Лёгка пасміхацца, калі маеш дом у Драздах і шафёра. Анатоль Тозік (злева) і Пятро Пракаповіч.
Намеснік прэм'ер-міністра Анатоль Тозік заклікаў беларусаў не рабіць «твар, страшнейшы за смерць» падчас чэмпіянату свету па хакеі — 2014 у Мінску.
«У нас менталітэт такі, калі робяць твар, страшнейшы за смерць. Чаго варта адно аднаму ўсміхнуцца? Але ў нас, калі ты ўсміхнуўся, узнікаюць зусім іншыя асацыяцыі», — перадае interfax.by словы чыноўніка. Якія менавіта гэта асацыяцыі, чыноўнік не ўдакладніў.
Акрамя таго, Тозiк адзначыў праблемы, з якімі могуць сутыкнуцца хакейныя заўзятары ў побыце падчас чэмпіянату.
Напрыклад, малую колькасць аўтапарковак.
Абурыла віцэ-прэм'ера і тое, што музеі рана заканчваюць працу: «Што гэта такое, калі музей працуе з 9 да 18? Мне што, з працы ў тры сыходзіць, каб трапіць туды? За тыдзень да пачатку чэмпіянату свету і яшчэ тыдзень пасля яго завяршэння яны павінныя працаваць кругласутачна!» Ён прапанаваў, каб падчас турніру пастаянна дзейнічала акцыя «Ноч музеяў», перамяшчаючыся з аднаго музея ў другі.
Чэмпіянат свету па хакеі ў Мінску пройдзе з 9 па 25 траўня ў «Мінск-Арэне» і «Чыжоўка-Арэне».
