Jašče kala 800 biełarusaŭ dadali ŭ rasijskuju bazu vyšuku za paŭhoda. Praviercie siabie i blizkich
Za 6 miesiacaŭ Rasija dadała ŭ bazu vyšuku 773 hramadzian Biełarusi i ŭradžencaŭ našaj krainy — usiaho ŭ joj bolš za 3 500 čałaviek. «Miedyjazona» abnaviła śpis biełarusaŭ, jakich šukajuć u Rasii (a značyć i ŭ Biełarusi). Ciapier možna pravieryć pa pošuku siabie i svaich blizkich.
Kaho šukajuć?
U abnoŭlenym śpisie tych, chto adšukvajecca, znachodzicca kala 30 byłych palitviaźniaŭ.
Naprykład, šukajuć byłoha barmena homielskaj ustanovy «Kvaternik» Hleba Vietaškina, zatrymanaha za padpisku na hrupu «Čaj z malinavym vareńniem». Jaho pakarali 5 hadami chatniaj chimii za ŭdzieł u pratestach, ale nieŭzabavie Viarchoŭny sud zamianiŭ termin na 1,5 hady kałonii. Vietaškin źjechaŭ ź Biełarusi i paźniej byŭ abjaŭleny ŭ vyšuk.
Były źniavoleny pa abvinavačańni ŭ hvałcie nad milicyjanieram Vadzim Chižniakoŭ taksama abjaŭleny ŭ miždziaržaŭny vyšuk. Jak i Stanisłaŭ Paŭlinkovič, jakoha padčas adbyćcia chimii pieraviali ŭ kałoniju. Paśla vychadu na svabodu jany źjechali ź Biełarusi. Ciapier ich znoŭ šukajuć.
Jašče ŭ vyšuk abviaścili Hleba Hatoŭku, jaki vyjšaŭ na volu paśla 4 hadoŭ u źniavoleńni, Hienadzia Śmirnova, jakomu paśla kałonii pryjšłosia źjechać ź Biełarusi razam z synam, Aleha Filipava, jaki adbyŭ 1,5 hady pa abvinavačańni ŭ abrazie Łukašenki i inšych byłych palitviaźniaŭ.
Druhaja vialikaja hrupa ŭ abnoŭlenaj bazie vyšuku — žurnalisty. Siarod ich jość žurnalisty-rasśledavalniki z «Biuro Miedyja»: Alaksandr Jaraševič, Ksienija Viaźnicava, Alaksiej Karpieka i Volha Alchimienka.
U vyšuku znachodziacca try pradstaŭniki «Biełaruskaha rasśledavalnickaha centra»: Stanisłaŭ Ivaškievič, kiraŭnik sajta Łoła Buryjeva i viadučaja prahramy Weekly Top Fake Alena Čarniaŭskaja.
U śpisie akazaŭsia i były kiraŭnik biełaruskaj słužby «Radyjo Svaboda», žurnalist Alaksandar Łukašuk, deputat Viarchoŭnaha Savietu i žurnalist Siarhiej Navumčyk, žurnalist i litredaktar Siarhiej Dubaviec, suprać jakoha zaviali kryminalnuju spravu, u tym liku pra «admaŭleńnie hienacydu biełaruskaha naroda» i «dyskredytacyju». Biełarusi».
U vyšuku znachodziacca niekalki žurnalistaŭ telekanała «Biełsat», naprykład, Ihar Kulej i Źmicier Mickievič.
Akramia ich šukajuć kiraŭnika spartyŭnaha sajta tribuna.com Maksima Bierazinskaha, vydaŭca interniet-haziety «Salidarnaść» Alaksandra Starykieviča, žurnalistaŭ Dźmitryja Biahanskaha i Alaksieja Hulickaha, žurnalistaŭ Kaciarynu Pytlevu, Ihara Pałynskaha, Zoju Chruckuju i fatohrafa Alaksandra Vasiukoviča, jaki źjechaŭ ź Biełarusi paśla prysudu za ŭdzieł u pratestach.
Jašče adna značnaja hrupa ŭ vyšuku biełarusaŭ — dobraachvotniki, aktyvisty, palityki.
U vyšuk abviaścili biełaruskich dobraachvotnikaŭ va Ukrainie Arcioma Moładava, Andreja Traceŭskaha, Radzivona Batulina i Paŭła Kuchto, pradstaŭnika Pałka Kalinoŭskaha i brata zahinułaha padčas pratestaŭ fanata z Maładziečna Mikity Kryŭcova.
