Pucinu pakazali pratatyp valuty BRIKS, «jakaja abrynie dalar». Tam nie zdoleli pravilna namalavać ściah Biełarusi

Trochi kantekstu: jašče da samitu Pucin stanoŭča vykazvaŭsia pra mahčymaść stvareńnia ahulnaj valuty BRIKS i novaj sistemy mižnarodnych raźlikaŭ, alternatyŭnaj SWIFT, «dziela efiektyŭnaj baraćby z dalaram i lepšaha paźbiahańnia finansavych abmiežavańniaŭ z boku Zachadu».

A ŭčora na samicie Pucin adznačyŭ, što Rasija «vymušana šukać alternatyvu dalaru, bo sam Zachad abmiažoŭvaje jaho vykarystańnie dla Maskvy».

Pavialičyć

Kamientujučy padzieju, pres-sakratar Pucina Dźmitryj Piaskoŭ zajaviŭ, što pakazanaja kupiura «simvalizuje ahulnuju pracu, jakaja viadziecca ŭ ramkach BRIKS», ale pry hetym dadaŭ, što banknota nie spadabałasia staršyni Centrabanka Rasii Elviry Nabiulinaj.

Nabližanyja da kramloŭskaha puła žurnalisty padzialilisia nibyta dakładnymi vyjavami banknoty. 

Adrazu kidajecca ŭ vočy, što na adnym z bakoŭ kupiury (druhaja vyjava) čamuści adlustravany dziaržaŭny ściah Biełarusi i ściahi niekatorych inšych krain, jakija aficyjna nie źjaŭlajucca členami BRIKS, a tolki kandydatami na ŭstupleńnie.

Aproč dziŭnaha dyzajnu banknoty, možna zaŭvažyć, što z usich ściahoŭ tolki biełaruski, banhładešski i afhanski adlustravanyja niapravilna.

• U biełaruskim arnamient čamuści staić sprava, a nie źleva, bo ŭsie astatnija ściahi piarednim bokam nakiravanyja na centr banknoty.

• Z afhanskim ściaham (źleva ad biełaruskaha) taja ž prablema, bo ŭ aryhinale čorny koler pavinien znachodzicca źleva, a zialony — sprava. A kali siudy padklučyć i palityčny kantekst, to adlustravany na banknocie tradycyjny trochkolerny ściah Afhanistana zastajecca faktyčna zabaronienym talibami paśla ich prychodu da ŭłady ŭ žniŭni 2021 hoda. Padčas pieršych demanstracyj za zachavańnie trochkolernaha ściaha pratestoŭcaŭ zatrymlivali i navat zabivali.

• Banhładešski ściah (sprava ad biełaruskaha) u takim vyhladzie ŭvohule nie ličycca aficyjnym z 1972 hoda. Ciapierašni ściah krainy nie ŭtrymlivaje ŭ čyrvonym soncy nijakich inšych vyjavaŭ.

Pavialičyć

Piaredni bok banknoty taksama nie adstaje ad zvarotnaha pa ŭzroŭni vykanańnia. Na ściahi asnoŭnych členaŭ BRIKS niepraparcyjna nahruvaścili architekturnyja budynki i elemienty.

U centralnym kole, jaki stvarajuć saboj ściahi, napisanyja nazvy ŭsich pieraličanych krain, akramia Kitaja, bo, jak stanovicca bačna, ijerohlify prosta nie ŭleźli tudy z-za vysokaha cmoka.

Pavialičyć

Ale banknota, jakuju trymaje Pucin, zusim nie supadaje z tymi fota, jakija pakazvaje nabližany na kramloŭskaha puła telehram-kanał. Na pavialičanym zdymku bačna, što Pucin trymaje kupiuru naminałam 50 umoŭnych adzinak (a nie 100, jak na fota z kanała), a vyjava sa ściahami ŭ centry banknoty maje jašče bolš dziŭnuju formu.

Pavialičyć

Banknotu ŭ 100 umoŭnych adzinak prezientavali jašče ŭ vieraśni 2023 hoda. Nadrukavała jaje «Kiržackaja drukarnia». Na sajcie pradpryjemstva pišacca, što ŭsiaho takich banknot było stvorana tysiača i što ŭpieršyniu adna ź ich była prademanstravanaja rasijskim pasłom u Paŭdniova-afrykanskaj respublicy (PAR) na minułym samicie BRIKS, na jaki Pucin vyrašyŭ nie jechać z-za ryzyki być aryštavanym pa ordary Mižnarodnaha kryminalnaha sudu za złačynstvy va Ukrainie.

Taksama zhadvajecca imia hałoŭnaha dyzajniera kupiury (u tekście jaho nazyvajuć «prafiesijnym banknotnikam», i «patomnym mastakom») i dajecca tłumačeńnie jahonaha mastackaha padychodu pa stvareńni malunkaŭ i vyjavaŭ na banknocie. Supravadžajecca heta kłasičnaj rasijskaj prapahandaj šmatpalarnaha śvietu.

