Źjeduć ad baćkoŭ paźniej, šmatzadačnyja i tvorčyja. Što sacyjołahi kažuć pra ciapierašnich dziaciej
Ich nazyvajuć «pakaleńniem alfa», i voś čym jano vyłučajecca.
Pakaleńnie alfa — ludzi, jakija naradzilisia (ci narodziacca) pamiž 2010 i 2025 hadami, hety termin prydumaŭ u 2008 hodzie aŭstralijski sacyjołah Mark Makkryndł. Niekatoryja daśledčyki nazyvajuć trochi inšyja časovyja pramiežki, ale jasna adno: havorka pra pieršaje pakaleńnie, jakoje całkam naradziłasia ŭ 21 stahodździ i maje šansy pabačyć stahodździe nastupnaje.
Ciapierašnija dzieci bačyli pandemiju kavidu, a kali kazać pra biełaruskaje pakaleńnie alfa, jano jašče i było śviedkam narodnaha ŭzdymu-2020. Šmat jakija dzieci bačyli ci čuli pra represii, jakija doŭžacca ŭ krainie dahetul, a taksama ryzykujuć trapić pad upłyŭ biełaruskaj prapahandy. Takija padziei farmujuć biełaruskich «alfaŭ» hetak ža, jak i inšyja charaktarystyki, ahulnyja pamiž siońniašnimi dziećmi ź lubych krain.
Alfa — samaje materyjalna zabiaśpiečanaje i technałahična padkavanaje pakaleńnie ŭ historyi, i jaho pradstaŭniki buduć žyć daŭžej, čym lubyja ich papiaredniki. Jany buduć daŭžej vučycca, paźniej pačnuć zarablać, i pakinuć baćkoŭski dom navat paźniej za svaich papiarednikaŭ — pakaleńni Y i Z. Technałohii dla ich — praciah ich samich.
Heta ŭžo druhoje pakaleńnie, jakoje raście ŭ atačeńni hadžetaŭ, i jany buduć zvykacca z technałohijami nakštałt smartfonaŭ i sacsietak jašče chutčej za svaich papiarednikaŭ.
Śviet biez sacyjalnych miedyja budzie im nieznajomy.
Ekśpierty zaŭvažajuć, što start pakaleńnia alfa supadaje sa źjaŭleńniem na rynku ajpadaŭ i inšych hadžetaŭ-płanšetaŭ.
Na toje, što alfa šmat času traciać na hadžety, možna pahladzieć pa-roznamu. Z adnaho boku, heta moža škodzić i fizičnamu zdaroŭju, i psichałahičnamu — mahčymyja prablemy z utrymańniem uvahi ci niedachop sacyjalizacyi ŭ śviecie afłajn. Z druhoha boku, siońniašnija internet-aktyŭnaści dajuć mahčymaść pa-novamu hladzieć na praces adukacyi i kamunikacyi. Dapamahajuć navat videahulni: dzieci, jakija vykarystoŭvajuć ich z rańniaha ŭzrostu, pryvučajucca praaktyŭna stavicca da vyrašeńnia prablem.
Alfa z rańniaha ŭzrostu daviedvajucca, što vakoł virujuć palityčnyja kryzisy, roznyja miedyja chočuć pieraciahnuć ich uvahu, a ŭ siecivie bahata fejkavaj infarmacyi. Ekśpierty pradkazvajuć, što ŭ vyniku takija dzieci mohuć vyraści ź niedavieram da uradaŭ svaich krain i da navakolnych miedyja, tamu siońniašnim baćkam varta vučyć małych krytyčnamu myśleńniu i ŭmieńniu brać infarmacyju z pravieranych krynic, a taksama pierapraviarać fakty. Hetyja navyki dapamohuć dziciaci razabracca, dzie ŭ internecie praŭda, a dzie — chłuśnia.
Ciapierašnija dzieci rastuć u śviecie, jaki vučycca šanavać raznastajnaść — roznyja rasy, uzrosty, ludziej roznaha połu, vyhladu, pohladaŭ i seksualnaj aryjentacyi. Tamu ad ich možna čakać bolšaj zdolnaści prymać tych, chto da ich niepadobny, bolšaj adkrytaści.
Taksama pradstaŭniki pakaleńnia alfa dapytlivyja, lohka adaptujucca i lubiać usio praviarać na praktycy. Chutki dostup da infarmacyi daje im mahčymaść daviedacca pra što zaŭhodna ŭ luby čas. Im chočacca naležać da peŭnaj supolnaści, ale ŭ toj ža čas hetyja dzieci chočuć adroźnivacca ad inšych i ekśpierymientavać, i im nie budzie strašna kiravacca ŭ žyćci svaimi žadańniami. Hetaje pakaleńnie admovicca ad strachaŭ vyražać siabie i svaju identyčnaść.
Ź inšaha boku, jość danyja, što častaje vykarystańnie smartfonaŭ i sacsietak źviazanaje z rostam vypadkaŭ depresii i tryvožnaści siarod moładzi, a taksama z usio čaściejšym adčuvańniem adzinoty. Hetyja aktyŭnaści prymušajuć «alfaŭ» žadać usio paŭsiul i adrazu, a ŭ vyniku jany robiacca nieciarplivymi i ryzykujuć zaŭsiody adčuvać niezadavolenaść žyćciom.
Što da pracy, alfa chutčej addaduć pieravahu asabistamu žyćciu, čym pracy. Im spadabajecca mahčymaść admovicca ad tradycyjnaha pracoŭnaha dnia ŭ ofisie i zamiest hetaha vybrać hnutki hrafik z addalenaj pracaj. Dla alfa budzie važna adčuvać sens svajoj pracy, atrymlivać zvarotnuju suviaź i pryznańnie svaich namahańniaŭ. Jany nie zastanucca ŭ daŭhu: čakajcie ad «alfaŭ» śviežy pohlad na žyćcio, bahata entuzijazmu i žadańnia vučycca.
Niamała skazana pra toje, što šmatzadačnaść škodzić praduktyŭnaści, ale novaje pakaleńnie budzie joj dobra vałodać. Alfa zdolnyja chutka pieraklučacca pamiž roznymi ekranami, zadačami i razmovami, jany mohuć vučycca chutčej i našmat lepš za svaich papiarednikaŭ zachoŭvajuć infarmacyju.
A jašče alfa majuć dostup da bolšaj kolkaści danych, čym luboje minułaje pakaleńnie, i kali im treba znajści rašeńnie, jany zaŭsiody mohuć zahuhlić patrebnuju infarmacyju, kab zrabić patrebnyja vysnovy.
U vyniku my majem pakaleńnie, jakoje rana vučycca inavacyjnamu i tvorčamu padychodu ŭ pryniaćci rašeńniaŭ, što spryjaje pradprymalnickamu duchu «alfaŭ».
Napeŭna, pakaleńniu alfa daviadziecca žyć va ŭmovach darahoŭli enierhii, davać rady klimatyčnamu kryzisu. A taksama zmahacca z nastupstvami taho, jak sacsietki i inšyja anłajn-resursy ŭpłyvajuć na psichičnaje zdaroŭje — niezdarma pra jaho ciapier tak šmat kažuć.
Pakaleńnie alfa budzie budavać novuju Biełaruś, tamu varta padumać zahadzia pra toje, jakija pryncypy my ŭ jaho ŭkładajem.
«Naša Niva» — bastyjon biełaruščyny
PADTRYMAĆVoś jak pamianiałasia francuzskaje hramadstva. Toje samaje čakaje hramadstva biełaruskaje?
Kamientary