Jak heta — pracavać na bosa pakaleńnia Z? Heta zusim inšy typ načalnika
Nazirańni za pracaj pieršych mieniedžaraŭ novaha pakaleńnia śviedčać pra toje, što pracoŭnaje asiarodździe stanie mienš ijerarchičnym, bolš niefarmalnym i značna bolš aryjentavanym na ŭvahu da psichičnaha zdaroŭja, piša Wall Street Journal.
Pakaleńnie Z, abo zumiery — heta ludzi, jakija naradzilisia ŭ 1997-m i paźniej (na pracy heta kalehi, jakim mienš za 30 hadoŭ). Heta pieršaje pakaleńnie, jakoje nie zaśpieła žyćcia bieź internetu i sacsietak, a tamu virtualnaść dla ich — nieadjemnaja častka realnaści.
Materyjalnyja vyhody nie jość samametaj, hałoŭnaje dla ich — samarealizacyja, cikavaść da pracy i pryjaznyja adnosiny ŭ kalektyvie. U pracy zumiery mohuć prapanoŭvać niestandartnyja i cikavyja rašeńni, ale ŭ kamunikacyi da pradstaŭnikoŭ hetaha pakaleńnia jašče treba znajści padychod.
Niekali internet abmiarkoŭvaŭ, ci dobryja z zumieraŭ rabotniki, ale siońnia jany ŭžo nie tolki rabotniki, ale i kiraŭniki. Ciapier u ich jość mahčymaść upłyvać na pracoŭnaje asiarodździe, bo jany sami pačynajuć uvachodzić u šerahi kiraŭnictva. Choć pakul heta nie vielmi vialiki adsotak, z kožnym hodam kolkaść maładych bosaŭ pavialičvajecca. Tak što budźcie hatovyja da taho, što chutka ŭ kiraŭnictva pryjdzie novy typ mieniedžaraŭ.
Pracavać z zumierami — heta vyklik
Daśledavańni pakazvajuć, što pracavać z rabotnikami pakaleńnia Z moža być niaprosta: zbolšaha praz adsutnaść u ich patrebnych navykaŭ, a taksama matyvacyi.
U amierykanskim apytańni ResumeBuilder, padčas jakoha adkazy davali mieniedžary pa najmie, 58% skazali, što zumiery nieprystojna apranalisia, 57% — što pradstaŭnikam maładoha pakaleńnia ciažka hladzieć čałavieku ŭ vočy, a 47% paviedamili, što zumiery prasili nieabhruntavanuju hrašovuju kampiensacyju.
Ale heta słabyja baki, što bačać rabotniki stałaha vieku. I toje, što zdajecca im prajavaj biezadkaznaści, inšyja bačać jak prykmiety patencyjnych lidarskich jakaściaŭ.
«Reč nie ŭ tym, što jany nie chočuć pracavać, — kaža 64-hadovy Skot de Łonh, jaki kansultuje kiraŭnikoŭ na temu, jak kiravać maładymi kamandami. — Jany nie chočuć pracavać na ludziej, jakija staviacca da ich tak, jak stavilisia da nas, kali raśli my».
Časam heta vylivajecca ŭ žadańnie pieraadoleć ijerarchiju, dres-kod i subardynacyju.
U dadatak da hetaha pakaleńnie Z adkryta zrabiła kłopat pra psichičnaje zdaroŭje važnaj častkaj svajho žyćcia: vialiki adsotak zumieraŭ paviedamlajuć, što prachodzili terapiju ŭ psichołahaŭ — i hety adsotak značna bolšy, čym siarod bebi-bumieraŭ i milenijałaŭ. Pryčym pra atrymańnie psichałahičnaj dapamohi paviedamlajuć adnolkava pradstaŭniki i mužčynskaha, i žanočaha połu.
Krasoŭki na dziełavyja spatkańni i smajliki ŭ pracoŭnych pierapiskach
Ujaŭleńnie pra vaša sapraŭdnaje «ja» i vaša prafiesijnaje «ja» jak pra dźvie asobnyja identyčnaści ŭžo sastareła. Siońnia praca i asabistaje žyćcio płaŭna pierachodziać adno ŭ druhoje: tamu niama ničoha niezvyčajnaha ŭ tym, što supracoŭniki pryjazdžajuć na pracu ŭ krasoŭkach i spartyŭnym adzieńni, a taksama svabodna i adkryta łajucca ŭ ofisie. U dadatak jany vielmi časta vykarystoŭvajuć emodzi ŭ adkaz na paviedamleńni ŭ miesiendžarach.
Daśledčyki kažuć, što ŭsio heta jość admietnaj rysaj pakaleńnia Z, jakoje demanstruje vysoki emacyjny intelekt i nie baicca samaanalizu.
Pavodle spravazdačy, apublikavanaj letaś kampanijaj Deloitte, rabotniki pakaleńnia Z ličać empatyju druhoj pa važnaści rysaj svajho bosa. A mieniedžary, jakija imi kirujuć, staviać jaje na piataje miesca.
U pošukach emacyjnaha bałansu
Mnohija kiraŭniki pakaleńnia Z naviedvajuć raznastajnyja treninhi i retryty, kab daviedacca bolš pra svaje mocnyja i słabyja baki jak mieniedžara. Dla hetaha im davodzicca stavić pierad saboj pytańni kštałtu: «Jak ja prajaŭlajusia?» abo «Ci biaru ja na siabie adkaznaść za svaje rašeńni i dziejańni?»
Taksama maładyja kiraŭniki padzialajuć dumku, što kiravać roznymi ludźmi — značyć razumieć ich unikalnyja styli pracy i sposaby znosin.
Budavać pracu treba ŭ adpaviednaści z hetymi asablivaściami — zamiest taho, kab prymušać ludziej prytrymlivacca žorstkich standartaŭ, jakija, mahčyma, nie pasujuć padnačalenym.
Časam, kali kamanda nie moža zdać prajekt u termin, prablema moža być nie ŭ niedachopie zdolnaściaŭ supracoŭnikaŭ, a ŭ styli kiravańnia. Lepš daviedacca pra supracoŭnikaŭ bolš: kamuści ź ich zručna pracavać addalena, a kamuści patrebna praca ŭ ofisie i šmat kamunikacyi, niekaha treba ŭvieś čas padbadziorvać, a kahości — naadvarot, lišni raz nie čapać. Urešcie rešt, kali dać kožnamu supracoŭniku ŭmovy, patrebnyja jamu dla vykanańnia pracy najlepšym čynam, heta stanoŭča paŭpłyvaje na jakaść pracy ŭsioj kamandy ŭ cełym.
Ëść vypadki, kali psichaterapija nie maje sensu. A jość i vypadki, kali psichołah zrobić tolki horš
Znakamituju amierykanskuju aktrysu mocna krytykujuć za słovy pra zumieraŭ
Čamu mieniedžary-milenijały vyharajuć na pracy chutčej za inšych?
Prasunutyja ci zaležnyja? Starejšaje pakaleńnie avałodvaje hadžetami, i niezrazumieła, ci dobra heta dla ich i ichnich siemjaŭ
Kamientary