Pavialičyć

«Aŭtar dyzajnu kupiury — Juryj Jermakoŭ — patomny mastak Dziaržznaka. Juryj Viktaravič u svoj čas prymaŭ udzieł u raspracoŭcy bolš čym 10 valut dla roznych krain, tamu pracu pa stvareńni pracoŭnaha eskizu kupiury dla abjadnańnia krain BRIKS ja daručyŭ vyklučna jamu, bo jon prafiesijny «banknotnik». Ideju i kancepcyju jon uručnuju pieratvaryŭ u malunak, daŭ nam eskiz, a astatniaje zrabili palihrafisty.

Na piarednim baku banknoty pakazany dziaržaŭnyja ściahi i najbolš viadomyja simvały Brazilii, Rasii, Indyi, Kitaja i Paŭdniovaj Afryki. Na advarotnym baku raźmieščany ściahi i nazvy inšych krain, jakija padali zajaŭki na ŭstupleńnie ŭ BRIKS (Afhanistan na momant 2023 hoda nie padavaŭ zajavy. — «NN»), što simvalizuje ideju raŭnapraŭja krain-udzielnic BRIKS.

Usie vyjavy na kupiury stvorany ŭručnuju, biez vykarystańnia prahramnaha zabieśpiačeńnia. Malunki źjaŭlajucca čarnavymi i mohuć być źmienieny pa prapanovach krain-udzielnic BRIKS, kali banknota budzie ŭviedziena ŭ zvarot», — pisaŭ u 2023-m na sajcie drukarni jaje ŭładalnik Jaŭhien Fiodaraŭ.

Simvaličnaja kupiura BRIKS była vypuščana nakładam u tysiaču asobnikaŭ, a ich vyrab kaštavaŭ kala paŭmiljona rubloŭ (17 tysiač biełaruskich rubloŭ).

Pavialičyć

Tuju ž suvienirnuju banknotu ŭ 50 umoŭnych adzinak, jakuju ŭručyli Pucinu na samicie ŭ Kazani, my adšukali ŭ katałohu na sajcie asnoŭnaha partniora drukarni — Navukova-techničnaha centra ARM-Rehistr — uładalnikam jakoha taksama źjaŭlajecca Jaŭhien Fiodaraŭ.

Adna takaja banknota kaštuje 500 rasijskich rubloŭ (17 biełaruskich rubloŭ) i dastupnaja pa pieradzakazie.

Pavialičyć

Piaredni bok 50-ki amal nie adroźnivajecca ad 100-ki (z tymi ž dyzajnierskimi «fiškami»), čaho nielha skazać pra zvarotny bok kupiury, dzie ściahi adlustravanyja ŭ jašče bolš dziŭnaj formie, byccam krutavierć ci varonka, jakaja zasmoktvaje ŭ siabie ŭsie krainy-udzielnicy BRIKS.

Pavodle apisańnia da vyjavaŭ, hetaja fihura «ŭjaŭlaje saboj šmatpramianiovuju zorku, nakładzienuju na palichromnyja vyjavy ściahoŭ krain-udzielnic i kandydataŭ u členy BRIKS, stvarajučy simvaličnuju karcinu, jakaja nahadvaje hałaktyku, jakaja raźlatajecca, što padkreślivaje ideju raŭnapraŭnaha ŭdziełu krain u farmavańni šmatpalarnaha śvietu».

Pavialičyć

Pavialičyć

Promach sa ściaham Banhładeš na kupiury naminałam 50 byŭ vypraŭleny, a Afhanistan uvohule prybrali (choć na momant vieraśnia 2024 jon užo padaŭ zajaŭku na status kandydata na ŭstupleńnie).

Adnak situacyja sa ściaham Biełarusi stała navat horšaj. Uličvajučy toje, što ŭsie ściahi hladziać u centr, to ŭ biełaruskaha ściaha zialony koler apynajecca ŭviersie, a čyrvony — unizie (arnamient pry hetym zastajecca na pravilnym miescy). Takim čynam ściah Biełarusi i ściah PAR, asnoŭnaha člena BRIKS (ściah respubliki namalavany dahary nahami ŭ adnosinach da centra kupiury), źjaŭlajucca adzinymi niapravilna adlustravanymi siarod usich astatnich.

@nashaniva Što ahulnaha ŭ 70-hadovych Łukašenki i Erdahana? #łukašienko #biełorusy #minsksiejčas #biełaruśnovosti #briks ♬ The Thing Is - Ty Simon

Na samicie ŭ Kazani Pucin vystupiŭ za jašče bolšaje pašyreńnie składu krain BRIKS i zajaviŭ, što čalcami arhanizacyi nibyta chočuć stać zvyš 30 krain. Uličvajučy toje, što na pratatypie kupiury BRIKS dla Pucina ŭžo adlustravana krain 25, ci chopić miesca dla astatnich na budučych banknotach?

• 0
• 0
• 8
• 7
• 0
• 1
• 2
• 0