«Čyłovy chłopiec» dabraŭsia i da Biełarusi. Što heta za miem?
Biełarusy malujuć piersanaža miema na fonie dźviarej HUBAZiKa i pobač ź jadziernym hrybam.
Historyju pośpiechu hetaha internet-miema možna spraviadliva nazvać absalutna vypadkovaj. U jaho asnovie vyjava antrapamorfnaha sabaki, apranutaha ŭ šery švedar, džynsy i čyrvonyja kiedy-konviersy. Chłopiec zasunuŭ ruki ŭ kišeni i trochi ŭchmylajecca, vyhladajučy spakojnym i abyjakavym.
Piersanaž, namalavany mastakom Fiłam Benksam, źjaviŭsia bolš za hod tamu. Jon zapościŭ karcinku ŭ svaim tvitary 4 kastryčnika 2023 hoda, dadaŭšy da jaje podpis:
«Moj novy piersanaž. Usia sutnaść u tym, što jon čyłovy chłopiec (chill guy), jakomu na ŭsio plavać».
Piersanaž zdabyŭ nievialikuju papularnaść u sacsietcy. Ludzi stali kapiravać tekst, źmianiajučy karcinku, abo rabili parodyi na čyłovaha chłopca, źmianiajučy jamu adzieńnie, źniešnaść, dadajučy roznyja elemienty.
Na 1 krasavika 2024 hoda Benks apublikavaŭ dakładnuju supraćlehłaść čyłovaha chłopca — chmuruju «niečyłovuju dziaŭčynu» (Unchill gal), patłumačyŭšy, što heta jahony stary piersanaž.
Miljony na čyle
Sapraŭdy miemnym hety sabaka staŭ u kancy žniŭnia, kali ŭ tyktoku karystalnik pad nikam @blitzerzz zapościŭ słajdšou ź im. U vieraśni pačali źjaŭlacca videa ź piersanažam i čyłovymi cytatami, jakija niečakana stali nabirać miljony prahladaŭ. U videa spačatku pad spakojnuju muzyku raspaviadajecca pra niešta stresovaje i składanaje, a kančajecca ŭsio vyjavaj piersanaža i podpisam «ale ty prosta čyłovy chłopiec». U tvitary pačali aktyŭna repościć tvit Benksa z aryhinalnaj karcinkaj čyłovaha chłopca.
20 listapada 2024 hoda karcinka zdabyła treciaje naradžeńnie, kali niechta stvaryŭ miemkoin pad nazvaj «CHILLGUY», jaki dasiahnuŭ rynkavaj kapitalizacyi ŭ 488 miljonaŭ dalaraŭ. Miem z čyłovym chłopcam zatviciŭ navat prezident Salvadora Naib Bukiele, viadomy tym, što pry im kraina aktyŭna ŭkładaje hrošy ŭ bitkojny, jakija na chvali rostu byccam by prynosiać u kaznu sotni miljonaŭ dalaraŭ.
Čyłovy chłopiec iznoŭ zapałaniŭ anhłamoŭny internet, a jaho vobraz stali vykarystoŭvać u rekłamnych akcyjach bujnyja karparacyi, spartyŭnyja kamandy i śpievaki.
Naprykład, jeŭrapiejski akaŭnt Sprite apublikavaŭ ryłs z čyłovym chłopcam, jaki pje haziroŭku: «Kali ŭ hrupavym čacie ihnarujuć tvaje paciešnyja žarty, ale heta okiej, tamu što ty prosta čyłovy chłopiec, jakomu padabajecca ŭłasny humar».
U internecie taksama možna kupić roznyja tavary, nalepki, futbołki i fihurki z vyjavaj čyłovaha chłopca.
Heta aburyła aŭtara čyłovaha chłopca, jaki ŭ svaim tvitary zajaviŭ, što nie davaŭ dazvołu na vykarystańnie svajho tvora ŭ krypcie. Filip Benks zajaviŭ, što płanuje padać skarhu suprać stvaralnikaŭ «haŭnakoinaŭ» i inšych tavaraŭ, jakija niezakonna vykarystoŭvajuć jahony tvor. Paśla zajavy Benksa cana tokiena «CHILLGUY» abvaliłasia na 54%, ale chutka adnaviłasia. U internecie naźbirali aŭtaru miema kala $300 tysiač danataŭ, ale Benks pakul imi nie zacikaviŭsia.
