaj kampanii. I znoŭ łoha CVK padobna da dyviersii
Make Russia small again. Zialenski pierajhraŭ viadomy słohan Trampa