U Hiermanii vyznačyli moładzievaje słova hoda. Heta staražytny termin, ale z novym sensavym napaŭnieńniem
Za vybar słova adkazvała vydavieckaja kampanija Langenscheidt, stvaralnica słoŭnikaŭ niamieckaj movy, jakaja zładziła hałasavańnie siarod pradstaŭnikoŭ moładzi pa ŭsioj Hiermanii.
26.10.2024 / 21:31
Ilustracyjnaja vyjava. Krynica: Vecteezy
Niamieckaja moładź u jakaści svajho słova hoda abrała anhlijski termin «aura», jaki, pavodle Oksfardskaha słoŭnika, aznačaje «asablivuju atmaśfieru albo jakaść, jakuju stvaraje čałaviek ci pradmiet».
Pakaleńnie Z i pakaleńnie Alfa ŭ Hiermanii dadali da terminu novy sens, kab apisvać čałavieka, jaki zrabiŭ niešta dobraje. Praściej kažučy, heta krutaść, jakaja ŭźnikaje ŭ vyniku dobraha ŭčynku i moža być vyražanaja, jak ciapier papularna ŭ niamieckaj moładzi, u «ačkach aury», pieradaje ahienctva Euronews.
Samo słova «aura» ŭźnikła jašče ŭ antyčnaj Hrecyi i Rymie, dzie jano vykarystoŭvałasia dla abaznačeńnia «lohkaha vietru» abo «płyni pavietra». Słova aura na staražytnahreckaj (αὔρα) aznačała nie stolki niejkaje mistyčnaje abo duchoŭnaje paniaćcie, kolki fizičny fienomien, źviazany z pryrodaj abo dychańniem, jaki stvaraŭ atmaśfieru abo nastroj u paetyčnych i mifałahičnych apisańniach. U takim ža sensie słova pierajšło i ŭ łacinskuju movu padčas Rymskaj impieryi.
U sučasnym sensie, jak niabačnaje enierhietyčnaje pole vakoł čałavieka, słova «aura» pačało vykarystoŭvacca tolki ŭ XIX stahodździ, asabliva ŭ kantekście ezateryčnych i duchoŭnych praktyk, kali mnohija fiłosafy i daśledčyki (pieravažna brytanskija) sprabavali vyjavić abo apisać nieviadomyja enierhii, jakija nibyta vypramieńvajuć žyvyja istoty.
Konkurs na vyznačeńnie moładzievaha słova hoda, jak piša Euronews, pravodzicca ŭ Hiermanii z 2008 hoda, ale tolki čatyry hady tamu prava hałasavać pieradali niepasredna niamieckaj moładzi. Da hetaha hałasavać moh luby achvotny. U 2020 hodzie hałasavańnie stała dastupnym vyklučna dla moładzi va ŭzroście ad 11 da 20 hadoŭ, kab abranyja słovy sapraŭdy adlustroŭvali moŭnuju kulturu maładych ludziej.
Sioleta było zarehistravana kala 100 000 hałasoŭ — rekord za ŭsiu historyju konkursu. U minułyja hady niamieckaja moładź abirała takija słovy, jak goofy (2023 hod, miłaje słova dla apisańnia čałavieka, jaki vyhladaje ekscentryčnym abo niaŭkludnym), smash (2022 hod, aznačaje «padčapić» albo zaniacca seksam z kimści; słova pachodzić ad hulni dla znajomstvaŭ Smash or Pass), cringe (2021 hod, apisańnie čahości abo kahości, chto vyklikaje soram) i lost (2020 hod, słenh aznačaje niedachop asensavanaści abo pierśpiektyvy ŭ žyćci).
«Bu! Spužaŭsia?» Miem sa stromnym katom zapałaniŭ internet
Najelisia publičnaści: ludzi mocna źmianili svaje pavodziny ŭ sacsietkach
Drobiazi ź minułaha i novaha žyćcia. Nastalhičny trend u biełaruskim tyktoku