Navat źjavilisia asobnyja akaŭnty ŭ sacsietkach, jakija pościać najlepšyja miemy z sabakam. Na kaniec listapada instahram-akaŭnt sabraŭ užo zvyš 50 tysiač padpisčykaŭ, tvitar-akaŭnt — kala 75 tysiač padpisčykaŭ. Tvitarski akaŭnt sa značkom vieryfikacyi, jaki pry Masku pradajuć usim zapar, nie maje nijakaha dačynieńnia da Fiła Benksa, ale padpisany tolki na jaho akaŭnt. «Hety chłopiec [Fił Benks] navat nie ŭjaŭlaje, što zrabiŭ. Kožny ryłs u majoj stužcy — heta čarhovy čyłovy chłopiec, iznoŭ i znoŭ», — pryznaŭsia adzin z karystalnikaŭ u kamientarach na staroncy aŭtara.
U čym sutnaść
Papularnaść miema davoli zahadkavaja, vyjava sabakahałovaha chłopca ničym asablivym nie adroźnivajecca ad dziasiatkaŭ i socień padobnych kamičnych ilustracyj.
Čyłovamu chłopcu naplavać na składanaści i stres, jon zachoŭvaje abyjakavaść pierad abliččam lubych vyklikaŭ. Ale i hety kamičny efiekt ad supraćpastaŭleńnia spakojnaha čałavieka ŭ tryvožnych žyćciovych abstavinach taksama zusim nie novy.
Ale kožny niazmušany, spakojny čałaviek na hetaj płaniecie moža ŭbačyć siabie ŭ hetym miemie. Asabliva kali ŭžo nie pieršy hod žyvieš u siužecie niejkaha filma-katastrofy z pandemijaj, represijami i vajnoj pad bokam i niama ŭžo sił i žadańnia niejak tryvožycca ad hetaha ŭsiaho, a tym bolš ad niejkich tam prablem u asabistym žyćci ci na pracy.
Časam piersanaž akazvajecca chitrejšym, čym «prosta chłopcam», bo viedaje bolš, čym ludzi navokał, naprykład, što chutka zvolnicca sa svajoj pracy.
Na biełaruskaj hlebie
Čyłovy chłopiec vyhladaje vielmi biełaruskim miemam — dadaj sałamiany bryl i jon byccam stanie ŭvasableńniem znakamitaha «a moža, tak i treba». Z takoj ža abyjakavaściu, zdajecca, biełarusy pieražyli ŭsie niahody minułych stahodździaŭ, i pieražyvuć ciapierašnija.
U biełaruskim tvitary acanili patencyjał hetaha miema. Čyłovaha chłopca z uśmieškaj na tvary źmiaščali pobač z hrybam ad vybuchu jadziernaj bomby, jakimi pahražaje Rasija śvietu, na fonie znakamitych dźviarej karnikaŭ z HUBAZiKa, a taksama ŭ švedary ź dziaržaŭnym hierbam na Kastryčnickaj płoščy — ale heta ŭžo chutčej pra jabaciek, jakija na čyle, u jakich usio dobra i jakija nie zaŭvažajuć taho, što robicca ŭ krainie.
Navat siužet ramana Uładzimira Karatkieviča staŭ polem dla miema. Žudasnym maŭklivym końnikam Dzikaha palavańnia supraćstaić prosta čyłovy chłopiec, jaki «pryjechaŭ z ekśpiedycyjaj z hubiernskaha horada M. u samy hłuchi kutok hubierni pić z krynic vadu, ad jakoj ščymić łob, słuchać praciahłyja, jak biełaruskaje hora, pieśni bab na pryzbach».
«Naša Niva» — bastyjon biełaruščyny
PADTRYMAĆ«Bu! Spužaŭsia?» Miem sa stromnym katom zapałaniŭ internet
Rasijski tyktokier, jaki razdražniaŭ biełarusaŭ, palacieŭ ź Minska. Ščaślivy, bo zmoh paskandalić u aeraporcie z «Biełavija»
Niaŭkludny biehiemocik staŭ zorkaj internetu ŠMAT FOTA
Dvoje źniavolenych začali dzicia, pieradajučy śpiermu praź vientylacyjnuju šachtu
Ciapier čytajuć
Paśla viartańnia ŭ Biełaruś aryštavali Vieraniku Žałuboŭskuju — ściuardesu Katarskich avijalinij, aktrysu i madel2
Kamientary