Šukajuć suzasnavalnicu inicyjatyvy dissidentby Marynu Kasinierovu i pravaabaroncu Siarhieja Sysa.
Apynuŭsia ŭ vyšuku i 74-hadovy Jan Dziaržaŭcaŭ — stvaralnik hramadskaj inicyjatyvy «Chajsy — viciebskija «Kurapaty»».
U vyšuku znachodziacca palityk Viačasłaŭ Siŭčyk i były turemny doktar Vasil Zavadski, analityk Vadzim Mažejka i zavočna asudžany na 10 hadoŭ kałonii pa spravie «analitykaŭ Śviatłany Cichanoŭskaj» Aleś Łahviniec.
Taksama ŭ śpisie jość šmat svajakoŭ tych, chto tak ci inakš patrapiŭ pad represii.
Šukajuć Mikitu Kuliniča — syna Alaksandra Kuliniča, jaki pamior u bresckim SIZA. U izalatary mužčyna čakaŭ suda pa spravie ab abrazie Alaksandra Łukašenki.
U vyšuk abjaŭleny siostry prarasijskaj aktyvistki Elviry Mirsalimavaj — Nina i Kryścina.
U bazie jość i maci aktyvista Illi Mironava Valancina i maci byłoha palitviaźnia Viktara Parchimčyka, eks-advakatka Halina Parchimčyk.
Taksama ŭ vyšuk abvieščana šmat ludziej, jakich niemahčyma abjadnać u peŭnuju hrupu. Heta muzykanty, błohiery, akciory, režysiory, dyzajniery, biźniesmieny i pradstaŭniki inšych śfier.
Naprykład, tvorčy duet režysiora Andreja Kašpierskaha i akciora-kupałaŭca Michaiła Zuja — stvaralnikaŭ prajektu «ČynČeneł» i šoŭranieraŭ sieryjała «Pracesy». Lidar hurta «Daj Darohu!» Juryj Stylski i ŭdzielnik hrupy «Minimum dystancyi» Jaŭhien Šuma.
Raman Siemianienia, jaki ŭ rasśledavańni «BRC» byŭ nazvany kiraŭnikom litoŭskaj kampanii, z dapamohaj jakoj Biełaruś abychodziła sankcyi.
Dyzajnierka Volha Kardaš, jakaja adkryła ŭ Varšavie «Dom Busłoŭ» — prastoru z adzieńniem, meblaj i knihami.
Błohier ź Lidy Jahor Tubielevič i tyktokier Arsienij Kuźmiančuk.
Režysiorka Karyna Chackalova, byłaja salistka Bresckaj fiłarmonii i vykładčyk Bresckaha muzyčnaha kaledža Alaksandra Maminava.
Jaŭhien Machlin-Tkačenka, jaki ŭ 2018 hodzie jon byŭ kiraŭnikom nakiravańnia pa mižnarodnych prajektach sajta Realt.by. Adzin ź milicejskich kanałaŭ nazyvaŭ jaho datyčnym prajektu kamandy Viktara Babaryka «Sumlennyja ludzi».
Vykładčyk historyi i redaktar biełaruskaj «Vikipedyi» Anton Dzieručenka. Ała Kasabuckaja, jakaja stała pieršaj biełaruskaj, jakaja skaryła Evierest i 6 top-marafonaŭ — Bostan, Ńju-Jork, Čykaha, Łondan, Bierlin i Tokia.
Jak pravieryć siabie
Vydańnie «Miedyjazona» sabrała danyja pa biełarusach u miždziaržaŭnym vyšuku. U tablicy čaściej nie paznačana, pa jakim artykule šukajuć čałavieka. Zamiest hetaha — nadpis «rasšukvajecca pa artykule KK» i kantaktny numar adździaleńnia palicyi. Časam u apisańni pakazany admysłovyja prymiety i fatahrafii, jakija adšukvajucca.
Znakam «+» adznačany tyja, kaho dadali ŭ bazu ŭ pieryjad ź lutaha pa krasavik 2024 hoda. Tyja, kaho za hety čas ź jaje vydalili — adznačany kryžykam «ch».
Znajści patrebnaje proźvišča možna ŭ tablicy z dapamohaj pošuku.
Pamiatajcie, što navat kali vas niama ŭ rasijskaj bazie vyšuku, heta nie značyć, što suprać vas niama kryminalnaj spravy ŭ Biełarusi.
Ciapier čytajuć
«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było66
Kamientary