Kanał «Rośsija» raskazaŭ, jak siamiejnaja para rasiejcaŭ z tatu na tvary pakutuje ŭ Polščy. A heta biełarusy, i ŭ ich usio dobra
Biełarusy Maja i Aŭhust Łunares — siamiejnaja para ź Biełarusi, jakaja ciapier žyvie ŭ Polščy. Maładziony viaduć łajfstajł tyktok i telehram, dzie raskazvajuć pra žyćcio ŭ emihracyi. U pryvatnaści, dzielacca ŭražańniami ad pracesu pošuku pracy, kali ŭ ciabie niefarmalnaja źniešnaść.
02.12.2024 / 18:57
Maja i Aŭhust u svaim błohu raźvienčvajuć mify pra žyćcio ludziej ź vialikaj kolkaściu tatu i pirsinhu. Skrynšot: @lunareslife
U Mai i Aŭhusta na ciele tolki adnych parnych — 16 tatuirovak. Malunki razam ź pirsinham pakryvajuć i tvar, ale, pa słovach pary, ich źniešni vyhlad nikoli nie rabiŭsia pryčynaj admovaŭ u pracy.
Fota: instahram @august_lunares
«Za ŭsio žyćcio ŭ nas ni razu nie było situacyi, kab nam admovili ŭ pracy. My sami admaŭlajemsia ad vakansii ci zvalniajemsia. Za 1,5 hoda [u emihracyi] byli tolki dźvie situacyi ź pirsinham: pieršaja — na składzie Zara, tamu što tam ź pirsinham nielha. Druhaja — na zavodzie, na jaki my sprabavali ŭładkavacca — tam taksama nielha nasić bižuteryju pa praviłach biaśpieki. I my sami admovilisia ad vakansij tam, tamu što nie hatovyja zdymać pirsinh dziela pracy», — raskazali maładziony.
Fota: @lunareslife
Hetaj temie para pryśviaciła i asobny rolik u svaim tyktoku paśla taho, jak pra ich vypuścili siužet na rasijskim telebačańni, nazvaŭšy rełakantami z Rasii, jakija źjechali ŭ Jeŭropu ŭ pošukach lepšaha žyćcia. U roliku śćviardžałasia, što da dziaŭčyny i chłopca palaki staviacca drenna i nie dajuć im pracu akurat praź źniešni vyhlad.
U budučyni siamja maryć adkryć ułasny tatu-sałon. Aboje pracavali majstrami i navat paznajomilisia ŭ tatu-sałonie: Aŭhust pryjšoŭ da Mai na sieans, potym na čarhovy, tak i zakruciŭsia raman, jaki aformiŭsia ŭ šlub. Ale na dadzieny momant jany chočuć papracavać na «zvyčajnych» pracach, kab nakapić na vandroŭku mary.
Natalla Piatkievič: Tyktok staŭ našaj jadziernaj zbrojaj
Jašče kala 800 biełarusaŭ dadali ŭ rasijskuju bazu vyšuku za paŭhoda. Praviercie siabie i blizkich
«Čyłovy chłopiec» dabraŭsia i da Biełarusi. Što heta za miem?