Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»
Расійскі тыкток-блогер казахскага паходжання Азамат Айталіеў, які мае больш за 2,6 мільёна падпісчыкаў, прыляцеў у Мінск. Робіць што звычайна: танчыць і ходзіць па рэстаранах. Але не ўсім беларусам падабаюцца яго паводзіны.
23.11.2024 / 07:00
Тут і далей скрыншоты відэа Азамата Айталіева
Папулярным блогерам Айталіеў стаў у 2021 годзе. Тады ў тыктоку завірусіўся яго дзіўны танец пад песню, прысвечаную самому сабе. Шмат іншых блогераў пачалі запісваць відэа пад яго гук.
Азамат любіць вандраваць, танчыць і смачна есці. Цяпер ён у Мінску. Блогер вырашыў прайсціся з інспекцыяй як па даволі дарагіх рэстаранах беларускай сталіцы, так і па бюджэтных сеткавых.
На адзін са сняданкаў блогер адправіўся ў самы высокі рэстаран Мінска з цудоўным відам на горад — The View.
Трэба адзначыць, што Азамат — далёка не самы ветлівы наведвальнік. Калі яму патрэбны афіцыянт, ён проста крычыць на ўсю залю: «Афіцыянт!» А калі малады чалавек раіць яму на сняданак узяць аўсянку, адказвае: «Аўсяную? Гэта ж як у псіхушцы даюць кашу» (гэты «жарт» ён любіць паўтараць у розных месцах, калі яму прапаноўваюць нейкую кашу). Нагодай для не вельмі арыгінальных жартаў становяцца і яйкі, якія ўваходзяць у склад шакшукі.
У выніку блогер папрасіў прынесці «Шчыльны сняданак» за 20 рублёў.
— Бекон — нейкі жах, — смяецца Азамат і сцвярджае, быццам бекон учорашні.
Потым ён паклікаў адміністратарку, каб сказаць, што з усяго сняданку можна есці толькі яйкі. Што было далей, не вельмі зразумела, бо ў наступным відэа Азамат ужо сыходзіць з рэстарацыі.
Мабыць, у гэты момант персанал ужо раздражнёны максімальна, бо адміністратарка на пытанне блогера, куды ж едзе панарамны ліфт, міла адказвае: «У пекла. Сардэчна запрашаем!»
Азамат жа здаецца вельмі задаволеным вынікам і смяецца:
— Бачыце, гэта адзіны рэстаран, дзе ёсць ліфт у пекла.
У Grand Café расійскаму блогеру таксама не спадабалася. Правакаваць афіцыянтку ён пачаў адразу. На пытанне «Што для вас прыгатаваць?» Азамат адказаў: «Мне здаецца, вы павінны спачатку прадставіцца». Ён наўмысна перакручвае некаторыя словы. Пачуўшы «ў якасці аперытыву» кажа: «Нічога не зразумеў. У якасці апельсіну?»
Замовіў блогер боршч і салату «Цэзар».
— Дзяўчынкі, хлопчыкі, паглядзіце: мне прынеслі «Цэзар». Выглядае жудасна. Не ведаю, да чаго гэта падобна, але за 36 рублёў гэта брыдкая падача. Быццам бамжу падалі. Жарыце, на здароўе.
Блогер усё ж частуецца салатай і незадаволена моршчыцца. Кажа, што гэта немагчыма есці.
— Не ведаю, можа, у беларускай кухні так гатуюць «Цэзар».
Ён папрасіў паклікаць адміністратара і пачаў вучыць яго таму, як трэба падаваць салату. Адміністратар трымаецца і просіць паказаць прыклад таго, як, па меркаванні блогера, павінен выглядаць эталонны «Цэзар».
— Я думаю, ваш кухар павінен ведаць, як выглядае «Цэзар». Я ў афіцыянта спытаў, ці класічны ў вас «Цэзар». Ён адказаў «так». Ну выбачайце, тады падайце класічны. Калі аўтарскі, дык гэта трэба данесці кліенту: «У нас незвычайная салата, у нас па-свойму».
Адміністратар прапаноўвае замяніць салату і перадаць шэф-кухару ўсе пажаданні кліента.
Баршчом Азамат застаўся незадаволеным:
— Быццам я прыйшоў не ў рэстаран, а ў сталоўку.
Завітаў Азамат і ў рэстаран «Лебядзіны». Там блогер вырашыў пачаставацца «Бярозавымі пельменямі», якія каштуюць ажно 61 рубель за порцыю (у талерцы можна налічыць усяго 7 пельменяў). Нават сам блогер пацікавіўся, ці не залатыя яны. Але не, высветлілася, што цана такая за кошт краба, які знаходзіцца ўнутры.
Азамат вырашыў праверыць нервовую сістэму адміністратаркі і сказаў, што есці іх немагчыма. Але потым усё ж удакладніў, што немагчыма, таму што пельмені нерэальна смачныя.
Блогер таксама замовіў дранікі з трыма відамі ікры — чорнай, чырвонай і шчупаковай. Тры дранікі (і ікра, як прызнаўся афіцыянт, «для дэкору») абышліся яму ў 41 рубель. Але таксама вельмі спадабаліся.
Завітаў Азамат і ў бюджэтныя «Васількі». Пачуўшы ад афіцыянта, што тут беларуская кухня, блогер удакладніў: «А вы мяне не атруціце?» Тут мужчына папрасіў дранікі і бульбяную бабку. І не ўстрымаўся ад жарту: «Бабу-Ягу, ха-ха».
Відавочна, Азамат шукаў магчымасць для стварэння канфлікту. Ён паспрабаваў замовіць «Аліўе» без гарошку. Але блогеру ўсё ж зрабілі салату, як ён хацеў. Ён адзначыў «сталоўская смачная ежа», а потым удакладніў у афіцыянткі:
— Колькі гэта каштуе па-нашаму? (афіцыянтка адказвае, што 11 беларускіх рублёў — гэта крыху менш за 500 расійскіх. — НН). Калі сапраўды, мне спадабалася. Я не скажу, што гэта павінна быць у дарагіх рэстаранах — гэта будзе проста. А вось у такім рэстаране — кухні вашай нацыянальнай — мне падаецца, гэта смачна.
Акрамя паходаў па рэстарацыях, Азамат запісаў відэа са сваімі фірмовымі танцамі на Кастрычніцкай плошчы і побач з Нацыянальнай бібліятэкай. Але ж далёка не ўсім беларусам падабаюцца яго паводзіны. Блогеру часта пішуць, што ў нашай краіне так сябе паводзіць не прынята.
У мінскай краме прадаюць пасылкі, якія згубіліся ў працэсе дастаўкі. Блогерцы папаўся вібратар
У Мінску адкрыўся антуражны рэстаран. Выклікаць афіцыянтаў там трэба асаблівым спосабам
Улад А4 адкрыў фірмовую краму ў мінскім ЦУМе
З кавай, цукеркамі і касметыкай: выбіраем адвэнт-календары, зробленыя ў Беларусі